1 CRÓNICAS 26 - Biblia Guarani Tumpa Iñee

Öke iyangarekoa reta jare juvicha reta

¹ Oyemboyao yave öke iyangarekoa reta mbaravɨkɨ peguarä jae kuae: Coré iñemuña reta güi Meselemías, Coré taɨ, jae ko Asaf iñemuña.

² Meselemías taɨ reta jae: Taɨrɨpɨ jae Zacarías, mokoía jae Jediael, mboapɨa jae Zebadías, irundɨa jae Jatniel,

³ pandepoa jae Elam, ovaa jae Johanán jare chiúa jae Elioenai.

⁴ Obed-edom taɨ reta jae: Taɨrɨpɨ jae Semaías, mokoía jae Jozabad, mboapɨa jae Joa, irundɨa jae Sacar, pandepoa jae Natanael,

⁵ ovaa jae Amiel, chiúa jae Isacar, jare juría jae Peultai. Jeta taɨ, echa Tumpa iporerekua Obed-edom re.

⁶ Semaías, Obed-edom taɨ, güɨnoi mókoi taɨ mburuvicha jëtara re vae, echa kuimbae jëia yae vae reta ko.

⁷ Semaías taɨ reta jae: Otni, Rafael, Obed, Elzabad, Eliú jare Samaquías, kuimbae jëia yae vae reta ko.

⁸ Opaete kuae reta Obed-edom iñemuña, taɨ reta jare jëtara reta kuimbae jëia yae vae reta, omboyekuaa oyeokuaía pe. Opaete reve oupitɨ sesenta y dos Obed-edom iñemuña.

⁹ Meselemías taɨ reta jare jëtara reta opareve dieciocho kuimbae jëia yae vae reta ko.

¹⁰ Merari iñemuña güi Simri Hosa taɨ; tu oñono mburuvicharä yepe tëi jae mbaetɨ tu taɨrɨpɨ.

¹¹ Mokoía jae Hilcías, mboapɨa jae Tebalías, irundɨa jae Zacarías. Hosa taɨ reta jare jëtara reta opaete reve oupitɨ trece.

¹² Kuae jae öke iyangarekoa reta pe oyemboyao iparavɨkɨ rupi vae. Tupao pe mbaravɨkɨ oyapo reta vae re oyovake tenondegua reta oyopoepɨ jëtara reta ndive.

¹³ Oyapo reta suerte tëtara rupi öke ñavo peguarä, jare suerte pe oike okuakuaagüe reta jare taɨrusu vae reta.

¹⁴ Selemías pe suerte oë öke kuaraɨ oëa kotɨgua re, jare taɨ Zacarías yarakuaa yae oporomboarakuaa vaerä vae pe ɨvɨtuguasu kotɨ.

¹⁵ Obed-edom pe suerte oë arayevɨ kotɨgua re, jare taɨ reta oyangareko vaerä tupao pegua mbaembae oñeñovatúa re.

¹⁶ Supim jare Hosa pe suerte oë kuaraɨ oikea kotɨgua re, öke Salequet jee vae re, tape yayeupía pe. Mbaravɨkɨ reta oyemboyao körai:

¹⁷ Ara ñavo oime ova levita öke iyangarekoa kuaraɨ oëa kotɨ, irundɨ ɨvɨtuguasu kotɨ, jare irundɨ vi arayevɨ kotɨ, jare mbaembae oyeu vae oñeñovatúa ñavo re mókoi mókoi.

¹⁸ Tupao joka kuaraɨ oikea kotɨ tembiporu reta oñeñovatúa kotɨ, oime irundɨ tape re oyangareko vae jare mókoi oka pe.

¹⁹ Jökorai oyemboyao mbaravɨkɨ öke iyangarekoa reta pe, Coré jare Merari iñemuña reta pe.

²⁰ Levita reta güi, Ahías ipo pe opɨta oyangareko vaerä Tumpa jo pe mbaembae jepɨ vae re, jare mbaembae jepɨ vae oñeñono tee Tumpa peguarä vae oñeñovatúa re.

²¹ Gersón iñemuña Laadán, Laadán taɨ güi Jehiel iñemuña reta,

²² Jehiel taɨ reta, jare tɨvɨ reta Zetam jare Joel taɨ reta güɨnoi ipo pe oyangareko vaerä yandeYa jo pe mbaembae jepɨ vae oñeñovatúa re.

²³ Amram, Izhar, Hebrón jare Uziel iñemuña reta pegua güi,

²⁴ Sebuel jae tenondegua ete mbaembae jepɨ vae oñeñovatúa iyangarekoa, jae ko Gersón taɨ, Moisés jɨmɨmino.

²⁵ Jare Gersón tɨvɨ Eliezer taɨ jae Rehabías; Rehabías taɨ jae Jesahías; Jesahías taɨ jae Rehabías; Rehabías taɨ jae Joram; Joram taɨ jae Jesahías; Jesahías taɨ jae Zicri; Zicri taɨ jae Selomit.

²⁶ Selomit jëtara reta ndive güɨnoi ipo pe oyangareko vaerä opaete mbaembae David jare tëtara itenondegua reta, sundaro itenondegua reta, jare jeta vae reta itenondegua, sundaro ruvicha itenondegua reta oñono tee reta Tumpa peguarä vae oñeñovatúa re.

²⁷ Jae ko opɨ̈ro reta güeru ñeraroa güi vae jare omee reta tupao oyeapo kavi vaerä vae.

²⁸ Jaeramiño vi mbae re oecha voi vae Samuel, jare Saúl, Cis taɨ, jare Abner, Ner taɨ, jare Joab, Sarvia imembɨraɨe oñono tee reta Tumpa peguarä vae. Jare opaete mbaembae oñeñono tee Tumpa peguarä vae oï Selomit jare jëtara reta ipo pe.

²⁹ Izhar iñemuña reta güi, mburuvicha jare oporojäa vae reta jae Quenanías jare taɨ reta, kuae reta oyemoambeko tupao güi ikatu pe opaete mbae nunga teko re Israel pe vae.

³⁰ Hebrón iñemuña reta güi ñogüɨnoi omae vaerä Israel re Jordán güi kuaraɨ oikea kotɨ vae jae Hasabías jare jëtara reta; omae reta opaete mbaravɨkɨ oyeapo yandeYa pe vae re jare mburuvicha guasu pe vae re. Opaete reve mil seteciento kuimbae jëia vae reta.

³¹ Cuarenta año ma David oiko mburuvicha guasurä yave, oyeeka kavi tëtara reta Hebrón iñemuña reta yave, oñeväe ipɨte pe kuimbae jëia yae vae reta tëta Jazer, ɨvɨ Galaad pe. Jae ko Jerías Hebrón iñemuña reta juvicha.

³² Jëtara reta ndive kuimbae jëia yae vae reta, oyepapa dos mil seteciento tenondegua tëtara reta pe vae. Mburuvicha guasu David ombojee oyangareko vaerä Rubén jare Gad iñemuña reta re, jare Manasés iñemuña reta oyemboyaogüe re vae, jare opaete mbaravɨkɨ oyeapo Tumpa pe vae re jare mburuvicha guasu pe vae re.