1 Corintios 8 - Biblia Guarani Tumpa Iñee

Soo oñemee tumpa-raanga reta pe vae

¹ Jókuae soo oñemee tumpa-raanga reta pe vae regua, opaete vae yaikuaa ko. Yaikuaa vae, yandemboyemboete ko, ërei mboroaɨu ñañemomɨ̈rata ko.

² Kia nunga vae ipɨa pe oikuaa yae ko iyeupe vae, oikuaaä vɨteriño ko mbae oikuaata tëi vae.

³ Ërei kia nunga vae oaɨu Tumpa vae, Tumpa oikuaa jókuae nunga.

⁴ Jayave soo oñemee tumpa-raanga reta pe vae, yaikuaa ko tumpa-raanga mbaeä etei kuae ɨvɨ pe. Jare yaikuaa Tumpa meteiño ko.

⁵ Yepe tëi oime amogüe oyembojee tumpa reta pe, ara pe ani ɨvɨ pe (jeta ko jókuae nunga tumpa reta, jare jeta vi ko ɨvɨ pegua mbae iya reta).

⁶ Ërei ngatu yandevegua meteiño ko Tumpa. Jae ko yandeRu. Jae oyapo opaete mbaembae, jare yande yaiko chupeguarä. Jare meteiño yandeYa Jesucristo. Jae oyapo opaete mbaembae, jare omee yandeve tekove.

⁷ Ërei oime amogüe kuae regua oikuaambae vae. Echa jae reta omboete yepi tumpa-raanga reta, jare soo jou yave oyemongeta tumpa-raanga reta pe oñemeegüe ko. Jáeramo jou yave, oyemongeta ikavimbae ko oyapo oï. Echa mbaetɨ ipɨ̈rata iporogüɨrovia pe.

⁸ Echa yau vae rupiä ko Tumpa yandemboresive. Echa yau vae mbaetɨ yandembokavi ani yaumbae vae mbaetɨ vi ñanemopɨ̈chɨi.

⁹ Ërei peyeandu agüɨye vaerä jókuae peu vae rupi pembogüɨapiuka mbaetɨ ipɨ̈rata iporogüɨrovia pe vae.

¹⁰ Echa güɨramoi amogüe ndererovia katu vae ndereecha reguapɨ reï tumpa-raanga oïa pe yave, güɨramoi jae mbaetɨ ipɨ̈rata iporogüɨrovia pe yave remokɨ̈reɨta jou vaerä soo oñemee tumpa-raanga reta pe.

¹¹ Jare nde ndearakuaa rupi kavi reï joko pe vae rupi okañɨta mbaetɨ ipɨ̈rata iporogüɨrovia pe vae, jese Cristo omano vae.

¹² Jáeramo jökorai peyoa mbaetɨ ipɨ̈rata iporogüɨrovia pe vae kotɨ vae rupi, peyoa Cristo kotɨ.

¹³ Jayave, mbae jau vae rupi oporogüɨrovia vae ambogüɨapiuka yave, soo ave ngaraa etei jau, agüɨye vaerä ambogüɨapi ïru oporogüɨrovia vae.