အွန်လိုင်း သမ္မာကျမ်းစာ

Galatiăno 6 - Geba Roman New Testament

Dèkhòwèhmòb́è kî Dèhtukhohtuă

¹ Thè̆buwe tòcò, d́ŏ thĭ klè̆ dèbwèbwè gè̄ dè mèb́è ane ńò d́ō, amè thotha adèmè dèbwèbwè gā thaè mè danāge zè dèò d́ō, zè gè̄ mèb́è d́ŏ dèthob́îthajū abu nu. Kî tcaiwōilage thĭ ne cab́ô̆htè thĭ tè b́èbò̄ dèhnakă ńò nu.

² Thĭ ki b́izo b́è lōwa adèbadèsè̆ kî mèkô pĕhta Krĭstu adèhmèla nu.

³ Bija ada wanèṕănè̆ ńò dèbwèbwè ḿî gomola ane ajwīamo d́ō, cè ḿî bija ahlòplèlage ane lò.

⁴ Thĭ dèbwè dèbwè ladū gomolage d́ò̆è thĭ dègemeelô; thĭ gā pahtî b́eḿĕ dè amò bè̄htajî ane d́ō, agī ḿîbò̄ thĭ thè̆ne è̆, agî̄ dî ḿîbò̄ dèd́ôthò̆dròi thĭ ne kî thĭ khò̆ tòcò è̆ ńò nu.

⁵ Manè̄, bija dèbwè kî dèbwè ladū adèb́i kî ane ò tèpwè lò.

⁶ Bija dèbwèbwè gī nib́è ma Krĭstu aVanzĕlo d́ŏ bija ò dèbwèbwè d́ō, zò mò igetcage thèjô̆ athôithò̆idè tòcò acab́ô̆ dè aòni cè atherĕ nu.

⁷ Gomo ḿè bija plèhlŭ Kib́ĭcè aza tèpwè nu ḿè; bija selahtòla adĕ nu cè kèb́è tèpwè.

⁸ Zo gō solabāla phehî adèmò anikhĭ d́ō, cè kè kèb́è tèpwè dèthŏdèî aphò̆athè. Zo gō solabāla ma d́ŏ Spirito Tcahtĭ akhlòalè abu nu d́ō, cè kè kèb́è tèpwè dèò alahtŭlablo aphò̆athè.

⁹ Dèphîdèmè awîab́è anikhĭ nu wò dò mò sò̆tab́a ńò. Manè̄ d́o akhî kè̄ b́è tapla wî gî̄ phînipônigekò̆ wè dèhtukhohtuă aphò̆athè akhoacè̆ nu.

¹⁰ Akhîb́èbòb́è athŭtherĕ, wè gè̄ mè b́è bija gŏ abwè anikhĭ dè aè d́okhlŏ wè thè̆buwe anib́èplo wa dèb́u tòcò nu.

Dèhnŭsè Agudulă

¹¹ Hmăibò̄ htè je hweni thĭ d́ŏ ju cukhò cè agudulă dôhmô̆ gīhmô̆ d́ŏ cèd́ŭphlo do abu nu.

¹² Bija ahnasô thĭ gî̄ phîni dèhô̆rîkî̆ aphekhĭ tòcò ḿî agomo anikhĭ lò, kî agô̄ hlô̆htab́è dèlômèssègnè̆ Krĭstu aKrusu anikhĭ tòcò nu.

¹³ Bija htè aphekhĭ b́è hô̆rîkî̆ tòcò hnò̆nu, dô lôkô acab́ô̆ Dèhmèla ò adĕ ńò. Ḿî ca thaèni thĭ gā kha dèhô̆rîkî̆ d́ŏ zè dèphîdophîmu ze ne anikhĭ nu.

¹⁴ Ḿî jè nu, jî phîdophîmu ḿî wî B́ĭcè Jezŭ Krĭstu aKrusu; htè d́ŏ Zu Krusu akhoacè̆ Lākho tèb́è b́è htalaglo ji nikhĭ, kî jè b́è htalaglo Lākho anikhĭ nu.

¹⁵ Bija dèbwè aphekhĭ b́è hô̆rîkî̆ ḿîwî, atè b́è hô̆rîkî̆ ńò ḿîwî, atè b́èkhè tèpwè ńò. Ajwīdomodo ḿî zî gî̄ phî̆hta bwèthè̆ dèbwè lò.

¹⁶ Bija htè alôkômèkô Dèhmèla ajo d́ŏ zè dèòthôḿô̆ abu tòcò nu, dèjīdèd́wă kî dèkhòwèhmòb́è kè̄ b́è d́ò̆è cè kî Kib́ĭcè abijakhwĭpho lŏcăcè nu.

¹⁷ Ja thaè d́ò alekăgudŭ ḿî Ja da thaèni be dèbadèsè̆ d́ŏ bija ò dèbwè̆ ńò. Manè̄ d́ō, dèbulebukle aò je neb́î̆cè alò tòcò d́è̆lî̄hta d́ŏ jî ḿî Jezŭ Krĭstu azô lò.

¹⁸ Jè thè̆buwe tòcò, wî B́ĭcè Jezŭ Krĭstu adèhludètă kò òkô d́ò̆è thĭ kă gŏ abwè. Amèn.

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ