2 CRÓNICAS 21 - Biblia Guarani Tumpa Iñee

Joram oiko mburuvicha guasurä Judá pe

¹ Josafat omano yave oñotɨ iñemuñagüe David Jëta guasu pe, jare taɨ Joram oguapɨ jekovia pe mburuvicha guasurä.

² Joram tɨvɨ reta jae ko: Azarías, Jehiel, Zacarías, Azarías, Micael jare Sefatías. Opaete kuae reta jae ko Josafat mburuvicha guasu Judá pegua taɨ reta.

³ Tu yepe jeta yae ombopota reta mbae oro pegua pe, korepoti pegua pe, jare mbaembae jepɨ vae pe, jare tëta guasu reta jëguambae Judá pegua pe, ërei mborookuaía omee Joram pe, echa jae ko taɨrɨpɨ.

⁴ Ërei Joram oï kavi ma tu iguapɨa pe mburuvicha guasurä yave, opa oyuka kɨsepuku pe tɨvɨ reta jare amogüe Israel pegua mburuvicha reta.

⁵ Treinta y dos año güɨnoi yave omboɨpɨ oï mburuvicha guasurä jare oiko mburuvicha guasurä juri año Jerusalén pe.

⁶ Jare omomoe mburuvicha guasu reta Israel pegua jeko, jare Acab iñemuña reta jeko; echa omenda kuña Acab iñemuña pegua ndive, oyapo ikavimbae yandeYa jóvai.

⁷ Ërei yandeYa mbaetɨ oipota opa omboai David iñemuña reta, echa oyapo morogüɨrökuavee päve David ndive jare iñemuña reta ndive yogüɨreko avei vaerä tembipe rami.

⁸ Joram oiko mburuvicha guasurä yave, Edom pegua reta oñemopüa Judá imbaepuere pe yogüɨreko vae re, jare omboguapɨ reta iyeupe juvicha guasurä.

⁹ Jayave Joram yogüɨraja isundaro ruvicha reta ndive jare ikäretou ñeraro pegua ndive opüa reta vaerä pɨ̈tu reve Edom pegua reta re, jókuae oporokëse ñogüɨnoi vae reta, jare omoamɨri reta.

¹⁰ Ërei jeseve Edom oyeyora Judá imbaepuere güi añave regua. Jaeramiño vi Libna oyeyora jókuae ara rupi Judá imbaepuere güi, echa Joram oeya yandeYa iñemuñagüe reta iTumpa.

¹¹ Jare omopüa vi mbaemboete renda ɨvɨtɨ rupigua reta Judá pe, jare oyavɨuka Jerusalén pegua reta pe Tumpa kotɨ jae reta rami, jare opaete Judá pegua reta omombiauka Tumpa güi.

¹² Ërei ou oväe ñeemombeúa Elías güi chupe tupapire, kuae tupapire pe jei: “YandeYa Tumpa, neñemuñagüe David iTumpa jei körai ndeve: ‘Mbaetɨ ramo remomoe nderu Josafat jeko ani Asa mburuvicha guasu Judá pegua jeko,

¹³ ërei remomoe mburuvicha guasu reta Israel pegua jeko, jare reyavɨuka Jerusalén pegua reta pe yandeYa kotɨ Acab iñemuña reta rami. Jaeramiño vi opa reyuka nderɨvɨ nderu iñemuña reta, jeko kavi tëi ndegüi vae reta.

¹⁴ Jáeramo yandeYa ombouta tembiporara guasu kuae tëta ndembae re, nderaɨ reta re, nderembireko reta re jare opaete ndembaembae re.

¹⁵ Jare nde ndembaerasɨ yaeta. Oñonota nderɨe pe mbaerasɨ opa regua remombo ndechuri.’ ”

¹⁶ Jayave yandeYa omboarasɨuka Joram kotɨ filisteo reta jare Arabiaɨgua reta yogüɨreko Etiopíaɨgua reta iyɨpɨ pe vae.

¹⁷ Oporepeña reta Judá re jare opɨ̈ro iɨvɨ, jare güɨraja opaete mburuvicha guasu imbaembae reta jo iporookuaía pegua, taɨ reta jare jembireko reta. Jaeñoete opɨta taɨ taɨkuegua ete Joacaz.

¹⁸ Opaete kuaekuae reta jaɨkue rupi yandeYa oiporarauka chupe mbaerasɨ okuerambae pe ichuri pe.

¹⁹ Oasa ara reta, jare mókoi añoa pe ichuri reta oë, ichuri pe imbaerasɨ jeko pegua omanoasɨ katu yae. Javoi mbaetɨ oapɨ reta chupe ikäti kavi vae incienso omboete vaerä, iñemuñagüe reta pe oapɨ rami.

²⁰ Treinta y dos año güɨnoi yave omboɨpɨ oiko mburuvicharä, jare juri año oiko mburuvicharä Jerusalén pe. Omano yave mbaetɨ kia oäpiro. Jare oñotɨ reta David Jëta guasu pe, ërei mbaetɨ mburuvicha guasu reta jɨvɨa renda pe.