1 Corintios 16 - Biblia Guarani Tumpa Iñee

Korepoti oyemboatɨ oporogüɨrovia vae peguarä

¹ Korepoti oyemboatɨ oporogüɨrovia vae peguarä vae peyapo Galacia pegua oporogüɨrovia vae reta ayókuai oyapo vaerä rami.

² Tenondegua ara semana iyɨpɨ ñavo pe, metei ñavo peñovatu penoi rupi; peñovatu, agüɨye vaerä pemboatɨ che aja yave ramo.

³ Jare che aja aväe pépɨri yave, ameeta tupapire reta peiparavo vae reta pe güɨraja vaerä mbota pemeegüe Jerusalén pe.

⁴ Jare jaekavi che vi aja vaerä yave, jae reta yogüɨrajata cherupíe.

Pablo iyemongeta reta

⁵ Jare che ajata pépɨri, Macedonia rupi aasa yave. Echa aasata ko Macedonia rupi.

⁶ Jare güɨramoi apɨtata pe reta ndive. Güɨramoi apɨtata pépɨri amboasa opaete iroɨ guasu iara reta, pe reta chemborɨ vaerä aja ketɨ ajataa pe.

⁷ Mbaetɨ aipota poecha michi peguaño, aipota apɨta pépɨri ɨma pegua, yandeYa oipota yave.

⁸ Ërei apɨtata kuae Efeso pe Pentecostés ara ou oväe regua.

⁹ Echa öke oyepea cheve ayapo vaerä yandeYa iparavɨkɨ, yepe tëi oime jeta oyovaicho cheré vae.

¹⁰ Ërei Timoteo ojo oväe pépɨri yave, pemae kavi jese, ipɨagüive oï vaerä pepɨte pe, echa jae vi oparavɨkɨ yandeYa pe, che rami.

¹¹ Jáeramo agüɨye kia togüɨröɨro. Ërei outa yave chekotɨ, pemborɨ ou vaerä chekotɨ ipɨakatu reve echa aipota jae ou vaerä chépɨri ïru yanderɨvɨ reta jupíe.

¹² Tamombeu peve yanderɨvɨ Apolos. Chekɨ̈reɨ yae jae ojo vaerä tëi pépɨri ïru yanderɨvɨ reta jupíe, ërei añave rupi mbaetɨ oipota ojo. Ërei ojota ko jëgua chupe yave.

Tamaraeme reta

¹³ Peïndaivi, pepɨ̈rata peporogüɨrovia pe; peyembokuimbae, peñemoäta ngatu.

¹⁴ Opaete mbae peyapo vae peyapo peporoaɨu reve.

¹⁵ Cherɨvɨ reta, peikuaa ko Estéfanas jo pegua reta räri güɨrovia Cristo re Acaya pe, jare kërai jae reta oñeñono oyeokuai vaerä ïru oporogüɨrovia vae reta pe.

¹⁶ Jáeramo pomoñera peiko vaerä jókuae nunga reta jeia re, jare opaete oporomborɨ jare oparavɨkɨ yandeYa pe vae reta pe.

¹⁷ Ayerovia Estéfanas jare Fortunato jare Acaico yogüeru chépɨri vae re, echa jae reta oyapo cheve ikavi vae perekovia pe,

¹⁸ echa jae reta chemboyerovia jare pe reta vi pemboyerovia. Jáeramo ikavi ko pemboete kuae nunga reta.

¹⁹ Oporogüɨrovia vae reta Asia pegua omondo peve tamaraeme. Aquila jare Priscila jare oporogüɨrovia vae reta oyemboatɨ jae reta jo pe vae omondo vi jeta tamaraeme peve yandeYa re.

²⁰ Opaete yanderɨvɨ reta omondo tamaraeme peve. Peyapo maraetei oyoupe peyovapɨte jare peyomboete reve kavi.

²¹ Che Pablo aikuatía peve kuae tamaraeme chepo pe etei.

²² Kia mbaetɨ oaɨu yandeYa Jesucristo vae, Tumpa toiporarauka chupe. ¡Eyu oreYa!

²³ YandeYa Jesucristo ipɨakavi toï pe ndive.

²⁴ Cheporoaɨu toï pe ndive Cristo Jesús re. Amén.