အွန်လိုင်း သမ္မာကျမ်းစာ

Philippiăno 3 - Geba Roman New Testament

Dèdî̄dèhma Hnèhnè

¹ Thè̆buwe tòcò, alekăgudŭ tha d́ò̆sa jè thĭ ḿî thalōthalabò̄ d́ŏ thĭ ḿî dèdè̆ lò d́ŏ B́ĭcè abu nu. Je gē hwed́ò̆sage d́ò̆ thĭ htè je hwe htŏ hlĕ aŭsu tòcò nu, tè b́è dèhtodèba tèpwè ji nikhĭ ńò. Ḿî thĭ gī nib́èbò̄ dèòhuòb́i d́okhlŏ anikhĭ lò.

² Thidĭibò̄ thĭ ne bija amè dèkî̆kkèmèhlò̆, htè aḿî htwi tòcò, bija htè ahnasô dèhô̆rîkî̆ aphekhĭ tòcò nu.

³ Anib́è htŏ dèhô̆rîkî̆ ahnèhnè ḿî wa, tè b́è cè tòcò ńò, manè̄, wè thèb́è̆hta Kib́ĭcè d́ŏ Spirito Tcahtĭ kî wa thalōthalai wè dèòthôḿô̆ d́ŏ Jezŭ Krĭstu abu akhoacè̆ lò. Wè tè bè̆lă dèb́u d́ŏ dè htè alî̄htaphlò̆hta za tòcò akho dimĭ ńò.

⁴ Jè bè̄la jè dèb́u d́ŏ dè anu tòcò akho za tèpwè. Bija dèbwèbwè ḿî gomo d́ŏ adèb́u ḿî aloba agî̄ lî̄htaphlò̆hta d́o, jò ò kî awîakè̆ d́okhlŏlĭkî anu lò.

⁵ Ji nib́è dèhô̆rîkî̆ aphekhĭ hlĕ jî ḿîwe bija dò sòd́è̆pho lò nu. Jò òla d́ŏ bija Israè̆lpho, Bènjamĭno akhwĭthèlè̆ abu, jè ḿî Hebrè̆upho athwi tcătcă lò. B́ĕ ab́èkja Jŭdapho adèthôdèthò̆ nu, jè ḿî Pharizè̆ dèbwèbwè,

⁶ kî ja thasô htô̆kî htè jè mèkî̆kkèmèhlò̆gè dèòplo nu. B́ĕ ab́èkjakî bija dèbwè dî̄hmaikô dèsòkhĕńe dèthôdèthò̆ adèhmèla tòcò nu, dèbè̄ jò lò dèkèḿè ale tò ò tèpwè dimĭ ńò.

⁷ Barasă d́o, dè htè jè bè̄dobè̄mu acab́ô̆ dènihlunită ji nikhĭ nu, khŏnu jo, jè bè̄gè cè acab́ô̆ dèsudèṕa ji nikhĭ d́ŏ Krĭstu acè̆ nu.

⁸ Tè b́è htĕ dè anu tòcò lò ńò, jè bè̄la dèlŏcăcè acab́ô̆ dèsudèṕa ji nikhĭ lŏklikli, kî dè alīdobwîthè̆ d́okhlŏ ji nikhĭ ḿî dèthîhè̆ jî B́ĭcè Jezŭ Krĭstu nu. Je hwĕphlòḿĭgè dèlŏcăcè d́ŏ zo kho zè cè̆ lò. Jè bè̄ dèlŏcăcè acab́ô̆ dègodō ahmĭtherĕ nu, cab́ô̆htè ji gī nib́èbò̄ Krĭstu anikhĭ,

⁹ kî òpĕòzòbò̄ d́ŏ Zu bu anikhĭ nu. Je neb́î̆cè thè̆ne nu, jè dèdî̄dèhma tò ò be ńò, htè dèsòkhĕne dèthôdèthò̆ adèdî̄dèhma nu. Khŏnujo jò òkîgè dèdî̄dèhma htè ji nib́è d́ŏ dèb́u Krĭstu abu, dèdî̄dèhma htè aò d́ŏ Kib́ĭcè ò alăkî ad́ògòdòi dèb́udènè nu.

¹⁰ Dè htè ja thaèni ḿî dèthîhè̆ Krĭstu kî dèthîhè̆ dèhtaboge acô̆thèlè̆, dèkhazo nikhĭ Zè dèkhab́èjab́è tòcò nu, kèhta bija alăkî cè d́ŏ dèthĭ abu,

¹¹ òkî dèmulè̄sascĭ d́ŏ je neb́î̆cè thè̆ne kè̄ b́è b́awè̄htoge dèthĭklè̆ nu.

Dècwè Do d́ŏ Allegudu

¹² Jò tò d́ò tèpwè d́ŏ jo no jè b́è htŏ kî je pĕ jò zò htŏ ńò. Nòthò̆ hnò̆nu, ju wuthè̆dèba we tèpwè d́ŏ ji gī nib́è dèi su htè aḿî Jezŭ Krĭstu mèni htŏ jè d́ŏ Ze neb́î̆cè anikhĭ nu.

¹³ Thè̆buwe tòcò, jo do gomo tèpwè d́ŏ ji nib́è htŏ dèi su nu ńò. Ḿî ji nib́ègè dè domo lò ḿîgè dèsòthô̆bô̄hnèkè̆ dè htè aò je lekă, kî ju wuthè̆dèba thĕbwethîlî̆ cab́ô̆htè jo gō do d́ŏ dè aò jò hlò̆mò̄ tòcò aò nu.

¹⁴ Gōnu acè̆, jè cwè danātri thĕbwethîlî̆ d́ŏ allekŭdu cab́ô̆htè ji gī nib́è su, htè aḿî Kib́ĭcè adèjo d́ŏ Jezŭ Krĭstu htè dèòthôḿô̆ d́ŏ Mò̄kho nu.

¹⁵ Wa lŏcăcè htè adob́agè d́ŏ tha tòcò mò òi dèbè̄thobè̄tha cab́ô̆ gōnu lò. Barasă d́ō, bija tòcò cò ḿî òkî dèbè̄thobè̄tha alasă d́ō, Kib́ĭcè kī ithîhè̆ tèpwè thĭ dè ajo hlî̆hlî̆plăplă lò.

¹⁶ Cadè̄ cadè̄ hwahwă, we gē le ahlò̆mò̄ acab́ô̆ we lenènògè htô̆ khŏdini jo nu.

¹⁷ Jè thè̆buwe tòcò, tcahlô̆tcad́ò̆bò̄ jè, tcahnè̆ibò̄ bija htè alô tcad́ò̆kô we le kî mèdè aè tòcò nu.

¹⁸ Jò d́ò̆sa htŏ thĭ dè ajo tòcò òè̆pla htŏ. Khŏnujo jò d́òwe kòd́ò̆ d́ŏ dègādŭhtĭthè̆nîkhî̆î abu nu. Bija òwe òè̆bwè, htè adèòthôḿô̆ hna kèhta cè tòcò Krĭstu adèkhathĭ ane Krusu ad́ĕd́ò tòcò nu.

¹⁹ Cè tòcò aklè kŭdu d́ŏ Larrā abu, manè̄ kòd́òdo dō, cè tòcò ab́icè ḿî ze neb́î̆cè adèthaèni lò. Zè bè̄dobè̄mui ze ne d́ŏ dè amò thăwāi tòcò nu kî Zo gomoi dè htĕ ab́èkjakî Lākho tòcò nu lò.

²⁰ Wa lŏcăcè ḿîgè Mò̄kho Ahtĭgepho tòcò kî wò òsô̆wô̄ dôigè amèhlô̆htage wa B́ĭcè Jezŭ Krĭstu gē lela d́ŏ Mò̄kho nu.

²¹ Ca kā b́ăkhlèkè̆ wè dèkhozeăze htè athĭ za jo tòcò kî hna kèhta acab́ô̆ Ze neb́î̆cè òkî dèhĭdèhtè̆ akhò̆ nu, Zò gò̄ sòthŏi dècô̆thèlè̆ htè aŭidè lŏcăcè d́ŏ Ca kălè̄ nu lò.

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ