2 CRÓNICAS 12 - Biblia Guarani Tumpa Iñee

Sisac oike opɨ̈ro Judá

¹ Roboam oecha oï kavi yae ma iporookuaía pe yave, oeya Tumpa iporookuai reta opaete Israel iñemuña reta ndive.

² Jare oyembopɨapochɨ reta yandeYa kotɨ ramo, pandepoa año ma Roboam oiko mburuvicha guasurä yave, Sisac mburuvicha guasu Egipto pegua oporepeña Jerusalén re,

³ mil dosciento käretou ñeraro pegua ndive, jare sesenta mil kuimbae kavayu regua jare jeta yogüeru jae ndive Egipto güi, Libiaɨgua reta, suquieno reta jare Etiopíaɨgua reta.

⁴ Jare opɨ̈ro tëta guasu reta jëguambae Judá pegua, ou oväe regua Jerusalén pe.

⁵ Jayave ñeemombeúa Semaías ou Roboam pɨri jare mburuvicha reta Judá pegua pɨri, oyemboatɨ ñogüɨnoi Jerusalén pe Sisac jeko pegua vae reta, jare jei chupe reta: —Körai jei yandeYa: “Pe reta chereeya, che vi poeya Sisac ipo pe.”

⁶ Jare mburuvicha reta Israel pegua mburuvicha guasu ndive oñemomichi reve jei reta: —¡YandeYa ko jupi vae!

⁷ Jare yandeYa oecha oñemomichi reta yave, jei Semaías pe: “Oñemomichi yae reta jeko pegua, mbaetɨta amboai reta, aepɨ retata Sisac ipo güi jare ngaraa aitɨ chearasɨ Jerusalén re.

⁸ Ërei yogüɨreko retata jembiokuai retarä, oikuaa reta vaerä oyoavɨ ko oyeokuai cheve vae ïru tëtaguasu reta pegua mburuvicha guasu reta pe oyeokuai vae güi.”

⁹ Sisac mburuvicha guasu Egipto pegua oike Jerusalén pe jare opa opɨ̈ro yandeYa jo pe mbaembae jepɨ vae oñeñovatu vae jare mburuvicha guasu jo pe mbaembae jepɨ vae oñeñovatu vae opaetei güɨnoe; opaetei güɨraja mbaembae, opaetei vi güɨraja yeopiaka reta oro pegua Salomón oyapogüe.

¹⁰ Jókuae jekovia pe mburuvicha guasu Roboam oyapo yeopiaka reta jiero iyu vae pegua, jare omee mburuvicha guasu jöke järoa itenondegua reta pe.

¹¹ Mburuvicha guasu ojo yandeYa itupao guasu pe yave, kuimbae reta öke järoa güɨraja jókuae yeopiaka reta, jare jaɨkue rupi güeru reta ye oñono reta oñeñovatúa pe.

¹² Jare jae oñemomichi yave yandeYa iñɨ̈ro chupe, agüɨye vaerä opaetei omokañɨtei. Jökorai ɨvɨ Judá pe jekuaeño ikavi.

¹³ Roboam oñemopɨ̈rata mburuvicha guasurä Jerusalén pe; cuarenta y un año ma güɨnoi yave omboɨpɨ oiko mburuvicha guasurä, jare diecisiete año oiko mburuvicharä Jerusalén pe, tëta guasu yandeYa oiparavo opaete ñemuña reta güi vae pe, jae jee oiko vaerä joko pe. Roboam ichɨ jee Naama jae ko Amón iñemuña.

¹⁴ Roboam oyapo ikavimbae, echa mbaetɨ güɨnoi ipɨa pe oeka kavi vaerä yandeYa.

¹⁵ Roboam oyapo vae regua iyɨpɨ güive iyapɨ pe, oyekuatía oï ñeemombeúa Semaías jembikuatía pe, jare mbae re oecha voi vae Iddo imbae pe, ñemuña reta jee oïa pe. Jare Roboam oñoraro avei Jeroboam ndive yogüɨreko.

¹⁶ Roboam omano yave oñotɨ reta David Jëta guasu pe, jare taɨ Abías oguapɨ jekovia pe mburuvicha guasurä.