1 Timoteo 3 - Biblia Guarani Tumpa Iñee

Oporogüɨrovia vae reta itenondegua kërai oyeparavo vaerä

¹ Kuae ñee añete ko: Oime yave kia oipota oiko oporogüɨrovia vae reta itenondeguarä vae, mbaravɨkɨ ikavi vae ko oipota.

² Ërei ikavi ko oporogüɨrovia vae reta itenondegua re agüɨye oñeväe teko, meteiño tijembireko, agüɨyeta jei jeiiño, toyeandu katu, toyapo ikavi vae, tomboresive katu mboupa, toikatu toporomboe;

³ agüɨye tikause, agüɨye tiñerarose, agüɨye tomonganaiño jupimbae reve. Ërei tipɨakavi, toiko pɨagüive, agüɨye toipota yae korepoti iyeupeguarä.

⁴ Togüɨroata kavi opaete jo pegua reta, toyemboeteuka imichia reta pe jupi rupi kavi.

⁵ (Echa mbaetɨ oikatu güɨroata jo pegua reta yave, ¿këraita pa oikatu güɨroata Tumpa re güɨrovia vae reta?)

⁶ Jare agüɨye toyeparavo oporogüɨrovia ramo vae, echa güɨramoi oyembotuichata, jare oa aña guasu oa vae pe.

⁷ Jaeramiño vi tijërakua kavi oporogüɨroviambae vae reta pe, agüɨye vaerä imboetea poi jare oa aña guasu iñuai pe.

Oporogüɨrovia vae reta imborɨa kërai oyeparavo vaerä

⁸ Jaeramiño vi oporogüɨrovia vae reta imborɨa reta toiko reta jupi rupi kavi, agüɨye toipoepɨ katu iyemongeta, agüɨye tikause, agüɨye tomonganaiño jupimbae reve;

⁹ toñovatu jókuae añete vae yaikuaa yarovia vae re, jare toiko oyemongeta kavi reve.

¹⁰ Tenonde ete toñejäa räri, jare mbaetɨ teko oñeväe jese yave ipuere oike oporomborɨ vaerä.

¹¹ Jökoraiño vi kuña reta toiko reta jupi rupi, agüɨye tiporoangaose, agüɨyeta jei jeiiño, opaete pe tijupi.

¹² Oporogüɨrovia vae reta imborɨa reta meteiño tijembireko, togüɨroata kavi taɨ reta jare jo pegua reta.

¹³ Echa kuae reta oyeokuai kavi yave Tumpa pe, oyemboeteuka yaeta, jare ipuere oiko ipɨakatu kavi reve Cristo Jesús re güɨrovia vae rupi.

Añetegüe Tumpa re yarovia vae regua

¹⁴ Ayemongeta ɨmambaeño aja vaerä ndépɨri. Ërei kuae mbaembae re aikuatía ndeve,

¹⁵ echa güɨramoi aja raiviä yave, aipota reikuaa këraita reiko Tumpa taɨ reta ipɨte pe, jae ko Tumpa oikove vae re güɨrovia vae reta, jae reta oyoko añete vae.

¹⁶ Añete ñanemopɨakañɨ yae ko kuae añetegüe Tumpa re yarovia vae: Tumpa oyeapo kuimbaerä, Espíritu Santo oikuaauka jae ko jupi vae. Araɨgua reta oecha. Jërakua opaete judiombae reta pe. Ɨvɨ pegua reta güɨrovia jese. Jare Tu omboresive ye ara pe.