1 CRÓNICAS 20 - Biblia Guarani Tumpa Iñee

David opɨ̈ro tëta Rabá

¹ Ërei jókuae año ou ye vae re, mburuvicha guasu reta iñoraro iara pe, Joab güɨraja sundaro reta jëia yae vae, jare opa oporomokañɨtei reta Amón iñemuña reta iɨvɨ pe, jare tëta Rabá opa oñova jare omboai. Ërei David opɨtaño Jerusalén pe.

² Jaɨkue rupi David oipɨɨ äka-regua oro pegua, mburuvicha guasu Rabá pegua iñäka güi ita jepɨ vae güɨnoi vae, ipoɨgüe güɨnoi treinta y tres kilo; jare oñono reta David iñäka re. David güɨnoe vi jeta mbaembae jepɨ vae jókuae tëta guasu güi,

³ jare oimeño jembɨre pɨpe vae reta opa vi güɨnoe güɨraja omombaravɨkɨ siera pe, mbae oyembopiriri pɨpe vae jiero pegua pe jare yɨɨ pe. Jökoraiño vi David oyapo opaete Amón iñemuña reta jëta guasu reta. Javoi oyerova ye opaete isundaro reta ndive Jerusalén kotɨ.

David isundaro reta oyuka kuimbae ipukugüe reta

⁴ Kuae jaɨkue rupi oiko ñoraro Gezer pe filisteo reta ndive. Jókuae ñeraro pe Sibecai Husaɨgua oyuka Sipai, jae ko kuimbae ipuku vae reta iñemuña. Jare omomichi filisteo reta.

⁵ Jare oime ye ñeraro filisteo reta ndive, jayave Elhanán, Jair taɨ oyuka Lahmi, Goliat, Gat pegua tɨvɨ, jókuae kuimbae imii iɨ ipoguasu, ɨvɨra asoya oyeapo jese vae ipoguasu rami.

⁶ Jekuae oime ye ñeraro Gat pe. Joko pe oiko metei kuimbae ipuku yae vae, ipo ñavo ova ipoäka jare ipɨ ñavo ova vi ipɨ̈sa, opaete reve veinticuatro. Jae ko kuimbae ipuku vae reta iñemuña vi.

⁷ Kuae kuimbae iñee jasɨ katu Israel iñemuña reta kotɨ, ërei Jonatán oyuka. Kuae Jonatán jae ko Simea, David tɨkeɨ taɨ.

⁸ Kuae kuimbae ipuku yae vae reta jae ko Gat pegua ipuku vae reta iñemuña, ërei opa oyeyukauka reta David pe jare isundaro reta pe.