2 CRÓNICAS 26 - Biblia Guarani Tumpa Iñee

Uzías oiko mburuvicha guasurä Judá pe

¹ Jayave opaete Judá pegua reta omboguapɨ Uzías mburuvicha guasurä tu Amasías jekovia pe. Uzías güɨnoi diecisei año jayave rupi;

² jare tu Amasías omano güire omopüa pɨau ye tëta guasu Elot jare opɨ̈ro ye ɨvɨ Judá peguarä.

³ Uzías güɨnoi diecisei año omboɨpɨ oï mburuvicha guasurä yave, jare oiko mburuvicha guasurä cincuenta y dos año Jerusalén pe. Ichɨ jee Jecolías, jae ko Jerusalén pegua.

⁴ Jare oyapo jupi vae yandeYa jesa róvai, opaete mbaembae tu Amasías oyapo rami.

⁵ Oyeko Tumpa kotɨño Zacarías oikove oiko ramboeve, echa jae omboe oipoɨu vaerä Tumpa güiño; yandeYa reño oyeko ramboeve, oë kavi chupe opaete mbaembae.

⁶ Jare oë oñeraro filisteo reta ndive jare ombosururu Gat ikësea, Jabnia jare Asdod ikësea, jare omopüa tëta guasu reta ɨvɨ Asdod pe, filisteo reta iɨvɨ pe.

⁷ Tumpa omborɨ oñeraro yave: Filisteo reta ndive, Arabiaɨgua reta Gur-baal pe yogüɨreko vae reta ndive, jare Amón iñemuña reta ndive.

⁸ Amón iñemuña reta ombaemboepɨ Uzías pe; jare Uzías jërakua yae vae oupitɨ ɨvɨ Egipto jembeɨ, echa imbaepuere yae oyeapo.

⁹ Oyapo vi sundaro reta imaekarä jëguambae ɨvate vae reta Jerusalén pe, öke Ekina jee vae iárambo, öke Ɨvɨtɨ päu ipe kavi vae kotɨgua jee vae iárambo jare ekina reta iárambo.

¹⁰ Jökoraiño vi oyapo sundaro reta imaekarä ɨvate vae ñuu rupi, jare oyoo jeta ɨkua reta; echa jeta jɨmba ɨvɨpe kavi rupi jare ɨvɨtɨ iyapɨte ipe kavía rupi; uvarupa jare temitɨ reta ɨvɨtɨ rupi jare ɨvɨpe kavi rupi, echa omomora kó pegua mbaravɨkɨ vae ko.

¹¹ Uzías güɨnoi vi sundaro ñeraro regua reta, kuae reta oyemboyao yao ñogüɨnoe ñeraroa pe, Jeiel ombaekuatía vae omoapɨta rami jare mburuvicha Maasías jare Hananías sundaro ruvicha tenondegua ete mburuvicha guasu ipo pe ñogüɨnoi vae omoapɨta rami.

¹² Opaete tëtara vae juvicha reta, jëia ñeraro pe vae reta oyepapa dos mil seisciento.

¹³ Kuae mburuvicha reta ipo pe ñogüɨnoi tresciento siete mil quiniento sundaro ñeraro regua imbaepuere yae vae reta, omborɨ reta vaerä mburuvicha guasu jovaicho kotɨ.

¹⁴ Uzías oyapouka opaete sundaro reta peguarä yeopiaka, mii, äka-ɨru jiero pegua, temimonde jiero pegua, güɨrapa jare tamamboka.

¹⁵ Oyapouka vi ipoki yae vae reta pe Jerusalén pe tembiporu reta ñeraro peguarä, oñono vaerä sundaro reta imaeka ɨvate vae pe, jare tëta ikësea ɨvate vae pe, joko güi oporoapi reta vaerä uvɨ pe jare ita tuichagüe pe. Jare mombɨrɨ yae rupi jërakua, echa Tumpa omborɨ imbaepuere yae vaerä.

¹⁶ Ërei imbaepuere yae ma yave, ipɨa pe oyembotuicha, jökorai oyembosusere echa oyembopɨapochɨ iYa Tumpa kotɨ oike ramo yandeYa jo pe oapɨ vaerä ikäti kavi vae incienso, ikäti kavi vae incienso oyeapɨ jese vae re.

¹⁷ Ërei sacerdote Azarías ojo jaɨkue ochenta yandeYa isacerdote jëia vae reta ndive, oyopia vaerä.

¹⁸ Jayave oyemboɨ reta mburuvicha guasu Uzías pe jei reta: “Oreruvicha, mbaetɨ ko ndepuere reapɨ vaerä ikäti kavi vae incienso yandeYa pe, jaeño sacerdote reta Aarón iñemuña reta oñeñono tee oapɨ vaerä. Eë o mbaemboetea güi, echa rembaeyavɨ ko, jare yandeYa Tumpa ngaraa ipɨakatu ndeve kuae re.”

¹⁹ Jayave Uzías, ipo pe güɨnoi ikäti kavi vae incienso oyeapɨ pɨpe vae oapɨ vaerä ikäti kavi vae incienso; jayave iyarasɨ sacerdote reta kotɨ. Jökorai rupive oë Uzías jesɨva re, pire mbaerasɨ ókui vae yandeYa jo pe etei, ikäti kavi vae oyeapɨ jese vae iyɨpɨ pe sacerdote reta jóvai.

²⁰ Jare sacerdote tenondegua Azarías jare opaete ïru sacerdote reta omae jese yave, oecha reta jesɨva re oë pire mbaerasɨ ókui vae, jare güɨnoe reta jarembae pegua joko güi; jae etei vi iyandeko oë vaerä, echa yandeYa omombaerasɨ.

²¹ Jökorai mburuvicha guasu Uzías ipire mbaerasɨ ókui oiko omano regua, jare oiko metei o pe ïkotɨa, jare oyopia reta chugüi agüɨye vaerä oike yandeYa jo pe, jare taɨ Jotam oï räri jekovia pe mburuvicharä jókuae ɨvɨ pe.

²² Ïru mbaembae Uzías oyapogüe, tenonde rupi jare taɨkue rupi vae, oikuatía ñeemombeúa Isaías, Amoz taɨ.

²³ Uzías omano yave, oñotɨ reta iñemuñagüe reta oñeotɨa pe, tɨvɨa renda reta mburuvicha guasu reta peguarä vae pe; echa jei reta: “Ipire mbaerasɨ ókui vae ko.” Jare taɨ Jotam oguapɨ jekovia pe mburuvicha guasurä.