1 CRÓNICAS 23 - Biblia Guarani Tumpa Iñee

Levita reta mbae oyapota vae regua

¹ David indechi yae ma yave omboguapɨ taɨ Salomón mburuvicha guasurä Israel pe,

² omboatɨ opaete Israel pe tenondegua vae, sacerdote reta jare levita reta.

³ Levita reta oyepapa treinta año vae güi tenonde vae, oupitɨ, treinta y ocho mil kuimbae.

⁴ Kuae reta güi oyembojee omae vaerä mbaravɨkɨ tupao pegua re vae, oupitɨ veinticuatro mil, jare seis mil mburuvicharä jare oporojäa reta vaerä vi,

⁵ cuatro mil öke iyangarekoa jare ïru cuatro mil omee vaerä mbaemboete yandeYa pe temimbɨ tairari pegua David oyapouka vae pe.

⁶ David omboyao Leví taɨ ñogüɨnoi rupi kavi, jae ko: Gersón, Coat jare Merari.

⁷ Gersón taɨ reta jae: Laadán jare Simei.

⁸ Laadán taɨ reta mboapɨ, jae ko: Jehiel jae tenondegua, Zetam jare Joel jae taɨkuegua reta.

⁹ Simei taɨ reta mboapɨ vi, jae ko: Selomit, Haziel jare Harán. Kuae reta jae ko Laadán iñemuña jëtara reta itenondegua.

¹⁰ Simei taɨ reta irundɨ, jae ko: Jahat, Ziza, Jeús jare Bería.

¹¹ Tenondegua jae Jahat, taɨkuegua jae Ziza; ërei Jeús jare Bería mbaetɨ jeta imichia ramo oyepapa metei tëtara ramiño.

¹² Coat taɨ reta irundɨ jae ko: Amram, Izhar, Hebrón jare Uziel.

¹³ Amram taɨ reta jae Aarón jare Moisés. Tumpa oiparavo Aarón omee vaerä mbota reta oñeñono tee kavi yae vae, oapɨ vaerä ikäti kavi vae incienso yandeYa jóvai, oyeokuai vaerä jare jei avei vaerä ñee kavi, mbaravɨkɨ oyapo vaerä Aarón jare taɨ reta jekuae avei pegua.

¹⁴ Moisés Tumpa jembiokuai jare iñemuña reta vi omboyea Leví iñemuña reta ndive.

¹⁵ Moisés taɨ reta jae: Gersón jare Eliezer.

¹⁶ Gersón taɨ reta güi tenondegua jae Sebuel.

¹⁷ Eliezer taɨ tenondegua jae Rehabías javoi mbaetɨ ye taɨ; ërei Rehabías jeta taɨ.

¹⁸ Izhar taɨ tenondegua jae Selomit.

¹⁹ Hebrón taɨ reta jae ko: Jerías jae tenondegua, Amarías jae taɨkuegua, Jahaziel jae mboapɨa, jare Jecamán jae irundɨa.

²⁰ Uziel taɨ reta jae ko: Micaías jae tenondegua, Isías jae taɨkuegua.

²¹ Merari taɨ reta jae ko: Mahli jare Musi. Mahli taɨ reta jae Eleazar jare Cis.

²² Eleazar omano güɨnoimbae reve taɨ; jaeño güɨnoi tayɨ reta, kuae reta opa omenda itutɨ reta ndive, jae ko Cis taɨ reta.

²³ Musi taɨ reta mboapɨ, jae: Mahli, Edar jare Jeremot.

²⁴ Jae ko kuae Leví iñemuña reta, tëtara ñavo rupi oñemoapɨta jee rupi ñogüɨnoi, tëtara itenondegua ñavo veinte año güi tenonde, kuae reta oyapo tupao pegua mbaravɨkɨ.

²⁵ Echa David yepe jei: “YandeYa Israel iTumpa omee oiko pɨagüive vaerä tëta imbae vae jare ombojee Jerusalén pɨpe oiko vaerä jekuae avei pegua.

²⁶ Jáeramo levita reta ngaraa ma güɨroyakavo ye tupao guakapi pegua ani tembiporu reta Tumpa iparavɨkɨ pegua vae.”

²⁷ Jökorai David iyemongeta omboapɨ vae pe oyeapo Leví iñemuña reta oyepapa vaerä veinte año güi ɨvate,

²⁸ jare yogüɨreko sacerdote Aarón taɨ reta jeia re mbaravɨkɨ Tumpa jo pegua pe, joka pe ani cuarto reta rupi jare yetɨo opaete tembiporu oñeñono tee vae re, jökorai vi opaete ïru mbaravɨkɨ tupao pegua.

²⁹ Ñogüɨnoi vi oyangareko vaerä mbɨyape mbaemboete pegua oyemboyoarambo kavi vae re, trigokúi re, mbota temitɨ jäɨgüe re, mbɨyape ipïreriasɨ oyembovumbae re, mbota mbɨyape oyɨ takɨpe pe vae re, mbɨyape oyeapegüe re jare opaete mbaejäaka re.

³⁰ Jare ndeimbove ñavo ñogüɨnoi vaerä tupao pe jökoraiño vi kaaru yave omee reta vaerä yasoropai jare mbaemboete yandeYa pe,

³¹ jare oñemee yave mɨmba oyeyuka opaetei oyeapɨ vae yandeYa pe ara mbutuu pe, yasɨ pɨau pe jare arete ikavigüe pe, oime aveita oyeokuai reta yandeYa pe oyepapa jókuae peguarä vae rupi.

³² Güɨnoi reta vi ipo pe oyangareko vaerä tupao guakapi pegua yemboatɨ renda re, jare o mbaemboetea pegua re; omborɨ reta tupao pe jëtara reta, Aarón iñemuña reta.