1 Corintios 3 - Biblia Guarani Tumpa Iñee

Tumpa pe oyeokuai vae reta

¹ Cherɨvɨ reta, jáeramo mbaetɨ chepuere pomomiari Espíritu Santo ipɨa pe oiko vae reta rami. Pomomiarita ko jeigüe rupiño yogüɨreko vae reta rami, oporogüɨrovia ramo vae reta rami.

² Amee ko peve michia necheño jou vae rami, mbaetɨ tembíu okuakuaagüe jou vae rami. Echa mbaetɨ vɨteri pepuere jare mbaetɨñota pepuere.

³ Echa jekuaeño peiko pe peregüe reño. Echa jekuaeño peñemoägüɨro oyoe, peñoraro jare peyoambotaä ¿jaeä pa jókuae jeigüe reño oiko vae?, jare ¿oipotagüe kuimbae ramiño?

⁴ Echa amogüe pe reta pere: “Che añetete ko aï Pablo ndive.” Amogüe jei: “Che ko aï Apolos ndive.” ¿Jaeä pa jókuae jeigüe reño oiko vae?

⁵ Pablo jare Apolos mbaeä ko. Ore reta ko royeokuai vaeño, orerupi peporogüɨrovia vaerä. Royapo ko mbaravɨkɨ metei ñavo yandeYa omee oreve rupi.

⁶ Che amaetɨ, Apolos omboɨu, ërei Tumpa etei ko ombokuakuaa temitɨ.

⁷ Jáeramo omaetɨ vae ani omboɨu vae mbaeä ko, jaeño ko Tumpa temitɨ ombokuakuaa vae.

⁸ Omaetɨ vae jare omboɨu vae oyovakeño ko. Yepe tëi Tumpa omboekoviata metei ñavo pe iparavɨkɨ oï rupi.

⁹ Echa ore ko roparavɨkɨ Tumpa ndive vae. Pe reta ko jae temitɨ Tumpa iko pegua rami, jare metei o Tumpa omopüa oï vae rami.

¹⁰ Che ko jae ipoki o oyapo vae rami. Tumpa ipɨakavi rupi omee cheve añono vaerä o iguapɨkarä. Jare ïru vae ko jae omopüa oï o iguapɨka iárambo vae rami. Ërei metei ñavo tomae kavi kërai omopüa vaerä o iguapɨka iárambo.

¹¹ Mbaetɨ kia ipuere oñono ïru o iguapɨka oñeñono ma vae güi. Jae ko Jesucristo.

¹² Kia omopüa yave o iguapɨka iárambo oro, korepoti, ita ipöra yae vae, ɨvɨra, kapii ani atiɨgüe;

¹³ metei ñavo vae iparavɨkɨ oyekuaata ko tata rupi morojäa iara pe, echa tata oechaukata mbae nunga mbaravɨkɨ oyapo metei ñavo vae.

¹⁴ O iguapɨka iárambo kia nunga vae omopüa vae mbaetɨ ókai yave, jekoviata chupe jókuae.

¹⁵ Ërei amogüe vae iparavɨkɨ ókai yave, mbaetɨ eteita jekovia chupe; ërei oyemboasaukata metei kuimbae ojoyepe tata güi vae rami.

¹⁶ ¿Mbaetɨ pa peikuaa pe reta ko jae Tumpa jo jare Tumpa iEspíritu oiko pepɨa pe vae?

¹⁷ Kia nunga vae omboai Tumpa jo vae, Tumpa omboaita vi. Echa pe reta Tumpa jo oñeñono tee vae ko.

¹⁸ Agüɨye kia ave toyembotavɨ. Oime yave kia oyemongeta iyarakuaa katu ko arakuaa ɨvɨ pegua pe vae, toyeapo yarakuaambae rami, jökorai iyarakuaa katu yae vaerä.

¹⁹ Echa Tumpa pe arakuaa kuae ɨvɨ pegua arakuaaä ko. Echa oyekuatía oï körai: “Tumpa oipɨɨ iyarakuaa vae reta jeko pe aeño.”

²⁰ Jare: “YandeYa oikuaa iyarakuaa katu vae reta iyemongeta, oipotagüeño ko oyemongeta reta vae.”

²¹ Jáeramo agüɨye kia toyemboete kuimbae reta re. Echa opaete mbaembae pembae ko:

²² Pablo, Apolos, Cefas, ɨvɨ, tekove, mano, añave oyeapo vae jare opaete oyeapota vae, opaete pembae ko.

²³ Jare pe reta ko jae Cristo imbae, jare Cristo ko jae Tumpa imbae.