1 CRÓNICAS 13 - Biblia Guarani Tumpa Iñee

David oyemongeta güɨroyakavo vaerä Tumpa ikäjou Jerusalén pe

¹ Jayave David oparandu sundaro ruvicha reta pe, jeta vae reta juvicha reta pe jare opaete tenondegua reta pe,

² javoi jei vi opaete vae Israel iñemuña reta pe: “Jaekavi ko peve yave, jare yandeYa Tumpa jemimbota ko yave, yamondo ñee opaete ɨvɨ Israel pe oñemoai ñogüɨnoi ñanerëtara vae reta pe, jare vi sacerdote reta jare levita reta ñogüɨnoi jëta rupi jare mɨmba ikarúa rupi jae reta ndive vae pe, yaparea oñemoïru vaerä yande ndive,

³ yaru vaerä yandeRu Tumpa ikäjou yandeyeupe, echa Saúl oiko yave güive ma ñaneakañɨ yaiko chugüi.”

⁴ Jare opaete vae reta jei oyeapo vaerä jökorai, echa jaekavi chupe reta.

David güɨraja tëi Tumpa ikäjou

⁵ Jayave David omboatɨ opaete Israel iñemuña reta Sihor güive jae ko Egipto jembeɨ, Hamat pe yaikea kotɨgua reta, oyereraja vaerä Quiriat-jearim güi Tumpa ikäjou,

⁶ javoi, opaete vae yogüɨraja David ndive Quiriat-jearim pe, jae vi jee Baala, Judá pe oï vae, güɨroyakavo vaerä joko güi Tumpa ikäjou, jese jee oyemboete vae, araɨgua reta ipäu pe oiko vae.

⁷ Güɨraja reta Tumpa ikäjou metei käretou ipɨau vae pe Abinadab jo güi. Uza jare Ahío güɨroata käretou.

⁸ Jare David opaete Israel iñemuña reta ndive oyerovia reve yogüɨraja Tumpa ikäjou jenonde, otairari jare täta opɨrae reta arpa ipu rupi, ngitara, tambora raɨ, angúa raɨ, platillo jare mimbɨguasu iñee rupi.

⁹ Ërei yogüeru oväe Quidón ombaembopiriría pe yave, Uza ipóyai oyoko vaerä Tumpa ikäjou, echa güeye reta ipɨ̈sa-yeyuka.

¹⁰ Jare yandeYa iyarasɨ Uza kotɨ ipóyai Tumpa ikäjou kotɨ vae re, jare joko pe voi omano Tumpa jóvai.

¹¹ Jare David ipɨatɨtɨ yae, echa yandeYa ombou mano Uza re. Jáeramo jókuae ombojee Pérez-uza, jökorai jee añave regua.

¹² Jare David okɨɨye yae Tumpa güi jókuae ara jare jei: “¡Araja rapeä yepe Tumpa ikäjou chero pe!”

¹³ Jare mbaetɨ güɨraja Tumpa ikäjou David jëta pe, jaeño oporookuai oeya vaerä Obed-edom jo pe, jae ko metei kuimbae Gat iñemuña.

¹⁴ Jare Tumpa ikäjou opɨta Obed-edom jo pe mboapɨ yasɨ, jare yandeYa iporerekua Obed-edom jo pegua reta re jare opaete imbaembae re.