အွန်လိုင်း သမ္မာကျမ်းစာ

Zăkomo 3 - Geba Roman New Testament

Bija Ablî

¹ Jò thò tòcò, d́ŏ thĭ klè̆ nu òè̆bwè tè kèhta za sara ńò, manè̄ kò̄ d́òdo dō, thĭ thîhè̆ tèpwè htè wa sara tòcò kè̄ b́è cirragrî̄ d́olĭkò̆ bija alewe tòcò nu.

² Wa gŏ abwè mèni tèpwè dèkèḿè òè̆pla lò. Barasă bija dèbwèbwè ḿî dè mèkèḿèdè d́ŏ zè dèjî̄b́èdòdò abu taplă ńò d́ō, zî ḿî bija apĕazò dèbwè kî asòi za anebî̆cè thèd́è̆bwè d́o lò.

³ Wa thagolō cakwawè̄ tèpwè thîrî akhèe cab́ô̆htè agò̄ sòkhĕńebò̄ we lē nu, kî wa hna le za tèpwè cè d́ŏ wa thaèni ale atherĕ nu.

⁴ Gomocawe d́ò̆ alewe dèdè̆ acab́ô̆ thè̆bò ado dokho nu, ado nòthò̆ hnò̆nu gīllisô sa cè atherĕ ahtèb́ĭ d́ō, gò̄ hmòdanāge i za tèpwè cè kî thè̆bòd́ewā htî dimi lò nu.

⁵ Gōnu akhò̆, bija ablî nu aò nòthò̆ htî dimi lò hnò̆nu, acwăthèhlè i za tèpwè dè adoamu tòcò nu. Gomoca mò̄kô alewe domo be, htè hmîlè̄khotholè̄klè̆ dèbwecèkrô̆ thodohôdo hnò̆nu lapolaphî̆ ni tèpwè hmî ablî deble akholè̄kălè̄ nu.

⁶ Kî bija ablî nu mè acab́ô̆ hmî nu lò. Zî ḿî dèkèḿè alākho, htè aò d́ŏ we neb́î̆cè alò kî ahèbrèi dèkî̆kkèmèhlò̆ d́ŏ wè thèd́è̆bwè alò dèdè̆ nu. Cî ḿî agè̄hò ahmîblî agè̄hta wî hîklè̆ kî gèhòa bija thèd́è̆bwè̆ d́ō dèdè̆ nu.

⁷ Wa bija tòcò nu we mèb́î kèhta lŏ dèphodèwe amiama, htŏphojōli, wu thè̆htè kî d́îphodāpho gŏmomo hŏ!

⁸ Barasă d́ō, bija dè mèb́î za bija ablî dèbwè̆ ńò. Ḿî aòpĕhta kî dèkî̆kkèmèhlò̆ kî dèthĭ aciabè lò.

⁹ We mèi cè d́ŏ dèthîhè̆htage Pa kî B́ĭcè kî hôkî̆kkè bija alewe tòcò htè ab́èb́òla Kib́ĭcè ahô̆agèlè nu.

¹⁰ Dèthîhè̆htage adèjî̄b́è kî dèhôkî̆kkè hèhtakô tèpwè lòmò tèb́è abu lò. Thè̆buthè̆we tòcò, adò mò mè ane gōnu ńò.

¹¹ Htĭhtabū dubu lò di scihtai za htĭbātcă kî htĭkhè ńò.

¹² Thè̆buthè̆we tòcò, thod́ohtĭmu tòb́ò̆ tè thèhtai za òlĭvo athè ńò; thobiscimu tè thèhtai za thod́ohtĭthè ńò, kî htĭ ahè̆ nu do bohtai za htĭbātcă ńò.

Dèzadèbla d́ŏ Ahtajî nu

¹³ D́ŏ thĭ klè̆ nu, azaabla kî athôthad́ane òbò̄ dèbwèbwè ā? Thĭgè d́è̆lî̄htab́è d́ŏ thĭ dèò awîab́è d́ŏ dèphîdèmè awîaè d́ŏ dèbè̄b́ôla kî dèthîhè̆ abu nu.

¹⁴ Barasă d́ŏ thĭ thabu dèthaklathasè̆, dèthèhtèd́òd́è̆, dèlarū kò ò ma d́ō, mèbò̄ ḿè dèkhòwè ahtad́ĕd́ò dèdî̄dèhma d́ŏ dèhtăikòi ane abu nu ḿè.

¹⁵ Dèthîd́ôthîhè̆ anu domo dî ḿî aò d́ŏ Mò̄kho ala ńò, ḿî ab́èkja lākho, tè b́è thotha aè̆ ńò ḿî dèscidèhnè è̆ lò.

¹⁶ B́ĕ dèthaklathasè̆ kî dèlarū ò alle nu, dèphohtălazē kî dèkî̆kkèmèhlò̆ ò b́ĕnu gŏ amo lò.

¹⁷ Barasă d́ō, dèthîhè̆ htè aò d́ŏ Ahtajî alela jo, aŭsu nu aplî̆atcă tèpwè kî amècomèkhlidè, amèmòmèma dè, agomo dè bija anikhĭ lò. Dèthîhè̆ ò pĕhtakî dèthakhòwè, kî thèhtaphò̆hta dè awîab́è tòcò nu. Òhlô̆òlakî dètcamūkă kî dèmèmômā ane tòcò lò.

¹⁸ Kîd́ò̆ dè awîaè ḿî athèaphò̆ òhta d́ŏ dèkhwĭ htè amècomèkhlidè tòcò solabālagè d́ŏ dèjīdèd́wă abu nu.

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ