1 CRÓNICAS 19 - Biblia Guarani Tumpa Iñee

David omoamɨri Amón-ɨgua reta jare Siriaɨgua reta

¹ Kuaekuae reta jaɨkue rupi omano Nahas, Amón iñemuña reta juvicha guasu, jare taɨ oguapɨ jekovia pe mburuvicha guasurä.

² Jayave David jei: “Tamboyekuaa cheporoparareko Hanún, Nahas taɨ re, echa tu ipɨakavi cheve.” Jare David omondo jekovia pe kuimbae reta imiari vae ombopɨakatu vaerä Hanún, tu imano re. Ërei opa ma yogüɨraja oväe Amón iñemuña reta iɨvɨ pe yave,

³ Amón iñemuña reta juvicha reta jei Hanún pe: “¿Rerovia pa David ombou kuae reta omboete nderu ramo, ndembopɨakatu vaerä nderu imano re? ¡Ombou ko oipïaro jare omae reta jare oikuaa vaerä kërai ko kuae ɨvɨ vae!”

⁴ Jayave Hanún oipɨɨuka jókuae mburuvicha reta David ombou vae, jare opa oñapiasɨ jare oyasɨa jemimonde chugüi reta jevi rupi, jare opa ye omondo reta.

⁵ David pe omombeu reta jókuae kuimbae reta ndive oasa vae yave, jae omondo oövaitiuka reta, echa imara yae reta, jare oyókuai opɨta reta vaerä Jericó pe jañɨka-raa okuakuaa ye regua, jayave ramo yogüeru ye vaerä.

⁶ Jare Amón iñemuña reta oikuaa oñemotareɨuka yae David pe ramo, mburuvicha Hanún jare Amón iñemuña reta omboepɨ treinta y tres mil kilo korepoti pe, güeru vaerä käretou ñeraro pegua jare jeta kavayu regua sundaro reta Mesopotamia pegua, Siria pegua, Maaca pegua jare Soba pegua,

⁷ jare opaete reve güeru reta treinta y dos mil käretou ñeraro pegua, jare mburuvicha guasu Maaca pegua isundaro reta ndive. Kuae reta yogüeru oyembojeyupa Medeba jóvai, jare Amón iñemuña reta ñogüɨnoe vi jëta güi oñeraro reta vaerä.

⁸ Ërei David oikuaa yave omondo Joab opaete isundaro jëiagüe ndive.

⁹ Amón iñemuña reta oyeapo kavi ñeraro peguarä tëta guasu jöke pe. Mburuvicha guasu reta yogüeru kuae ñeraroa pe vae ñogüɨnoi kaa peño.

¹⁰ Joab oecha oporepeña jese jóvai kotɨ güi jare jaɨkue kotɨ güi yave, oiparavo Israel iñemuña reta güi sundaro jëia yae vae jare oyeapo katu oñeraro reta vaerä Siriaɨgua reta ndive.

¹¹ Javoi, ïru kuimbae reta oñono tɨvɨ Abisai ipo pe, jare oyeapo katu oñeraro vaerä Amón iñemuña reta ndive,

¹² jare jei: “Siriaɨgua reta reecha jëia chegüi yave, nde eyu chemborɨ, jare Amón iñemuña reta aecha jëia ndegüi yave, che romborɨta.

¹³ Eñemoäta ngatu, ñañoraro yaepɨ vaerä ñanerëtaguasu jare tëta guasu reta yandeYa Tumpa imbae. ¡Jare yandeYa toyapo jaekavi chupe vae!”

¹⁴ Joab oporepeña isundaro reta ndive Siriaɨgua reta re, ërei kuae reta opa otekuarai chugüi.

¹⁵ Jare Amón iñemuña reta oecha yave opa otekuarai Siriaɨgua reta, jae reta otekuarai vi Abisai, Joab tɨvɨ güi, opa oike reta tëta guasu pe. Jayave Joab oyerova ye Jerusalén kotɨ.

¹⁶ Siriaɨgua reta oecha oñemoamɨriuka Israel pegua reta pe yave, omondo jekovia pe kuimbae reta imiari vaerä, jare güeru vaerä ïru Siriaɨgua reta yogüɨreko ɨ̈aka Éufrates jovaicho pe vae. Sofac jae ko mburuvicha Hadad-ezer isundaro reta itenondegua ete joko pe.

¹⁷ Kuae David oikuaa yave, omboatɨ opaete Israel iñemuña reta, jare oasa ɨ̈aka Jordán, oyeapo katu chupe reta. Jare David opa güire oyeapo kavi reta yave, Siriaɨgua reta ñogüɨnoe oñeraro jae ndive,

¹⁸ ërei Siriaɨgua reta otekuarai Israel iñemuña reta güi, jare David oyuka siete mil kuimbae käretou pegua reta jare cuarenta mil ɨvɨ rupigua. David oyuka vi Sofac sundaro reta itenondegua ete.

¹⁹ Hadad-ezer iyɨvɨrigua reta oecha oñemoamɨriuka Israel iñemuña reta pe yave, oyapo reta mbɨakatu David ndive, jare yogüɨreko reta jae jeia re. Jayave güive Siriaɨgua mbaetɨ ye ma oipota omborɨ Amón iñemuña reta.