2 CRÓNICAS 14 - Biblia Guarani Tumpa Iñee

Asa oiko mburuvicha guasurä Judá pe

¹ Abías omano yave oñotɨ reta David Jëta guasu pe. Jare taɨ Asa oguapɨ jekovia pe mburuvicha guasurä. Jae oiko mburuvicha guasurä yave, oime mbɨakatu payandepo año rupi.

² Asa oyapo ikavi vae jare sɨmbi vae iYa Tumpa jóvai.

³ Omboai mɨmba oyeapɨ jese vae reta mbaemboetea tumpa-raanga pegua, jare mbaemboete renda reta ɨvɨtɨ rupigua; oyoka mbae iä reta jare omboai Asera iä reta.

⁴ Jare oyókuai Judá pegua reta oeka vaerä yandeYa, iñemuñagüe reta iTumpa, jare oyapo reta vaerä jae iporookuai.

⁵ Omboai vi opaete tëta guasu reta Judá pegua güi mbaemboete renda ɨvɨtɨ rupigua reta, tumpa-raanga iä reta. Jare oime mbɨakatu oiko ramboeve mburuvicha guasurä.

⁶ Omopüa tëta guasu reta jëguambae Judá pe, echa oime ramo mbɨakatu jókuae ɨvɨ pe, jare jókuae ara rupi mbaetɨ oñeraro jae ndive vae, echa yandeYa omee chupe mbɨakatu.

⁷ Jei Judá pegua reta pe: “Ñamopüa kuae tëta guasu, ñaikëse kavi jëguambae o ɨvate vae pe, öke jëguambae pe, echa kuae ɨvɨ yandembae ko. Echa yaeka yandeYa Tumpa pe ramo, omee yaiko kavi vaerä yandeɨ́vɨri yogüɨreko vae reta ndive.” Omopüa reta jare oë kavi mbaravɨkɨ chupe reta.

⁸ Asa güɨnoi sundaro reta yeopiaka jare mii reve reve: Judá pegua reta tresciento mil jare Benjamín pegua dosciento ochenta mil, opareve güɨnoi yeopiaka jare uvɨ, opaete reve jókuae kuimbae reta jesegua katuai.

⁹ Jare Zera Etiopíaɨgua oporepeña jese reta metei millón sundaro jare tresciento käretou ñeraro pegua ndive, jare ou oväe Maresa pe.

¹⁰ Jayave oë Asa oñeraro vaerä jae reta ndive, jare oñeñono kavi reta ɨvɨtɨ päu Sefata pe, Maresa iyɨpɨ pe.

¹¹ Jare Asa oyerure iYa Tumpa pe, jei: “CheYa, ndeve mbaetɨ yavai remborɨ vaerä imbaepuere vae ani mbaetɨ imbaepuere vae. ¡Oremborɨ oreYa Tumpa, echa nderé royeko, jare nderee re royu roñeraro vaerä kuae sundaro reta ndive! Nde oreYa jae ko oreTumpa. ¡Eechauka mbaetɨ ko kia ipuere oyovaicho nde ndive vae!”

¹² Jayave yandeYa omborɨ Asa jare Judá pegua reta, jáeramo Etiopíaɨgua reta opa otekuarai.

¹³ Asa jare isundaro reta ndive oaɨkuemoña reta Gerar kotɨ, jare opaetei oyuka Etiopíaɨgua reta, echa yandeYa omee ipo pe reta, jare Israel iñemuña reta opɨ̈ro opaetei imbaembae reta.

¹⁴ Opüa reta vi opaete tëta guasu reta Gerar iyɨ́vɨri ñogüɨnoi vae re, echa yandeYa ombou kɨɨye guasu jese reta, jare omaepɨ̈ro opaete tëta guasu reta rupi, echa jeta yae imbaembae reta joko pe.

¹⁵ Jaeramiño vi oporepeña reta teyupa rupi güɨnoi mɨmba vae reta re jare güɨraja reta jeta vecha jare camello. Javoi oyerova reta ye Jerusalén kotɨ.