2 CRÓNICAS 11 - Biblia Guarani Tumpa Iñee

¹ Roboam ou Jerusalén pe yave, omboatɨ Judá jare Benjamín iñemuña reta güi ciento ochenta mil kuimbae oyeparavogüe ñeraro peguarä, oñeraro vaerä Israel pegua reta ndive; jökorai opa ye vaerä güeru iporookuaía pe.

² Ërei yandeYa jei iñeemombeúa Semaías pe:

³ “Ere Judá pegua mburuvicha guasu Roboam, Salomón taɨ pe, jare opaete Israel iñemuña reta Judá pegua jare Benjamín pegua reta pe,

⁴ agüɨye toñoraro oyoupii, toyogüɨraja ye jëta jëta ae pe, echa che ko ayapo kuae.” Jare jae reta oyapo yandeYa jeigüe, oyerova reta ye, jare mbaetɨ oñemopüa Jeroboam re.

Roboam oyapogüe

⁵ Roboam oiko Jerusalén pe, jare omopüa tëta guasu reta jëguambae ombotuicha vaerä Judá.

⁶ Omopüa Belén, Etam, Tecoa,

⁷ Bet-sur, Soco, Adulam,

⁸ Gat, Maresa, Zif,

⁹ Adoraim, Laquis, Azeca,

¹⁰ Zora, Ajalón jare Hebrón; jae ko opaete tëta guasu reta jëguambae Judá pe jare Benjamín pe vae.

¹¹ Oyapo kavi vi ñepɨ̈roka reta jare oñono joko pe mburuvicha reta, jare tembíu reta, vino jare olivo iasaite.

¹² Jare opaete tëta guasu reta rupi omondo yeopiaka reta jare mii reta, jëguambae yae oyapo. Jökorai Judá jare Benjamín pegua yogüɨreko jae jeia re.

¹³ Jare sacerdote reta jare levita reta opaete Israel pe ñogüɨnoi vae, yogüeru ketɨ ketɨ güi oñemoïru vaerä jae ndive.

¹⁴ Echa levita reta opa oeya jɨmba reta ikarúa renda jare imbaembae yogüɨraja vaerä ɨvɨ Judá pe jare Jerusalén pe, echa Jeroboam iñemuña reta ndive oyopia yandeYa pe oyeokuai vae güi.

¹⁵ Jare jae oñono isacerdoterä mbaemboete renda reta ɨvɨtɨ re ñogüɨnoi vae peguarä, omee vaerä mbaemboete aña reta pe jare toro taɨrusu vae iä reta pe jae oyapo vae pe.

¹⁶ Jare opaete ñemuña reta Israel pegua ipɨa pe oyemongeta oeka yandeYa Israel iTumpa vae, yogüɨraja vi sacerdote jare levita reta rami Jerusalén kotɨ, omee vaerä mɨmba oyeyukagüe yandeYa pe, iñemuñagüe reta iTumpa pe.

¹⁷ Jökorai omopɨ̈rata mborookuaía Judá pe, omborɨ reta Roboam, Salomón taɨ mboapɨ año rupi, echa mboapɨ año rupi omomoe David jare Salomón jeko.

¹⁸ Roboam omenda Mahalat Jerimot David taɨ tayɨ ndive, Abihail, Eliab tayɨ imemɨkuña, Eliab jae ko Isaí taɨ.

¹⁹ Jare Mahalat imembɨ reta jae: Jeús, Semarías jare Zaham.

²⁰ Kuae jaɨkue rupi Roboam omenda Maaca, Absalón tayɨ ndive; jae kuae imembɨ reta: Abías, Atai, Ziza jare Selomit.

²¹ Ërei Roboam oaɨu yae Maaca, Absalón tayɨ ïru jembireko reta güi; jae güɨnoi dieciocho jembireko ete jare sesenta kuña güɨrekoiño vae, güɨnoi dieciocho taɨ jare sesenta tayɨ.

²² Jare Roboam oñono taɨ Abías Maaca imembɨraɨe mburuvicharä jare tenondeguarä tɨvɨ reta pe, echa oipota omboguapɨ mburuvicha guasurä.

²³ Oikuaa katu kavi reve opa omoai taɨ reta ɨvɨ Judá jare Benjamín rupi, jare opaete tëta guasu reta jëguambaea rupi, jare omee chupe reta jeta tembíu jare jeta kuña reta.