1 Corintios 11 - Biblia Guarani Tumpa Iñee

¹ Peiko che aiko rami. Che Cristo oyapo vae ayapo rami.

Kuña reta jemimonde regua

² Cherɨvɨ reta, pombotuicha, echa jekuaeño pemaendúa cheré, jare peyapo che pomboe jese vae.

³ Ërei aipota peikuaa kavi Cristo ko jae kuimbae iñäka, jare kuimbae jae ko kuña iñäka jare Tumpa jae ko Cristo iñäka.

⁴ Opaete kuimbae oyerure Tumpa pe yave ani omoërakua Tumpa iñee ïru vae reta pe oñeäka-soi reve yave, metei ñemomarai ko.

⁵ Ërei metei kuña oyerure Tumpa pe yave ani omoërakua Tumpa iñee ïru vae reta pe oñeäka-soimbae reve yave, metei ñemomarai vi ko; echa oñeapiasɨ vae rami ko.

⁶ Echa kuña oñeäka-soimbae vae toñeapi vi. Ërei imara oyasɨa ia ani oñeapiasɨ yave, toñeäka-soi.

⁷ Echa kuimbae mbaetɨ jaekavi oñeäka-soi vaerä. Echa Tumpa oyapo kuimbae jae rami, iyemboetearä. Ërei kuña ko jae kuimbae iyemboetea.

⁸ Echa kuimbae mbaetɨ ko oyeapo kuña güi. Kuña ko oyeapo kuimbae güi;

⁹ jaeramiño vi kuimbae mbaetɨ oyeapo kuña jeko pegua. Kuña ko oyeapo kuimbae jeko pegua.

¹⁰ Jáeramo, kuña toñeäka-soi oikuaauka vaerä oï ko ime jeia re, araɨgua reta jeko pegua.

¹¹ Ërei yandeYa jóvai kuimbae mbaetɨ ipuere oiko kuñambae reve, jökoraiño vi kuña mbaetɨ ipuere oiko kuimbaembae reve.

¹² Echa kuña oyeapo ko kuimbae güi, jare kuimbae oa kuña güi. Ërei Tumpa oyapo opareve.

¹³ Pe reta etei peecha: ¿Jaekavi ra kuña oyerure vaerä Tumpa pe oñeäka-soimbae reve?

¹⁴ Opaete vae yaikuaa ko metei kuimbae omaeño ia okuakuaa vae, metei ñemomarai ko.

¹⁵ Ërei metei kuña omaeño ia okuakuaa vae, mbaetɨ ko ñemomarai. Echa Tumpa omee kuña pe ia puku vaerä äka-soia jekovia pe.

¹⁶ Ërei oime yave kia oipota oyoaka kuae re vae, toikuaa kërai ore ani oporogüɨrovia vae reta Tumpa imbae reta mbaetɨ ko jökorai orereko.

Ikavimbae oyapo Santa Cena kotɨ vae

¹⁷ Ërei añave kuae aikuatía peve vae, mbaetɨ chepuere pombotuicha, echa peyemboatɨ yave, peyapo ikavimbae vae, ikavi vae peyapo vaerägüe.

¹⁸ Kuae räri tae peve: Jërakua cheve kërai peyemboyao oyougüi, peyemboatɨ yave pemboete vaerä Tumpa. Jare arovia güɨramoi añete ko.

¹⁹ Echa oime tai ko yemboyao reta pepɨte pe, añetete oporogüɨrovia vae reta oyekuaa vaerä pepɨte pe.

²⁰ Jáeramo peyemboatɨ tëi peyapo Santa Cena vae, jaeä ko Santa Cena.

²¹ Echa pekaru yave pe räri voi pemboɨpɨ peu tembíu perugüe, jáeramo amogüe iyɨmbɨaɨ, jare ïru vae oyembosavaɨpo.

²² ¿Mbaetɨ pa pero pekaru jare peɨu vaerä joko pe? ¿Maera pa peröɨro oporogüɨrovia vae reta Tumpa imbae reta jare pemomarai mbaetɨ etei mbae güɨnoi vae reta? ¿Mbae pa jaeta peve? ¿Pomboeteta ra jókuae re? ¡Ngaraa ko!

Pablo oporomboe Santa Cena re

²³ Che amombeu peve, yandeYa güi amboresive vae, jae ko kuae: YandeYa oipɨɨ mbɨyape jókuae pɨ̈tu oñemeeta omano vaerä yave,

²⁴ jare Tumpa pe yasoropai omee jese güire, opɨ̈saa jare jei: “Peu. Kuae ko jae cherete peré omano vae. Peu kuae, pemaendúa reve cheré.”

²⁵ Jaeramiño vi yandeYa oipɨɨ kopa opa ma okaru reta yave, jei reve: “Kuae vino ko jae morogüɨrökuavee päve ipɨau vae cherugüɨ pe ayapo vae, kuae peu ñavo, peyapo pemaendúa reve cheré.”

²⁶ Jökorai mbɨyape jare vino peu ñavo, pemoërakua ko yandeYa imano, jae ou ye regua.

Santa Cena pe oguapɨ jupimbae reve vae regua

²⁷ Jáeramo oime yave kia jou mbɨyape jare vino Santa Cena pe jupimbae reve vae, oyemboeko ko yandeYa jete jare jugüɨ re.

²⁸ Jáeramo metei ñavo tomae kavi iyé, jayave tou jókuae mbɨyape jare jókuae vino.

²⁹ Echa oime yave kia jou mbɨyape jare vino jupimbae reve, omae kavimbae reve yandeYa jete re, jae aeño ko oyemboeko jou vae rupi.

³⁰ Kuae jeko pegua jeta pepɨte pe imbaerasɨ jare ipɨtu vae; jare jeta omano vae.

³¹ Echa ñamae kavi yandeyé yave, yandeYa ngaraa yandemboeko.

³² Ërei yandemboeko ramo yandeYa oiporarauka yandeve, agüɨye vaerä yayemboeko oporogüɨroviambae vae reta ndive.

³³ Jáeramo, cherɨvɨ reta, peyemboatɨ pekaru vaerä yave, peñoäro.

³⁴ Ërei oime yave kia iyɨmbɨaɨ, tokaru jëta pe, agüɨye vaerä peyemboatɨ peyemboekouka vaerä. Ïru mbaembae reta ayapokatuta aja pépɨri yave.