2 CRÓNICAS 10 - Biblia Guarani Tumpa Iñee

Tëtaguasu Israel oyemboyao

¹ Roboam ojo Siquem pe, echa joko pe oyemboatɨ opaete Israel iñemuña reta omboguapɨ vaerä mburuvicha guasurä.

² Jare Jeroboam, Nabat taɨ oendu kuae re Egipto pe oï yave, echa jokotɨ otekuarai mburuvicha guasu Salomón güi, jayave ou ye Egipto güi.

³ Jare omondo oenɨiuka reta yave, Jeroboam jare opaete Israel iñemuña reta yogüeru imiari Roboam ndive, jei reta chupe:

⁴ —Nderugüe ombojeiete yae ko oreve iporookuai, ërei añave nde embovevɨi mí kërai yepe oreve nderugüe oñono oreve vae, jare toroyeokuai ndeve.

⁵ Jare jae jei chupe reta: —Peyu ye kuae güi mboapɨ araa pe chekotɨ. Jare opaete yogüɨraja ye.

⁶ Jayave mburuvicha guasu Roboam oparandu tenondegua reta pe tu Salomón iyɨvɨriguagüe reta pe. Jare jei: —¿Mbae pa pere pe reta, jae vaerä kuae jeta vae reta pe?

⁷ Jare jae reta jei chupe: —Ndereko kavi kuae reta pe yave, rembopɨakatu yave jare remomiari kavi reta yave, jae reta oyeokuaita ndeve jekuae avei.

⁸ Ërei jae mbaetɨ oyapo tenondegua reta jei chupe vae, oparandu taɨrusu reta pe, jae iyaveigua vae reta pe, iyɨvɨrigua reta pe,

⁹ jei chupe reta: —¿Mbae pa pere pe reta yae vaerä kuae jeta vae reta pe, jei reta cheve embovevɨi mí kërai yepe oreve nderugüe oñono oreve vae?

¹⁰ Jayave jókuae iyaveigua taɨrusu vae reta jei reta chupe: —Nderugüe ombojeiete yae ko oreve iporookuai, ërei nde embovevɨi oregüi jei vae reta pe: “Chepoäka raɨ imbaepuere yae ko cheru imbaepuere güi;

¹¹ cheru peokuaiasɨ katu, ërei che amoïruta peve jókuae yeokuaiasɨ katu, cheru penupa musura pe, ërei che ponupata jätinguru jiero pegua pe vae pe.”

¹² Mboapɨa ara pe ou Jeroboam opaete vae ndive, mburuvicha guasu Roboam jei chupe reta rami.

¹³ Jayave mburuvicha guasu Roboam jei ñee jasɨ katu yae reve, echa mbaetɨ oyapo tenondegua reta yemboarakuaa omee tëi chupe vae,

¹⁴ jare taɨrusu reta yemboarakuaa omee chupe vae rupi jei: “Cheru ombojeiete yae iporookuai, ërei che amoïru yeta peve jókuae mborookuai; cheru penupa musura pe, ërei che ponupata jätinguru yae vae jiero pegua pe.”

¹⁵ Jare mburuvicha guasu mbaetɨ oyeapɨsaka jeta vae reta re, echa Tumpa omaeño jökorai oasa yandeYa iñee oyembopo vaerä Ahías Silo pegua rupi Jeroboam, Nabat taɨ kotɨ vae.

¹⁶ Jare opaete Israel iñemuña reta oecha yave mburuvicha guasu mbaetɨ oendu jae reta jei vae, jei reta körai mburuvicha guasu pe: “¡Mbaetɨ etei ko mbae rogüɨnoi David re! ¡Mbaetɨ etei mbae ave rogüɨnoi Isaí taɨ re! ¡Metei ñavo Israel iñemuña reta pekua pero ae ae kotɨ! ¡David iñemuña reta toyangareko iyé aeño!” Jökorai yogüɨraja Israel iñemuña reta jo ñavo rupi.

¹⁷ Ërei Roboam oï mburuvicha guasurä Israel iñemuña reta re, tëta guasu reta Judá pegua pe yogüɨreko vae reta re.

¹⁸ Javoi mburuvicha guasu Roboam omondo Adoram okovara vaerä mburuvicha peguarä; ërei Israel iñemuña reta oyapi reta ita pe oyuka, jayave mburuvicha guasu Roboam jaɨai oyeupi ikäretou pe, jare otekuarai Jerusalén kotɨ.

¹⁹ Jökorai Israel iñemuña reta oyembosɨrɨ David iñemuña reta güi añave regua.