2 CRÓNICAS 27 - Biblia Guarani Tumpa Iñee

Jotam oiko mburuvicha guasurä Judá pe

¹ Jotam güɨnoi veinticinco año, omboɨpɨ oï mburuvicha guasurä yave jare oiko mburuvicha guasurä diecisei año Jerusalén pe. Ichɨ jee Jerusa, jae ko Sadoc tayɨ.

² Oyapo jupi vae yandeYa jesa róvai, opaete mbaembae tu Uzías oyapo rami, jaeño mbaetɨ oike yandeYa jo pe. Ërei jókuae ɨvɨ pegua reta jekuaeñoi oyapo ikavimbae.

³ Oyapo öke tuicha vae yandeYa jo kotɨ yaikea peguarä, jare jeta mbaembae oyapo Ofel ikësea re.

⁴ Oyapo vi tëta guasu reta Judá pe ɨvɨtɨ reta re, jare tëta reta ñepɨ̈rokarä jare sundaro reta imaekarä ɨvate vae reta kaa reta rupi.

⁵ Oñeraro vi Amón iñemuña reta juvicha guasu ndive jare omoamɨri, jare Amón iñemuña reta ombaemboepɨ chupe jókuae año rupi tres mil tresciento kilo korepoti, dos millón dosciento mil kilo trigo, jökorai vi cebada. Jökorai vi omee reta mokoía año pe jare mboapɨa año pe.

⁶ Jökorai Jotam imbaepuere yae oyeapo, echa jupi rupi oiko iYa Tumpa jesa róvai.

⁷ Ïru mbaembae Jotam regua, opaete ñeraro pe oyapo vae oyekuatía oï tembikuatía Judá pegua jare Israel pegua mburuvicha guasu reta regua oyekuatía oïa pe.

⁸ Jotam güɨnoi veinticinco año, omboɨpɨ oï mburuvicha guasurä yave, jare oiko mburuvicha guasurä diecisei año Jerusalén pe.

⁹ Jotam omano yave oñotɨ reta iñemuñagüe reta oñeotɨa pe, David Jëta guasu pe. Jare taɨ Acaz oguapɨ jekovia pe mburuvicha guasurä.