1 CRÓNICAS 22 - Biblia Guarani Tumpa Iñee

¹ Jáeramo jei David: “Kuae pe oïta yandeYa Tumpa jo, jare kuae pe mɨmba oyeyuka oyeapɨ jese vae, mɨmba oyeyukagüe opaetei oyeapɨ vae Israel peguarä.”

Yupavo tupao peguarä

² Javoi David oyókuai ketɨgua reta yogüɨreko ɨvɨ Israel pe vae oyemboatɨ vaerä, jare chugüi reta ombojee oñopa vaerä ita tupao oñemopüa vae peguarä.

³ Oyapo vi jeta öke ikutuarä jiero pegua, jare omboya oyoe pɨpe vaerä; omboatɨ vi jeta yeyé jiero iyu vae jare ɨvɨra ɨ̈vɨrare yaipapa rapembae,

⁴ echa Sidón jare Tiro pegua reta güeru jeta ɨvɨra ɨ̈vɨrare.

⁵ David jei ipɨa pe: “Cheraɨ Salomón ndei yae vɨteri, tupao omopüata cheYa pe vae ko tuicha yae vaerä jare jërakua yae vaerä opaete ɨvɨ rupi; jayave tayapo kavi opaete taeya chupe.” Jáeramo David jeta mbaembae oyapo kavi ndei omano mbove.

⁶ Jaɨkue rupi David oenɨi taɨ Salomón, jare oyókuai omopüa vaerä kuri yandeYa, Israel iTumpa jo,

⁷ jei: “Cheraɨ, che ayemongeta tëi amopüa vaerä yandeYa jorä.

⁸ Ërei yandeYa jei cheve: ‘Aecha jeta yae reporoyuka jare jeta yae reyapo ñoraro; jáeramo nde mbaetɨta remopüa cheve metei o.

⁹ Ërei renoita kuri nderaɨ mbɨakatu jee vae, echa che ameeta chupe opaete jovaicho ketɨ rupigua ipɨakatu vaerä. Jáeramo jeeta Salomón. Jae iara pe omeeta mbɨakatu jare yogüɨreko pɨagüive vaerä Israel.

¹⁰ Jae omopüata o cheree re. Jare jae oïta cheraɨrä jare che aïta turä, jare iporookuaía amoañeteta Israel pe jekuae avei pegua.’

¹¹ Añave cheraɨ, yandeYa toï nde ndive reupitɨ regua ara remopüa o yandeYa neTumpa pe, jae güɨrökuavee nde reyapota vae rami.

¹² YandeYa tomee ndeve ndepɨarakuaa yae vaerä, reporookuai ma yave Israel re reyapo vaerä yandeYa Tumpa iporookuai reta.

¹³ Opaete oë kavita ndeve reyapo yave mborookuai reta jeigüe yandeYa oyókuai Moisés Israel peguarä vae. ¡Eñemoäta ngatu agüɨye eyembopɨtu agüɨye ekɨɨye!

¹⁴ Mase, che opaete chepɨa ndive añono kavi yandeYa jo oñemopüa yave vae peguarä tres mil tresciento tonelada oro pegua, treinta y tres mil tonelada korepoti pegua, jare jeta yeyé jiero iyu vae pegua jare jiero mbaetɨ yandepuere yaipapa vae. Ayapokatu vi ɨvɨra jare ita, nde remoïru yeta kuri.

^15-16 Oime vi renoi jeta kuimbae oïndaivi oyapo vaerä mbaravɨkɨ vae, oñopa vaerä ita, o omopüa vae reta, oikatu oparavɨkɨ ɨvɨra pe vae, jare jeta ïru oikatu oyapo oipotagüe mbaravɨkɨ vae oro pegua, korepoti pegua, jiero iyu vae jare jiero pegua. Jayave ¡mbaravɨkɨ oï ndepo pe yandeYa tandemborɨ!”

¹⁷ Javoi David oyókuai opaete Israel pe tenondegua vae reta omborɨ vaerä taɨ Salomón, jei:

¹⁸ “YandeYa peTumpa oiko pe ndive vae omee peve mbɨakatu opaete kerupi, jae omee chepo pe opaete kuae ɨvɨ pe yogüɨreko vae reta, jare kuae reta yogüɨreko yandeYa jeia re jare imbae vae reta jeia re.

¹⁹ Jáeramo, peñemoäta ngatu peeka yandeYa Tumpa. Jayave peïndaivi pemopüa vaerä o mbaemboete pegua Tumpa yandeYa pe, yaroyakavo vaerä käjou morogüɨrökuavee päve pegua Tumpa imbae jare tembiporu reta oñeñono tee tupao pe Tumpa peguarä vae oñemopüata yandeYa peguarä.”