1 CRÓNICAS 24 - Biblia Guarani Tumpa Iñee

¹ Aarón iñemuña reta opa vi oyemboyao yao sacerdote mbaravɨkɨ peguarä. Aarón taɨ reta jae ko: Nadab, Abiú, Eleazar jare Itamar.

² Ërei Nadab jare Abiú omano reta tu güi tenonde; omano reta taɨmbae ramo, Eleazar jare Itamar oyapo reta sacerdote mbaravɨkɨ.

³ Sadoc, Eleazar iñemuña jare Ahimelec, Itamar iñemuña omborɨ reta David omboyao yao jëtara reta mbaravɨkɨ peguarä.

⁴ Ërei oikuaa Eleazar iñemuña pegua kuimbae reta jeta yae Itamar iñemuña reta güi; omboyao reta jare opɨta diecisei mburuvicha Eleazar iñemuña pegua, jare juri Itamar iñemuña pegua.

⁵ Omboyao reta chupe mbaravɨkɨ suerte rupi, echa Eleazar iñemuña reta jare Itamar iñemuña reta pe oime mburuvicha reta mbaemboetea pegua, Tumpa jo pegua.

⁶ Javoi ombaekuatía vae levita Semaías, Natanael taɨ oikuatía jae reta jee mburuvicha guasu jare mburuvicha reta jóvai, jare sacerdote Sadoc, Ahimelec, Abiatar taɨ jóvai, jare tëtara reta sacerdote pegua itenondegua reta jare levita itenondegua reta jóvai. Mbaravɨkɨ peguarä suerte oyeekɨ vae, mókoi Eleazar iñemuña reta peguarä jare metei Itamar iñemuña reta peguarä.

^7-18 Oyeapo yave suerte oyemboyao opɨta tenondegua güive veinticuatroa pe vae jae: Joiarib Jedaías Harim Seorim Malquías Mijamín Cos Abías Jesúa Secanías Eliasib Jaquim Hupa Jesebeab Bilga Imer Hezir Afses Petaías Hezequiel Jaquín Gamul Delaía Maazías

¹⁹ Körai oyemboyao mbaravɨkɨ oyeapo vaerä tupao pe, yandeYa Israel iTumpa omee rami mborookuai iñemuñagüe Aarón pe vae.

²⁰ Leví iñemuña reta oataño vae jae: Subael, Amram iñemuña; Jehedías, Subael iñemuña;

²¹ tenondegua Isías, Rehabías iñemuña;

²² Selomot, Izhar iñemuña; Jahat, Selomot iñemuña;

²³ Hebrón iñemuña reta güi: Tenondegua jae Jerías; mokoía jae Amarías, mboapɨa jae Jahaziel jare irundɨa jae Jecamán.

²⁴ Ñogüɨnoi vi Micaía, Uziel taɨ; Samir, Micaía taɨ;

²⁵ Isías, Micaía tɨvɨ; Zacarías, Isías taɨ;

²⁶ Merari taɨ reta: Mahli jare Musi; jare Beno, Jaazías taɨ.

²⁷ Merari iñemuña reta taɨ Jaazías rupi vae jae: Beno, Soham, Zacur jare Ibri;

²⁸ jare Mahli rupi vae jae Eleazar, jae ko taɨmbae vae;

²⁹ jare Jerameel, Cis taɨ;

³⁰ Musi taɨ reta, Mahli, Edar jare Jerimot. Jae kuae Leví iñemuña reta pegua tëtara ñavo rupi vae.

³¹ Jae reta omboyao vi suerte rupi jëtara reta pe, tenondegua reta pe jare tenondeguambae reta pe, jëtara Aarón iñemuña reta oyapo rami, mburuvicha guasu David jare sacerdote Sadoc jóvai, Ahimelec jare tëtara reta sacerdote pegua itenondegua reta jare levita itenondegua reta jóvai.