1 Corintios 12 - Biblia Guarani Tumpa Iñee

Mbaepuere reta Espíritu Santo omee vae

¹ Cherɨvɨ reta, mbaetɨ aipota peiko peikuaambae reve Espíritu Santo mbaepuere omee vae regua.

² Peikuaa kavi ko kërai ndei peporogüɨrovia mbove, peropa jare peyererajauka tumpa-raanga reta iñeembae pe.

³ Jáeramo aipota peikuaa: Tumpa iEspíritu rupi imiari vae, ngaraa oyepopeyu Jesús re. Jaeño Espíritu Santo rupi ipuere kia jei: “¡Jesús ko jae cheYa!”

⁴ Espíritu Santo omee mbaepuere vae reta oyoavɨ avɨ ko oyougüi, ërei Espíritu Santo meteiño ko.

⁵ Jare mbaravɨkɨ reta oyoavɨ avɨ ko oyougüi, ërei yandeYa meteiño ko.

⁶ Jare mbaravɨkɨ yayapo vae reta opa oyoavɨ avɨ, ërei Tumpa opaete mbaembae iyapoa, meteiño ko.

⁷ Ërei metei ñavo pe oñemee oyekuaa vaerä jese Espíritu Santo güɨnoi vae omborɨ vaerä ïru vae.

⁸ Echa Espíritu Santo omee metei vae pe imiari vaerä iyarakuaa katu reve. Jare jae vi omee ïru vae pe imiari vaerä oikuaa kavi yae reve.

⁹ Ïru vae pe omee mborogüɨrovia, ïru vae pe omee oporombogüera vaerä.

¹⁰ Ïru vae pe omee oyapo vaerä mɨakañɨ reta, ïru vae pe omee omombeu vaerä Tumpa iñee, ïru vae pe omee oikuaa vaerä Espíritu añete vae jare añetembae vae, ïru vae pe omee imiari vaerä ñee reta ambuae pe, jare ïru vae pe omee omombeu kavi vaerä ñee reta ambuae mbae ra oipota jei vae.

¹¹ Ërei opaete kuae mbaembae reta iyapoa meteiño, jae ko Espíritu Santo etei, jae omee metei ñavo pe oipota omee rupi.

Opaete vae metei jeteño ko Cristo re

¹² Echa meteiño ko yanderete. Yepe tëi jeta yanderete re ñanoi mbaembae, ërei meteiño ko. Jökoraiño vi ko Cristo,

¹³ echa metei Espíritu Santo rupi yayembobautisa opaete, Cristo jete yayeapo vaerä. Judío reta ani judiombae vae reta, tembiokuai ani tembiokuaimbae vae reta. Jare opaete vae yaɨu metei vae Espíritu Santo güi.

¹⁴ Yanderete meteiñoä ko, jeta ko mbaembae ñanoi yanderete re.

¹⁵ Güɨramoi yandepɨ jeita: “Jae ipoä che ramo, che jete reguaä ko.” Jayave ¿yanderete reguaä ra?

¹⁶ Jaeramiño vi güɨramoi yanenambi jeita: “Tesaä che ramo, che jete peguaä ko.” Jayave ¿yanderete reguaä ra?

¹⁷ Opaete yanderete yanderesa katuai yave, ¿ketɨ ra oïta yandeapɨsa? Jare opaete yanderete yandeapɨsa katuai yave, ¿ketɨ ra oïta ñaneäpɨgua?

¹⁸ Ërei Tumpa oñono metei ñavo yanderete regua, jae oipota rami.

¹⁹ Echa yanderete metei vae katuaiño yave, ¿këraita ra yanderete?

²⁰ Ërei yepe tëi jeta mbaembae ñanoi yanderete re, meteiño ko yanderete.

²¹ Ngaraai yanderesa ipuere jei yandepo pe: “Mbaetɨ aipota chemborɨ.” Jaeramiño vi ñaneäka ngaraa jei yandepɨ reta pe: “Mbaetɨ aipota chemborɨ pe reta.”

²² Añete, jökoraiä ko. Echa yanderete regua reta mbaeäecha vae, jae reta ko yaiporu yae vae.

²³ Jare yanderete regua reta jaekaviäecha yandeve vae ërei yamboemimonde kavi. Jaeramiño vi yanderete regua reta ñanoti vae ñamopöra kavi.

²⁴ Ërei yanderete regua reta ikavi yandeve vae, mbaetɨ ñamopöra. Ërei Tumpa oñono kavi opaete yanderete regua reta, omboyemboeteuka jókuae yanderete regua mbaeäecha vae,

²⁵ jökorai oyapo, agüɨye vaerä yanderete regua reta oyemboyao oyougüi, opareve oyangareko kavi päve vaerä oyoe.

²⁶ Jare metei yanderete regua oiporara yave, opaete yanderete oiporara. Jaeramiño vi metei yanderete regua oyemboeteuka yave, opaete yanderete oyerovia.

²⁷ Jayave pe reta jae ko Cristo jete, metei ñavo jae ko Cristo jete regua.

²⁸ Jare Tumpa oñono oporogüɨrovia vae reta ipɨte pe, tenonde ete temimondo reta, mokoía ñeemombeúa reta, mboapɨa oporomboe vae reta, javoi mɨakañɨ oyapo vae reta, oporombogüera vae reta, oporomborɨ vae reta, oyangareko mbae re vae reta, ambuae vae ñee reta pe imiari vae reta.

²⁹ ¿Opaete vae pa temimondo reta? ¿Opaete vae pa ñeemombeúa reta? ¿Opaete vae pa oporomboe vae reta? ¿Opaete vae pa oyapo mɨakañɨ vae reta?

³⁰ ¿Opaete vae pa oporombogüera vae reta? ¿Opaete vae pa imiari ambuae vae iñee reta pe? ¿Opaete vae pa omombeu kavi ñee ambuae vae mbae ra oipota jei vae?

³¹ Ërei peeka mbaepuere ikavi yae vae. Tamombeu peve mbae ikavi yae ete kuae mbaembae reta güi vae.