1 CRÓNICAS 14 - Biblia Guarani Tumpa Iñee

Hiram omondo jekovia pe kuimbae reta imiari vaerä David ndive

¹ Hiram, mburuvicha guasu Tiro pegua, omondo jekovia pe kuimbae reta imiari vaerä David ndive, jare o iyapoa reta jare oikatu oparavɨkɨ ɨvɨra pe vae reta, güɨraja reve ɨvɨra ɨ̈vɨrare omopüa vaerä metei o chupe.

² Jayave David oikuaa Tumpa ko omee chupe oiko vaerä mburuvicha guasurä Israel iñemuña reta pe vae, echa oecha ikavi yae opaete iporookuaía jëta Israel pe.

David taɨ reta oa Jerusalén pe vae

³ David güɨreko ye vi kuña reta Jerusalén pe, jare güɨnoi ye ïru taɨ reta jare tayɨ reta.

⁴ Jerusalén pe oa chupe vae reta jae jee: Samúa, Sobab, Natán, Salomón,

⁵ Ibhar, Elisúa, Elpelet,

⁶ Noga, Nefeg, Jafía,

⁷ Elisama, Beeliada jare Elifelet.

David omoamɨri filisteo reta

⁸ Filisteo reta oikuaa David oyeparavo mburuvicha guasurä Israel pe yave, yogüɨraja opaete oeka David; ërei David oikuaa yave kuae, oë chupe reta.

⁹ Jayave yogüeru filisteo reta opa oñemoai ɨvɨtɨ päu ipe kavi vae rupi Refaim pe.

¹⁰ Jayave David oparandu yandeYa pe, jei: —¿Aëta pa añoraro filisteo reta ndive? ¿Remoamɨriuka retata pa cheve? Jare yandeYa jei chupe: —Eë chupe, echa ameeta ndepo pe, remoamɨri reta vaerä.

¹¹ Jayave yogüɨraja Baal-perazim kotɨ, joko pe David omoamɨri filisteo reta, jare jei: “Ɨ ipɨ̈rata vae rami Tumpa oipea cheve cherovaicho reta.” Jáeramo ombojee reta jókuae oñeraroa Baal-perazim.

¹² Jare filisteo reta opa omombo oeya itumpa-raanga reta, jare David opa oapɨuka.

¹³ Ërei filisteo reta jekuae yogüeru ye ñogüɨnoi ɨvɨtɨ päu ipe kavi vae rupi Refaim pe.

¹⁴ Jayave David jekuae oparandu ye Tumpa pe, jare Tumpa jei chupe: —Agüɨye eporepeña jóvai kotɨ rupi jese reta, ekua ikupe kotɨ rupi chupe reta, ɨvɨra iyaɨsɨ vae reta jenda re katu eë chupe reta.

¹⁵ Javoi reendu ɨvɨra reta jäka jɨapu vae yave, eë chupe reta, echa che ajata nderenonde amoamɨri vaerä sundaro filisteo reta.

¹⁶ David oyapo Tumpa jei chupe rami, jare omoamɨri filisteo reta Gabaón güive Gezer pe.

¹⁷ Jare David jërakua yae opaete ɨvɨ rupi; jare yandeYa omee opaete tëtaguasu reta okɨɨye yae vaerä David güi.