2 CRÓNICAS 22 - Biblia Guarani Tumpa Iñee

Ocozías oiko mburuvicha guasurä Judá pe

¹ Jerusalén pegua reta omboguapɨ Ocozías mburuvicha guasurä tu Joram jekovia pe, jae ko taɨ taɨkuegua ete, echa tovaicho reta yogüeru Arabiaɨgua reta ndive teyupa pe vae opa oyuka opaete Joram taɨ tenondegua reta. Jökorai Ocozías opɨta mburuvicharä Judá pe.

² Veintidó año güɨnoi yave omboɨpɨ oï mburuvicha guasurä, jare oiko metei año mburuvicha guasurä Jerusalén pe. Ichɨ jee Atalía, Omri iñemuña pegua.

³ Jaeramiño vi omomoe Acab jare iñemuña reta jeko, echa ichɨ etei omboarakuaa oyapo vaerä ikavimbae vae.

⁴ Oyapo ikavimbae vae yandeYa jesa róvai, Acab tayɨ iñemuña reta rami, echa tu omano yave jaɨkue rupi, jae reta omboarakuaa vae rupi ou oñemokañɨtei.

⁵ Jare jae oiko jae reta iporomboarakuaa rupi. Ocozías oñemoïru Joram, Acab taɨ ndive, mburuvicha guasu Israel pegua, ojo jae ndive tëta Ramot Galaad pegua pe oñeraro vaerä Hazael mburuvicha guasu Siria pegua ndive. Joko pe Siriaɨgua reta ombopere Joram.

⁶ Jare ou Jezreel pe oñepoano vaerä ipere güi, echa jae oyembopereuka oñoraro yave Hazael mburuvicha guasu Siria pegua ndive. Jayave Ocozías mburuvicha guasu Judá pegua ojo opou Joram, Acab taɨ pɨri Jezreel pe, echa joko pe imbaerasɨ oï.

Jehú oyuka Ocozías

⁷ Ërei Tumpa etei oyapo jökorai omano vaerä Ocozías ojo ramboeve opou Joram pɨri. Ojo oväe rupive Joram ndive ñogüɨnoe Jehú pe, Nimsi jɨmɨmino pe. Ërei Tumpa yepe oiparavo Jehú opa vaerä omokañɨtei Acab iñemuña reta.

⁸ Jehú oyuka ramboeve güɨnoi Acab iñemuña reta oväe Judá pegua mburuvicha reta, jare Ocozías jëtara reta taɨ oyeokuai chupe vae, jare opa oyuka.

⁹ Jare oeka reta Ocozías, oñemi yepe oï Samaria pe, oväe reta chupe jare oipɨɨ reta güeru Jehú pe, jare oyuka. Oñotɨ reta oikuaa reve jae ko Josafat taɨ vae, ipɨa reve oeka yandeYa vae. Jökorai Ocozías iñemuña güi mbaetɨ ye opɨta metei ave mborookuaía peguarä.

Atalía oñeñono mburuvicharä

¹⁰ Jayave Atalía Ocozías ichɨ oecha imembɨraɨe omano yave, opüa jare ojo opa oyuka mburuvicha Judá pegua iñemuña reta.

¹¹ Ërei Josabet mburuvicha guasu Joram tayɨ oipɨɨ Joás, Ocozías taɨ ïru taɨ reta ipɨte güi oyeyuka ñogüɨnoi vae güi, jare oñomi Atalía güi iyangarekoa ndive metei o pe, jare mbaetɨ oyuka. Kuae oyapo Josabet mburuvicha guasu Joram tayɨ, Ocozías jeindɨ, sacerdote Joiada jembireko.

¹² Jare Joás oñemi oiko yandeYa itupao guasu pe jae reta ndive ova año, Atalía oiko ramboeve mburuvicharä jókuae ɨvɨ pe.