အွန်လိုင်း သမ္မာကျမ်းစာ

Ephè̆sus 5 - Geba Roman New Testament

Dèòthôḿô̆ d́ŏ Dèhlî̆klè̆

¹ Acab́ô̆ thĭ ḿî Kib́ĭcè apho htè Cè b́èlò̄ tòcò nu, wuthè̆dèbabò̄ cab́ô̆htè thĭ gā lă kî Cè nu.

² Cab́ô̆ Krĭstu b́èlò̄ wa kî Ci ilagè Ca thathôḿô̆ wi nikhĭ acab́ô̆ dèhluhnŭẃi htè ab́è Kib́ĭcè atha akhò̆ nu, thĭ kò òib́è dèb́èlò̄thòklè̆.

³ Acab́ô̆ thĭ ḿî Kib́ĭcè abijakhwĭpho tòcò akhò̆, dèlathulakèḿè ḿîwî, dèhôdèhò̆ ḿîwî, dèthaènido ḿîwî, dò mò bahta i d́ŏ thĭ lòmò bu ńò.

⁴ Dèjî̄b́è htè adò mò d́ò ńò, acab́ô̆ dècîpôcîthŏ, dèd́òkè̆d́òô, dèlô̄ô̆lô̄a tòcò nu, d́òibò̄ ḿè. Ḿî kòihtăibò̄ Kib́ĭcè dòkhò̆.

⁵ Bija htè alathulakèḿè, ahôdèhò̆dè kî adèthaèni do tòcò nu di nib́è za Krĭstu kî Kib́ĭcè ahtĭage dèbwè̆ ńò. (Dèthaènido ḿî dèthèb́è̆ dèjòdèja domo lò.)

⁶ Ibò̄ ḿè bija hlòni thĭ d́ŏ dèjî̄b́è ahnahnă nu ḿè. Ḿî dè ajo tòcò acè̆, Kib́ĭcè adèthèhtè gā lab́èkò̆ bija adò sòkhĕńe ze lē ńò tòcò nu.

⁷ Gōnu akhoacè̆, mè b́èkja ḿè thĭ ne kî bija acab́ô̆ gōnu tòcò ḿè.

⁸ Hlĕ aŭsu nu thĭ thè̆ne ḿîgè bija aò dèkhiklè̆, barasă tcahta b́ĕ thĭ ḿî Kib́ĭcè abijakhwĭpho nu, thĭ ḿîgè bija aò dèhlî̆klè̆. Mègōnu d́ō, òbò̄ acab́ô̆ bija ab́èkja dèhlî̆pho akhò̆ nu.

⁹ Manè̄, dèhlî̆ nu aihta gajă ḿî dè awîaè, dèdî̄dèhma, kî dè ab́èabò gŏmihtĭda lò.

¹⁰ Wuthè̆dèba mèbò̄ dèmè htè ab́è Kib́ĭcè atha.

¹¹ Mèkôbò̄ ḿè dèkhidènè adèmè htè ada wanè ńò tòcò acab́ô̆ bija lewe mè nu ḿè. Ḿî mèlî̄htabò̄ d́ŏ dèhlî̆klè̆ nu dòkhò̆. (

¹² Dè htè bija tòcò mè d́ŏ dèhudèzò nu, gî̄ jî̄b́èhta awîakè̆ ḿî amò thăwāthablè̄ tèpwè.)

¹³ Kîd́ò̆ gajă dè htè ab́è lei dèhlî̆klè̆ tòcò nu, ane d́è̆lî̄hta hlî̆hlî̆plăplă tèpwè.

¹⁴ Manè̄ dè domomo d́ŏ ab́è d́è̆lî̄ hlî̆hlî̆plăplă nu, kèhta tèpwè dèhlî̆. Gōnu akhoacè̆, dèd́ò ò, “Ŏ bija asòḿĭ, phôthèńèbò̄ kha, Wè̄htobò̄ d́ŏ dèthĭ abu nu. Krĭstu ki i hlĭhta dèhlî̆ d́ŏ ńò lò nu.”

¹⁵ Gōnu akhoacè̆, sòiwoibò̄ thĭ dèò. Mèbò̄ ḿè acab́ô̆ bija agudunapă tòcò mè nu ḿè. Ḿî òibò̄ dèzadèbla.

¹⁶ Dè akhîakha kî dèkhwèdèj́a htè ni nib́è arră nu, mèibò̄ cè dè aè anikhĭ. Manè̄, muni ajo tòcò ḿî dè akî̆kkèmèhlò̆ lò.

¹⁷ Mègōnu d́ō, mè nigudĭbò̄ ḿè thĭ ne ḿè, ḿî wāhlèthîhè̆bò̄ Kib́ĭcè adèthaèni thĭ gè̄ mè ḿî danè̄ nu.

¹⁸ Mèibò̄ ḿè dèò̆hmuapò htè amèkè̆mèô thĭ nu ḿè, ḿî ibò̄ Tha Tcahtĭ pĕhta thĭ bu.

¹⁹ Jî̄b́èhtî hlèbò̄ lōwa Psălòmo adèjî̄b́è, dèthăbô̄ kòihtăi kî dèkòihtăi adèjî̄b́è d́ŏ thotha adètcahtĭ abu nu.

²⁰ D́ŏ wî B́ĭcè Jezŭ Krĭstu ami abu, kòihtăi Kib́ĭcè Pa d́ŏ dèlŏcăcè abu thèjô̆ nu.

Ahmè̆ kî Awa

²¹ Dèbwè kî dèbwè khahô̆khajò hlèbò̄ lōwa d́ŏ dèd́ŏdèja Krĭstu abu nu.

²² Ahmè̆ tòcò khahô̆khajòbò̄ thĭ wa acab́ô̆ thĭ khahô̆khajò thĭ B́ĭcè akhò̆ nu.

²³ Manè̄, awa tòcò òkî dècô̆thèlè̆ d́ŏ ahmè̆ akho, acab́ô̆ Krĭstu òkî dècô̆thèlè̆ d́ŏ dèòplo akho akhò̆ nu. Krĭstu mèhlô̆htage dèòplo, htè aḿî Ze neb́î̆cè nu.

²⁴ Gōnu akhoacè̆, hmè̆ tòcò kè̄ b́è khahô̆khajò pĕhtazòhta awa, acab́ô̆ dèòplo khahô̆khajò Krĭstu akhò̆ nu.

²⁵ Awa tòcò, b́èlò̄bò̄ thĭ hmè̆ acab́ô̆ Krĭstu b́èlò̄ adèòplo kî ilagè atha akhò̆ nu.

²⁶ Zè mègè gōjo ḿî acab́ô̆ Zè gè̄ lè̄tcahtĭ dèòplo d́ŏ Kib́ĭcè anikhĭ, d́ŏ Kib́ĭcè alēahwè b́ĕ Zu ŭsab́ăkè̆i hwă htĭ alekă,

²⁷ cab́ô̆htè Zi gī nib́è Zi nikhĭ dèòplo htè awîamò, adè pèèpaa cî̆wî̄căwā ńò, adî tîdrutîphî̆ ńò, aplî̆atcă lŏcăcè, kî ab́èd́òb́èsa ale tò ò ńò nu.

²⁸ Awa tòcò takî cè b́èlò̄ zè hmè̆ acab́ô̆ cè b́èlò̄lage ze ne nu. Bija htè ab́èlò̄ ahmè̆ ḿî ab́èlò̄lage anebî̆cè lò.

²⁹ (Bija htè adèwè̄dèsè̆ anebî̆cè ńò òbò̄ dèbwèbwè ā? Ḿî ci ia iò̆, woikèi ze ne acab́ô̆ Krĭstu mèni adèòplo akhò̆ nu lò.

³⁰ Manè̄, wî ḿî aòwè̄ Krĭstu anebî̆cè alò tòcò lò.)

³¹ Acab́ô̆ dèhwela ò, “Gōjo akhoacè̆, amikhŏ gè hèbā amo apa kî lè̄plo ane ahmè̆, kî bija gībwè gè̄ kèhtakò̆ dèneb́î̆cè dèbwè lò.”

³² Jò d́ò za tèpwè d́ŏ dèdî̄dèhma aòhuòb́i b́è d́è̆lî̄hta d́ŏ dèhwela jo ḿî ab́èkja Krĭstu adèòplo nu.

³³ Barasă ḿî ab́èkja thĭ dèbwè kî dèbwè lò. Awa gŏ abwè b́è b́èlò̄ ahmè̆ acab́ô̆ cè b́èlò̄lage ze ne nu, kî ahmè̆ gŏ abwè b́è d́ŏb́èj́ab́è awa lò.

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ