2 Corintios 1 - Biblia Guarani Tumpa Iñee

Tamaraeme reta

¹ Che Pablo, Jesucristo jemimondo Tumpa jemimbota rupi. Yanderɨvɨ Timoteo ndive romondo kuae tupapire opaete peporogüɨrovia vae Corinto pe peï vae reta pe, jare opaete oporogüɨrovia vae Acaya rupi ñogüɨnoi vae reta pe.

² YandeRu Tumpa jare yandeYa Jesucristo toï peve ipɨakavi jare ipɨakatu.

Pablo oiporara vae regua

³ Toyemboete Tumpa, yandeYa Jesucristo Tu. Jae ko yandeRu iporoparareko jare oporombopɨakatu vae,

⁴ echa jae yandembopɨakatu opaete yaiporara vae rupi, yandepuere vaerä vi yambopɨakatu ïru oiporara ñogüɨnoi vae reta, Tumpa yandembopɨakatu rami.

⁵ Echa yaiporara yae yave Cristo re yarovia jeko pegua, yandepɨakatu yaeta vi Cristo rupi.

⁶ Ërei ore roiporara yave, roiporara ko pe reta penoi vaerä mbɨakatu jare yemboasa. Jare Tumpa orembopɨakatu yave, orembopɨakatu ko penoi vaerä mbɨakatu jare yemboasa. Jare jökorai pepuere peropɨa peiporara yave ore rami.

⁷ Jare jekuaeño pogüɨrovia katu yae. Echa roikuaa kërai pe reta vi peiporara ore roiporara rami. Jaeramiño vi roikuaa kërai Tumpa pembopɨakatu orembopɨakatu rami.

⁸ Cherɨvɨ reta, roipota peikuaa kërai roiporara Asia pe roiko yave vae. Roiporara yae. Orepuereä ma rogüɨropɨa. Jáeramo royemongeta opa potaecha romano.

⁹ Royemongeta jaema ko romanota vae, agüɨye vaerä royeko oreyé aeño, jaeño Tumpa omoingove ye omanogüe vae reta vae re.

¹⁰ Echa jae orereroasayepe mano güi, jare jekuae orereroasayepe yeta mano güi,

¹¹ pe reta oremborɨ peyerure oreré vae rupi. Jökorai jeta vae reta iyerure rupi oñemee oreve Tumpa ipɨakavi. Jare jeta vae omee yasoropai Tumpa pe.

Maera Pablo mbaetɨ räri ojo Corinto pe

¹² Ore roiko kavi oporogüɨroviambae vae reta ipɨte pe jare pepɨte pe vi, Tumpa oremborɨ ramo. Mbaetɨ etei roporombotavɨ. Jare körai roiko Tumpa ipɨakavi rupi, mbaetɨ roiko orearakuaa rupiño. Jáeramo royerovia.

¹³ Echa peikuaa pemongeta rami kavi roikuatía peve peikuaa kavi vaerä. Jare aipota jekuaeño peikuaa kavi yae;

¹⁴ echa pe reta peyerovia oreré. Jaeramiño vi ore royeroviata peré yandeYa Jesús ou ye yave.

¹⁵ Kuae ayemongeta ramo, tenonde aipota aja pépɨri, peyerovia vaerä mókoi vese,

¹⁶ echa aipota apou pépɨri Macedonia pe aja yave jare ayu ye yave, jare pe reta chemborɨ vaerä aja Judea kotɨ.

¹⁷ Jare ayemongeta yave jökorai ayapo vaerä, mbaetɨ ayemongetaiño jese. Echa ayemongeta yave mbae ayapo vaerä, mbaetɨ etei ayemongeta cheremimbota rupiño. Che mbaetɨ ko jae jaeiño.

¹⁸ Tumpa oikuaa ko ngaraa roe roeiño.

¹⁹ Echa Tumpa Taɨ Jesucristo che jare Silvano jare Timoteo romoërakua peve vae, oipoepɨ katu iyemongeta vaeä ko.

²⁰ Echa opaete Tumpa güɨrökuavee vae Cristo oyapota ko. Jáeramo romboete yave roe: “Amén” Tumpa pe, Cristo rupi.

²¹ Jare Tumpa ko ñanemomɨ̈rata jare ñanemometei Cristo rupi;

²² jare jae ñanemokañɨmaa Espíritu Santo pe, oñono yandepɨa pe Espíritu Santo jae ko oikuaauka jae imbae ete ko yande vae.

²³ Jare ndeiño aja pépɨri, agüɨye vaerä añeengata peve, Tumpa oikuaa kuae amombeu peve vae añete ko.

²⁴ Mbaetɨ ko rogüɨnoi mbaepuere peporogüɨrovia re. Echa pepɨ̈rata ma peporogüɨrovia re. Jaeño roipota pomborɨ, pe reta peyerovia vaerä.