အွန်လိုင်း သမ္မာကျမ်းစာ

Dèd́è̆lî̄ 21 - Geba Roman New Testament

Mò̄kho Athè̆ kî Jerŭsalèm Athè̆

¹ Alekă ja tcahtî Mò̄kho athè̆ kî Lākho athè̆, Mò̄kho aŭsu kî Lākho aŭsu hlè̆mè̄gè kî pèllè tò ò be ńò.

² Ja tcahtî u atcahtĭ htè Jerŭsalèm athè̆, aò d́ŏ Mò̄kho Kib́ĭcè ò kî lagè, mè cab́ô̆ amihmu awîamò ara ane agī scĭi awa anikhĭ akhò̆ nu.

³ Mèhwă jî thîhè̆b́è dè alēsô akèwohta d́ŏ ana bu nu; “Khŏnujo, Kib́ĭcè ahi ò d́ŏ alle dokhlo lò htè bija Lākhopho ò alle nu. Cò kò òkôkò̆ lōwa tòcò akă, kî Zî gî̄ ḿîkò̆ lōwa tòcò Ab́ĭcè.

⁴ Zô gô̄ htô̆b́ăthô̆kò̆ lōwa agādŭhtĭ, dèthĭ kò tò ò bekò̆ ńò, dèohmŭora kò tò ò bekò̆ ńò, dèjodèha kî dèbadèsè̆ kò̄ tò ò bekò̆ ńò. Dè aò hlĕ aŭsu tòcò nu phlòtôlôlō htŏ.”

⁵ Alekă asańălăò d́ŏ Nabu dèbwè jî̄b́ègè; “Khŏnujo jò kò b́òlage dèlŏcăcè athè̆,” Cò d́ò; “Hwela dè ajo; Jò d́ò dè ajo tòcò ḿî aladilase kî agî̄ phî̆hta hnèhnè b́è.”

⁶ Alekă Cò d́ògè; “Dèhwălō htŏ! Jî ḿî Alpha kî Omega, Dè akăhtî kî Agudulă. Gajă bija athaò̆ tòcò nu Ji kī i hnahnăkò̆ cò ò̆ d́ŏ dèò ahtĭhtabū nu.

⁷ Bija htè anoabèdè tòcò anikhĭ dèmònib́è ḿî ajo lò. Jî gî̄ ḿîb́è cî B́ĭcè kî zi gî̄ ḿîkò̆ Jo pho.

⁸ Barasă bija adoscisă, amèkè̆ adèaḿăkhai, amèdè dècîṕôcithŏ, amèthĭ bija, ad́ŏthibwĭ, ad́òdòlò dègèlè, athèb́è̆ dèjòdèja, aplèahlŭdè tòcò anikhĭ ḿî dèthĭ gīpla tapla d́ŏ hmîŭ kî ka ahnò bu nu.”

Jerŭsalèm U Athè̆

⁹ Mò̄khobwèzo thăthô dèbwè aklè̆ dèbwè htè aòi gobo thăthôdèmè̆ aòpĕhtakî dèsè̆ agudulă thăthô dèdè̆ le jî̄b́èhtî jè kî cò d́ò; “Lebò̄ b́ĕjo kî jè kè d́èlî̄ nè amihmu agî̄ phî acukhò, htè Thŏpho phînigè dèbwè nu.”

¹⁰ D́ŏ Spirito Tcahtĭ abu za htaigè jè d́ŏ khòlò̆ ahtajîsô dèmè̆ akho kî d́è̆lî̄gè jè Jerŭsalèm, U tcahtĭ aò d́ŏ Mò̄kho Kib́ĭcè ò alagè,

¹¹ kî apĕhta kî Kib́ĭcè adòathe, ahlî̆hluhlî̆phru gè̄gòbrò mè acab́ô̆ lolīdobwîthè̆, ală kî loklôhlè̆, agèhlè̆ acab́ô̆ lomētca nu.

¹² U ahtărā do kî htajîthwi, khaglè̄do ò scigīb́è, d́ŏ khaglè̄ gŏ ab́è alò aò ḿî Mò̄khobwèzo dèbwè dèbwè kî d́ŏ khaglè̄ akho ahwela Israè̆lpho scigīkhwĭ ami.

¹³ D́ŏ Lumuhta dòkhò̆ khaglè̄ ò thŏ b́è, lò̄khĭ dòkhò̆ thŏ b́è, lò̄htè dòkhò̆ thŏb́è kî Lumula dòkhò̆ thŏ b́è, lŏlō khaglè̄ ò scigīb́è lò.

¹⁴ U ḿî ad́ò̆la d́ŏ akăd́ò̆ scigīmè̆ akho, kî d́ŏ lo gŏ amè̆ alò aò hwela Thŏpho abwè Thodŏpho scigībwè ami.

¹⁵ Mò̄khobwèzo ajî̄b́èhtî jè dèbwè òi htè̆ hnèd́ă tòb́ò̆ agô̄ gô gè̄ htè̆tca u kî akhaglè̄ kî ulāhtărā.

¹⁶ U ḿî ad́wăd́ŭ lwīkhò̆b́è lōlō, ahtô̆ kî akhò̆ ḿî dèzè̄ lò. Cô trô̆tca u kî zè hnèd́ă d́ō, ahtô̆ kî akhò̆ ò ab́ò̆hô dòthò̆ gīhtò, ahtajî dòkhò̆ ḿî gōnu lò lò.

¹⁷ Cô trô̆tca ulahtărā d́ō, ahtajî ògè dègèjè lwīscĭ lwīble, ḿî Mò̄khobwèzo mèi cuble anènò lò.

¹⁸ U htărā ḿî mētca loklôhlè̆, u ḿî htè̆tcă mè cab́ô̆ mētca agèhlè̆tîd́î nu.

¹⁹ U akad́è̆ ḿî ab́è d́òglè̄ i kî lomòra amŏamo, aŭsu tèkèplè ḿî mētca loklôhlè̆, gīkèplè tèkèplè ḿî htobā ad́e (loblè), thŏ keplè tèkèplè ḿî htolemēthò̆ akhothwi (lothĭ), lwīkeplè tèkèplè ḿî loklô,

²⁰ jè̄ keplè tèkèplè ḿî Pî̆bî̄mob́ă, akèplè thăthô ḿî thukŭdru athwi, thăthô tèkèplè ḿî lohnèthabă, akèplè lwīthô ḿî thè̆mè̄b́e, lwīthô tèkèplè ḿî lob́ă, akèplèsci ḿî loklôb́ă, scitèkèplè ḿî loklôhlè̆, scigīkèplè tèkèplè ḿî thè̆mè̄ gādŭ.

²¹ Khaglè̄do scigīb́è ḿî căgò̄hto, kî khaglè̄ tèb́è tèb́è b́è mèi căgò̄hto dèmè̆ dèmè̆ lò. Klè tòcò ḿî htĕ htè̆tcă lò kî apăsiri acab́ô̆ mētca nu.

²² D́ŏ u bu nu ja da tcahtî Zarādo ńò, manè̄ d́ō Kib́ĭcè Dèado Amèzadè lŏcăcè kî Thŏpho thè̆ne ḿî Zarādo akhoacè̆ nu.

²³ Kî udo loba Lumu kî hlè̆ ńò, manè̄ d́ō Kib́ĭcè adòathe hlî̆lab́è cè akhoacè̆ nu, kî Thŏpho ḿî zî hmîŭd́ŏ.

²⁴ Bija Lākhopho tòcò gè hèikôkò̆ Zè dèhlî̆ abu. Lākho asaphra tòcò gē leikò̆ dèlīdobwîthè̆ tòcò d́ŏ zu bu nu.

²⁵ U akhaglè̄do tòcò ò ab́ăhta thèd́è̆ni d́o, kî agè̄ tè b́è b́ò̆b́ikò̆ taplă ńò, manè̄, b́ĕnu Lumunèkhè̆ tò ò be dakhă ńò.

²⁶ Htĭge tòcò gē leikò̆ zè dèlīdobwîthè̆ kî ŭcalèkhjă tòcò nu.

²⁷ Dè adu rŭ ńò dimĭ gē de lenīb́èkò̆ abu ńò, kî bija htè amèdè amòcîpô kî adîdî̄dahma ńò tòcò de lenīb́èkò̆ dèbwè̆ ńò ńò. Ḿî bija htè ami b́è sela d́ŏ Thŏpho adèthôḿô̆ acèbu tòcò lò.

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ