1 CRÓNICAS 15 - Biblia Guarani Tumpa Iñee

David güɨroyakavo Tumpa ikäjou Jerusalén pe

¹ David omopüauka o iyeupe tëta David Jëta guasu jee vae pe, jare oñono kavi Tumpa ikäjou jendarä, omopüa chupe o guakapi pegua.

² Jayave jae jei: “Levita reta güi mbaetɨ yé kia güɨrajata Tumpa ikäjou, echa yandeYa oiparavo jae reta güɨraja vaerä yandeYa ikäjou jare oyeokuai avei vaerä chupe.”

³ Javoi David omboatɨ opaete Israel iñemuña reta Jerusalén pe, yandeYa ikäjou oyereroyakavo vaerä jókuae o omopüa chupea pe.

⁴ Omboatɨ vi Aarón iñemuña reta jare vi jëtara levita reta.

⁵ Coat iñemuña reta güi oyemboatɨ ciento veinte: Tenondegua Uriel jare jëtara reta.

⁶ Merari iñemuña reta güi oyemboatɨ dosciento veinte: Tenondegua Asaías jare jëtara reta.

⁷ Gersón iñemuña reta güi oyemboatɨ ciento treinta: Tenondegua Joel jare jëtara reta.

⁸ Elizafán iñemuña reta güi oyemboatɨ dosciento: Tenondegua Semaías jare jëtara reta.

⁹ Hebrón iñemuña reta güi oyemboatɨ ochenta: Tenondegua Eliel jare jëtara reta.

¹⁰ Uziel iñemuña reta güi oyemboatɨ ciento doce: Tenondegua Aminadab jare jëtara reta.

¹¹ Javoi David oenɨi sacerdote reta: Sadoc jare Abiatar, jare levita reta: Uriel, Asaías, Joel, Semaías, Eliel jare Aminadab,

¹² jare jei chupe reta: “Pe tenondeguarä peiko perëtara levita reta pe vae, opa peyetɨo perëtara reta ndive Tumpa jóvai, peroyakavo vaerä Israel iTumpa ikäjou jorä ayapoa pe;

¹³ echa tenonde yave mbaetɨ jökorai peyapo ramo yandeYa Tumpa güeru mano amogüe re, echa mbaetɨ yaparandu chupe këraita ko oyeapo vae re.”

¹⁴ Jökorai sacerdote reta jare levita reta oyetɨo Tumpa jóvai, güeru vaerä yandeYa Israel iTumpa ikäjou.

¹⁵ Javoi levita reta güɨroyakavo yandeYa Israel iTumpa ikäjou iyatiɨ re ɨvɨra re, Moisés oporookuai Tumpa jei vae rupi rami.

¹⁶ David oyókuai vi levita reta itenondegua reta ombojee vaerä jëtara reta güi otairari vae reta yogüɨraja vaerä jembiporu tairari pegua ndive: Ngitara, arpa jare platillo, jare ombopu reta vaerä oyerovia katu yae reve.

¹⁷ Levita reta ombojee Hemán, Joel taɨ, jare jëtara Asaf, Berequías taɨ; jare jëtara Merari iñemuña reta güi Etán, Cusaías taɨ;

¹⁸ ombojee vi ïru jëtara reta jaɨkue yogüɨraja vaerä Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías, jare öke iyangarekoa reta Obed-edom jare Jeiel.

¹⁹ Otairari vae Hemán, Asaf jare Etán ñogüɨnoi ombopuuka vaerä platillo reta jiero iyu vae pegua.

²⁰ Zacarías, Aziel, Semiramot, Jehiel, Uni, Eliab, Maasías jare Benaía güɨnoi reta ngitara ombopu vaerä ipu ipöi.

²¹ Jare Matatías, Elifelehu, Micnías, Obed-edom, Jeiel jare Azazías güɨnoi reta arpa ombopu vaerä ipu ipo guasu, omboɨpɨ vaerä tairari.

²² Jare Quenanías, levita reta pe tenondegua tairari pe vae, oyembojee oporombotairari vaerä, echa oikatu yae.

²³ Berequías jare Elcana jae ko Tumpa ikäjou jo jöke iyangarekoa.

²⁴ Jare sacerdote reta jae: Sebanías, Josafat, Natanael, Amasai, Zacarías, Benaía jare Eliezer omoñee reta mimbɨguasu Tumpa ikäjou jenonde vae reta. Obed-edom jare Jehías jae vi Tumpa ikäjou jo jöke iyangarekoa.

²⁵ Jayave David, jare Israel iñemuña itenondegua reta, jare sundaro ruvicha reta ndive yogüɨraja oyerovia reve güɨroyakavo vaerä yandeYa ikäjou morogüɨrökuavee päve pegua Obed-edom jo güi.

²⁶ Jare Tumpa omborɨ levita reta güɨraja Tumpa ikäjou ramo, oyuka reta Tumpa pe chiu toro taɨrusu vae jare chiu vecha kuimbae.

²⁷ David oyemonde ojo temimonde lino pegua pe, jökoraiño vi opaete levita Tumpa ikäjou güɨraja vae, jare otairari vae reta jare Quenanías oporombotairari vae; David omonde vi güɨraja temimonde iyɨvambae sacerdote pegua lino pegua.

²⁸ Jökorai opaete Israel iñemuña reta güɨraja Tumpa ikäjou morogüɨrökuavee päve pegua, jäsémbai oyerovia yae güi mimbɨ iñee ndive, mimbɨguasu, platillo reta, ngitara jare arpa reta ipu ndive.

²⁹ Ërei käjou morogüɨrökuavee päve pegua yandeYa imbae güeru güɨroväe reta David Jëta guasu pe yave, Mical, Saúl tayɨ omae vɨari ventana rupi yave, oecha mburuvicha guasu David güɨropo oyerovia yae reve, jare güɨröɨro ipɨa pe omae jese.