2 CRÓNICAS 16 - Biblia Guarani Tumpa Iñee

Asa oñemoïru Ben-adad ndive

¹ Ërei treinta y seis año ma Asa oiko mburuvicha guasurä yave, Baasa mburuvicha guasu Israel pegua oporepeña Judá re, jare oikëse reta Ramá agüɨye vaerä oë ani oike metei ave mburuvicha guasu Asa Judá pegua kotɨ.

² Jayave Asa güɨnoe korepoti jare oro yandeYa jo pe mbaembae jepɨ vae oñeñovatúa güi jare mburuvicha guasu jo pe mbaembae jepɨ vae oñeñovatúa güi jare omondo mburuvicha guasu Ben-adad Siria pegua Damasco pe oiko vae pe, jei reve:

³ “Toiko ñemoïru che jare nde ndive, cheru jare nderu yogüɨrekose rami. Mase, ko amondo ndeve korepoti jare oro, eyu emboai jókuae ñemoïru renoi Baasa mburuvicha guasu Israel pegua ndive vae, osɨrɨ vaerä chegüi.”

⁴ Jare Ben-adad ikɨ̈reɨ omborɨ mburuvicha guasu Asa, jare omondo isundaro ruvicha reta oporepeña vaerä tëta guasu reta ɨvɨ Israel pegua re. Jökorai opɨ̈ro reta Ijón, Dan, Abel-maim jare opaete tëta guasu reta tembíu oñeñovatúa Neftalí pegua.

⁵ Baasa oikuaa kuae re yave, mbaetɨ ma oikëse tëta Ramá, oeya iparavɨkɨ.

⁶ Jayave mburuvicha guasu Asa güɨraja opaete vae Judá pegua reta, jare güeru reta Ramá güi ita reta jare jókuae ɨvɨra reta Baasa oikëse tëta guasu pɨpe vae, jare jókuae pe oikëse Geba jare Mizpa.

⁷ Jókuae ara rupi ou mbae re oecha voi vae Hanani opou mburuvicha guasu Asa pɨri, jare jei chupe: “Mburuvicha guasu Siria pegua isundaro reta oasayepe ko ndegüi, echa reyeko mburuvicha guasu Siria pegua re, jare mbaetɨ reyeko yandeYa Tumpa re.

⁸ ¿Etiopía jare Libia pegua jeta yaeä yera isundaro jare ikäretou reta ñeraro pegua jare kavayu regua reta? Ërei nde reyeko ramo yandeYa re jae opa omee ndepo pe.

⁹ Echa yandeYa omae opaete ɨvɨ re, jae omborɨ ipɨa jupi rupi oiko chupe vae. ¡Kuae reyapo iyarakuaambae rami! Echa kuae güi tenonde kotɨ oimeta ndekotɨ jeta ñeraro.”

¹⁰ Jayave Asa täta iyarasɨ mbae re oecha voi vae kotɨ jare oñonouka tembipɨɨrɨru pe. Oiporarauka vi amogüe tëta pegua reta pe.

Asa imano

¹¹ Asa oyapogüe reta iyɨpɨ güive iyapɨ pe oyekuatía oï tembikuatía pe mburuvicha guasu reta Judá pegua jare Israel pegua regua oyekuatía oïa pe.

¹² Asa treinta y nueve año ma oiko mburuvicha guasurä yave imbaerasɨ ipɨ pe, jare mbaetɨ oeka yandeYa, jaeño oeka oporopoano vae reta.

¹³ Jare cuarenta y un año ma oiko mburuvicha guasurä yave, omano,

¹⁴ jare oñotɨ reta tɨvɨa jae oyapouka iyeupe David Jëta guasu pe vae pe. Oñono reta tëogüe-rɨru pe, oñono reta vi chupe jeta mbae ikäti kavi yae vae ipoki oyapo vae reta jembiapo. Javoi tuicha oyatapɨ reta oapɨ vaerä ikäti kavi vae omboete ramo.