အွန်လိုင်း သမ္မာကျမ်းစာ

Ephè̆sus 2 - Geba Roman New Testament

Dèhtaboge d́ŏ Dèthĭ

¹ Kî d́ŏ thĭ dè dò sòkhĕńe ńò kî thĭ dèkhòwè tòcò akhoacè̆, d́ŏ tha nu thĭ ḿî htŏ athĭ lò.

² B́ĕnu akhî thĭ lôkôgè Lākho adèkî̆kkèmèhlò̆ aklèthòò̆ abu, thĭ sòkhĕńegè dèscidèhnè htè aò Mò̄kholè̄ tòcò ab́ĭcè htè aŭi bija adò sòkhĕńe Kib́ĭcè alē ńò tòcò nu.

³ Ahnèhnè ḿî wa gŏ abwè nu wî ḿî acab́ô̆ cè tòcò akhò̆ kî wò òthôḿô̆gè b́ĕ ab́è wa tha, mègè acab́ô̆ we neb́î̆cè adèthaèni ò kî wè dègomogamā thè̆ wa adĕ nu. Wî ḿîgè acab́ô̆ Lākhopho alewe tòcò akhò̆, b́èkî wa gā khab́è Kib́ĭcè adèthèhtè lò.

⁴ Barasă d́ō, Kib́ĭcè adèkhòwèhmòb́è òè kî adèb́èlò̄sôgè wa akhoacè̆,

⁵ B́ĕ wî ḿî athĭgè d́ŏ thotha abu d́ŏ wè dèkhòwè kî dè dò sòkhĕńe ńò acè̆ akhè̆ nu, Zè mè thôḿô̆htagegè wa ploplo kî Krĭstu lò. Thĭ b́è mèhlô̆htage d́ŏ Kib́ĭcè adèhludètă abu nu.

⁶ Wò ò d́ŏ Krĭstu Jezŭ abu nu acè̆, Ca b́awè̄hto thôḿô̆htakô wa cab́ô̆htè wa gā sańă kî ŭi plobò̄ Cè d́ŏ Mò̄kho nu.

⁷ Kib́ĭcè mè dè gōjo ḿî cab́ô̆htè Cè kè̄ d́è̆lî̄hta zô alekă bija lŏcăcè Zu hlu Ca tă htè kô d́ôca do lō za ńò, Zè dèb́èlò̄ adoamu d́ŏ Jezŭ Krĭstu abu nu.

^8-9 Manè̄, Kib́ĭcè ahluată acè̆, thĭ nib́è dèhlô̆htage d́ŏ dèb́u abu, tè b́è d́ŏ thĭ dèmè acè̆ ńò, ḿî Kib́ĭcè adèila lò. Mègōnu d́ō, bija amò bè̄dobè̄mu ane tò ò dèbwè̆ ńò.

¹⁰ Manè̄ kò̄ d́òdo dō, wî ḿî Kib́ĭcè adèb́òla acukhwa, Cò b́òlagè wa cab́ô̆htè wò kò ò d́ŏ Krĭstu Jezŭ abu thôḿô̆ d́ŏ dèmè awîaè, htè Ca prahnèdòlògè wi nikhĭ wè gè̄ mèb́è tòcò nu.

Dèbwècè̆ d́ŏ Krĭstu Abu

¹¹ Thĭ htè aḿî bija aòla acab́ô̆ bwèthŭkupho tòcò, Jŭdapho htè ad́òla ane aphekhĭ b́è hô̆rîkî̆ d́ŏ anebî̆cè tòcò jogè thĭ, “Aphekhĭ tè b́è hô̆rîkî̆ ńò.” Gomohtanibò̄ hlĕ aŭsu nu, thĭ ḿîgè danè̄? nu.

¹² B́ĕnu akhè̆ thĭ ḿîwe bija adòbò kî Krĭstu lò. Thĭ ḿî bwènīd́ò kî thĭ tè b́èkja bija htè Kib́ĭcè rôhta tòcò ńò. Dèhmèla htè Kib́ĭcè ila Za bijakhwĭpho anikhĭ nu, atè b́èkja thĭ ńò kî thĭ ò thôḿô̆ Lākho jo d́ŏ dèsascĭmulè̄ tò ò ńò abu kî d́ŏ dè dî thîhè̆ Kib́ĭcè ńò abu lò.

¹³ Barasă khŏnujo, d́ŏ Krĭstu Jezŭ abu nu, thĭ htè adòbò kî Cè tòcò nu òb́ôhtîgegè Cè d́ŏ Ci thwi acè̆ nu.

¹⁴ Manè̄, Krĭstu thè̆ne leigè kè dèjīdèd́wă d́ŏ dèmèphî̆htage Jŭdapho kî bwèthŭkupho htĕ domo lò acè̆ nu. Ze neb́î̆cè thè̆ne mèladēphagè dèthèd́od́îd́ă, htè amèlapha thĭ kî amèthè̆d́ĕd́ògè thĭ tòcò nu.

¹⁵ Zè lè̄dakè̆gè Jŭdapho adèthôdèthò̆ kî dèhmèla tòcò nu cab́ô̆htè Za gā hna kèhtagebò̄ bija gīkhwĭ ḿî domokhwĭ be lò d́ŏ Zu bu, kî mèjīmèd́wăgebò̄ cè tòcò anikhĭ nu.

¹⁶ D́ŏ dèkhathĭ ane d́ŏ Krusu alò acè̆, Krĭstu mèkŭdugè dè dè wè̄ dè sè̆ lōwa ńò, kî Krusu ḿî cab́ô̆htè bija gīkhwĭ gè kèhtagebò̄ dikhwĭ lò, kî cè tòcò ka d́ab́agebò̄ ane d́ŏ Kib́ĭcè ò nu.

¹⁷ Krĭstu lela d́òŭd́ò̆sagè Vanzĕlō ab́èkja dèjīdèd́wă, d́ŏ thĭ bwèthŭkupho htè aòjî Kib́ĭcè kî Jŭdapho htè aòb́ôhtî Kib́ĭcè tòcò lŏcăcè anikhĭ nu.

¹⁸ D́ŏ Krĭstu acè̆, Jŭdapho kî bwènīd́ò, wa lŏcăcè lenī za d́ŏ wa Pa ahlò̆mò̄ d́ŏ Spirito Tcahtĭ dèbwècè̆ abu lò.

¹⁹ Gōnu akhoacè̆, thĭ htè aḿî bwènīd́ò tòcò nu, thĭ dî ḿîbe bijakhwĭpho alewe ńò, kî thĭ dî ḿî tî̆tèḿè̆ tòcò be ńò. Ḿî thĭ kèhtagè htĭphogepho jāthôthôkî Kib́ĭcè abijakhwĭpho kî Kib́ĭcè ahiphophăpho.

²⁰ Thĭ ḿîgè dèb́òhta akăhtî htè ad́ò̆lăgè d́ŏ Thodŏpho kî Prò̆fèt tòcò akho, kî Krĭstu Jezŭ thè̆ne ḿîgè hi dawa nu alokăd́ò̆ nu.

²¹ Zî ḿî aphòglo j́ăplo i dèb́òhta thèd́è̆mè̆ d́o, kî hna kèhtagè Kib́ĭcè Akjò̆do Tcahtĭ nu.

²² D́ŏ Krĭstu Jezŭ abu nu, thĭ b́è phoj́ăplo d́ŏ dèb́òhta ajo abu, htè dè ale d́ŏ Kib́ĭcè òi d́ŏ aSpirito Tcahtĭ nu.

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ