အွန်လိုင်း သမ္မာကျမ်းစာ

Ephè̆sus 4 - Geba Roman New Testament

Dèneb́î̆cè ḿî Dèbwè lò

¹ Jè, htè aladēnī dèkî̆dî̄ bu d́ŏ amè B́ĭcè adèmè akhoacè̆ dèbwè jo, ikhoiă thĭ cab́ô̆htè thĭ gè̄ mèhtajî thĭ dèòthôḿô̆ adò, cab́ô̆ Kib́ĭcè bè̄la akhò̆ b́ĕ Zo jo thĭ akhî nu.

² Sala thèjô̆bò̄ thĭ ne, òibò̄ dèb́îdèjū kî dèkhòthad́ò̆wî̄thazô. D́è̆lî̄bò̄ thĭ Dèb́èlò̄hlè lōwa dèbwè kî dèbwè d́ŏ dèthazô abu nu.

³ Phîglohmebò̄ dèjî̄dèd́wă d́ŏ Kib́ĭcè Atha ila thĭ htè ab́ôglocŏgloplo thĭ nu.

⁴ We neb́î̆cè ḿî dèbwè lò, wò òi Kib́ĭcè Atha dèmè̆ lò acab́ô̆ Kib́ĭcè jogè kè d́ŏ dèmulè̄sascĭ domo lò anikhĭ nu.

⁵ Kib́ĭcè ò dèbwè lò, dèb́udènè ḿî domo lò, dèŭsab́ăhtĭ ḿî domo lò,

⁶ Kib́ĭcè ḿî bija Lākhopho lŏcăcè Apa dèbwè lò, htè aŭidè lŏcăcè, ad́è̆lî̄hta adèmè d́ŏ bija gŏ abwè abu kî aò d́ŏ bija gŏ abwè abu nu.

⁷ Wi nib́è dèila còklîlasă d́ŏ Krĭstu ilanigè wa dèbwè dèbwè ladū nu.

⁸ Acab́ô̆ Cè Tcahtĭ d́ò, “B́ĕ ze lehta d́ŏ dèlle ahtajîgudŭ akhî nu, Ze lejoi ab́èphòb́ècŏ òèòò d́o, Ci igè bija Lākhopho tòcò Zè dèila.”

⁹ B́ĭcè hta d́ŏ alehtajî gudŭ nu, ḿî danè̄? Ahtabo ḿî aŭsu B́ĭcè lela d́ŏ Lākho, htè dèlle alajò̄ gudŭ nu.

¹⁰ Mègōnu d́ō, bija htè ala dèbwè nu ḿî dèbwè lò, htè alehta d́ŏ dèlle ahtajî d́olĭ Mò̄kho dèbwè nu, cab́ô̆htè agè̄ mè pĕhta dèlŏcăcè anikhĭ lò.

¹¹ Cè, htè ai “Bija Lākhopho dèila” dèbwè nu, ilanigè bija tòcò agè̄ mè Thodŏpho, tòcò agè̄ mè Prò̆fèt adèmè, tòcò ḿî akò d́ò̆sai bija Vanzĕlō, alewe tòcò ḿî Dèòplo Sara kî Sara thèihŭ bija lò.

¹² Zè mè dè ajo ḿî cab́ô̆htè Ca ka prahnèdòlò Kib́ĭcè abija lŏcăcè agè̄ mè Krĭstu adèkhî̆dèbwè adèmè kî gè̄ mèlehtalehtô̆ Krĭstu anebî̆cè anikhĭ nu.

¹³ Mègōnu d́ō, wa lŏcăcè gè lè̄plohtakò̆ we ne d́ŏ dèb́u domo lò abu kî d́ŏ dèthîhè̆ ladi Kib́ĭcè Apho abu; wî gî̄ phî̆htakò̆ bija adohtabwehta, kî htôhta htab́akò̆ Krĭstu adèpĕhtazòhta ahnèd́ă nu.

¹⁴ Anu tapla, wî dî ḿîbe abĭsèpho htè ab́ècwidewewā kî hmò dîwî̄dewei wa d́ŏ ahlòplè dè tòcò agīlliklè̆, htè athè̆ bija d́ŏ dèkè̆dèô tòcò adèhlòdèplè be ńò.

¹⁵ Ḿî d́ŏ dèjî̄b́è adî̄ahma kî dèb́èlò̄ abu, wè kè̄ b́è dohta d́ŏ klè kô̆ ab́ò̆ d́ŏ aḿî dè akho, Krĭstu abu nu.

¹⁶ D́ŏ Zu bu, dè asŏ agla lŏcăcè b́è d́òj́ăb́uwè̄glogè ale kî ale, d́ŏ dèneb́î̆cè alò, htè amèzo hlè lōwa nu. Kîd́ò̆ b́ĕ asŏ agla dagla kî dagla mè adèmè nu, dèneb́î̆cè thèd́è̆bwè b́òdohtai ane kî dèb́èlò̄ lò.

Dèòthôḿô̆ Athè̆ d́ŏ Krĭstu Abu

¹⁷ Gōnu acè̆, d́ŏ B́ĭcè ami abu ji ithidĭ thĭ, akò tò òthôḿô̆bebò̄ cab́ô̆ bwèthŭkupho, htè adègomogamā di nihlunită dimĭ ńò,

¹⁸ atha ḿî akhithurŭgè tòcò nu. Cè tòcò hèbāgè Kib́ĭcè adèi htè dèthôḿô̆. Manè̄ d́ō, cè tòcò tò òkî dèhtî̆nigô̄ni ńò kî atha ḿî asatèklè akhoacè̆ nu.

¹⁹ Zè dèthăwāthablè̄ tò ò be ńò akhoacè̆, Ci ilakè̆ Ze neb́î̆cè d́ŏ dèkî̆kkèmèhlò̆ kî dècîṕôcîthŏ anikhĭ kî do woikhaigè ane ńò.

²⁰ Dè ajo tòcò tè b́è mèhlô̆ni d́ŏ Krĭstu aò ńò.

²¹ Thĭ thîhè̆b́è htŏ Zî wî Cè kè̆, kî acab́ô̆ thĭ ḿîgè Zè bwè Thodŏpho tòcò nu, thĭ b́è thèihŭ htŏ dè ab́èabò htè aò d́ŏ Krĭstu abu nu.

²² Mègōnu d́ō, thŭphluladēbò̄ thĭ dèòthôḿô̆ aliahwè̆, htè ahlòniplèni thĭ d́ŏ dèkè̆dèô abu tòcò nu.

²³ Thĭ tha kî thĭ dègomogamā kè̄ b́è mèthè̆htage pĕhtazòhta,

²⁴ kî thĭ b́è kô̆htathòhta dèneb́î̆cè athè̆, htè ab́èb́òla ajāthôkî Kib́ĭcè è̆, kî ad́è̆lî̄hta ane d́ŏ dèò athè̆ htè adî̄ahma kî atcahtĭ nu.

²⁵ Mègōnu d́ō, d́òplèbebò̄ ḿè. Thĭ ab́udè dèbwè kî dèbwè kè̄ b́è jî̄b́èhtî hlè lōwa d́ŏ dèdî̄dèhma abu, manè̄ d́ō, wa lŏcăcè ḿîgè Krĭstu anebî̆cè jāthôthô akhoacè̆ nu.

²⁶ Thĭ gè̄ thèhtè d́ō, ibò̄ ḿè thĭ dèthèhtè hna thĭ kă agè̄ mè dèkhòwè ḿè. Thèhtèbò̄ ḿè htô̆ Lumuladēni dî̄ thĭ ḿè.

²⁷ Ibò̄ ḿè Mod́èlî akhwè d́ŏ agò̄ hlòhlî̆hlòplè thĭ anikhĭ ḿè.

²⁸ Bija htè a ahumèkè̆dè tòcò nu, sò̆tab́abò̄ dè ahuatoklŏ, phîmèabò̄ d́ŏ dèdî̄dèhma abu, cab́ô̆htè thĭ gī nib́è thĭ nikhĭ kî thĭ gè̄ mèzo zabò̄ bija aè̆ tò ò ńò tòcò anikhĭ khĭ.

²⁹ Dèjî̄b́è akî̆kkèmèhlò̆ nu i ḿè ahèhta d́ŏ thĭ hòbŭ ḿè, ḿî jî̄b́èbò̄ dèjî̄b́è amò aè htè amèlehtalehtô̆ dè, cab́ô̆htè bija asòkhĕńe b́è tòcò gī nikhoniăbò̄ nu.

³⁰ Mè tha dò mòbò̄ ḿè Kib́ĭcè Aspirito Tcahtĭ ḿè, manè̄ Kib́ĭcè Aspirito Tcahtĭ ḿî dèdòhmăi thĭ d́ŏ dèhlô̆htage amu dini anikhĭ nu.

³¹ Lè̄dakè̆ gajă ḿî dèthasè̆, dèthèhtèd́òd́è̆, dèthodothakhò̆, dègodètra, dèd́òkè̆d́òô kî dè dè wè̄ dè sè̆ ńò tòcò gŏmihtĭda nu.

³² Khòthad́ò̆ hlèbò̄ lōwa, khòwè hlèbò̄ lōwa, b́ăplè hlèbò̄ lōwa adèmèkèḿè, acab́ô̆ Kib́ĭcè ò d́ŏ Krĭstu abu b́ăplègè thĭ dèmèkèḿè akhò̆ nu.

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ