အွန်လိုင်း သမ္မာကျမ်းစာ

2 Thèssalò̆nika 2 - Geba Roman New Testament

Bija Akî̆kkè Dèbwè

¹ Thè̆buthè̆we tòcò, ab́èkjakî B́ĭcè Jezŭ Krĭstu gē lela kî joplo kè awîakè̆ nu, ja damòb́è thĭ gōjo lò.

² Dè gò̄ hlòni thĭ d́ŏ Kib́ĭcè gā lagè nu, ò pĕhtakîbò̄ ḿè dèthadîwî̄dewe kî dèb́èhjŏb́èma ḿè. Dè ajo awîakè̆ nu, bija gō gomothòrò̆ wî jî̄b́è Prò̆fèt adèjî̄b́è ḿîwî, wò d́ò̆htôla do ḿîwî, we hweni thĭ cèborŏ abu ad́ò gōnu ḿîwî lò.

³ Ibò̄ ḿè bija hlòniplèni thĭ d́ŏ dè dimĭ dimi, bija Dèbwè̆ dèbwè ḿè. Manè̄, dukhlŭkî B́ĭcè Amuni b́è hnî̆ńò nu, dèhtad́ĕd́òdo agudukă dukhlŭ òhta hnî̆ńò kî bija akî̆kkèmèhlò̆gudŭ htè agē le d́ŏ Larrā dèbwè gò̄ pòhta we.

⁴ Zè gè̄ bè̄htajî ze ne d́ŏ gajă amihtani B́ĭcè, dè htè bija thub́uhtathèb́è̆hta lŏcăcè tòcò nu akho, za gā htad́ĕd́ò b́icè alewe tòcò nu, ze gē lenī sanălăò d́ŏ Kib́ĭcè aZarādo abu, kî cò kò d́òla ze ne Kib́ĭcè.

⁵ B́ĕ jò òkôwe thĭ kă akhè̆ nu, jò d́ò̆sa dèjwèjwèi thĭ dèwîdèkè̆ ajo tòcò nu, thĭ do gomohtani be ńò ā?

⁶ Cab́ô̆htè dè gè̄ dè mèbò̄ ane khŏnujo hnî̆ńò anikhĭ dè amèd́îd́ă òwe, anu ḿî danè̄ nu thĭ thîhè̆ tèpwè. Dè asŏakhè̆ kè b́èkò̆ bija akî̆kkèmèhlò̆gudŭ dèbwè pòhta nu.

⁷ Khŏnujo dèkî̆kkèmèhlò̆ gemeelô huzògè, nòthò̆ hnò̆nu, amèd́îd́ă dè dèbwè kè̄ b́è thodòbò htŏ khaĺè dè gè̄ mèb́èkò̆ ane.

⁸ Anu tapla bija akî̆kkèmèhlò̆gudŭ dèbwè pòhtakò̆, kî b́ĕ B́ĭcè Jezŭ lela nu, Zè gè̄ mèthĭi lōwa kî Zò hòbŭ adèthèhta lò. B́ĭcè adòathe gè̄ mèkè̆mèhlè̆mè̄kò̆ cè lò.

⁹ Bija akî̆kkèmèhlò̆gudŭ dèbwè gî̄ phîni Mod́èlî acô̆thèlè̆, kî cè kè̄ d́è̆lî̄htakò̆ dècòklî, dèhtèdômô̄dahmă aplèni dè amŏamo,

¹⁰ kî zò gò̄ hlòniplènikò̆ bija d́ŏ ab́èthĭb́èhlè̆mè̄ hèwî̄hèkè̆thĕbwe tòcò nu. Cè tòcò gī thĭ b́è hlè̆mè̄ b́èkò̆ d́ŏ atè b́èlò̄ adî phîni dèdî̄dèhma htè amèhlô̆htage cè ńò acè̆ nu.

¹¹ D́ŏ dènu akhoacè̆, Kib́ĭcè gō thodŏlekò̆ dègomo d́ŏ athè̆kèḿè cè acô̆thèlè̆ mèdè d́ŏ zu bu tòcò kî cu kū b́u lŏtholŏtha dèaplè tòcò nu anikhĭ,

¹² kî bija htè atu b́u dèdî̄dèhma ńò, kî amèmòmèmai ane dèkhòwè tòcò nu kè̄ b́è cirrakò̆ gŏ abwè lò.

Thĭ B́èrôhta d́ŏ Dèhlô̆htage Anikhĭ

¹³ Thè̆buthè̆we B́ĭcè Jezŭ b́èlò̄ tòcò, wò mò htăi Kib́ĭcè adèhludètă d́ŏ thĭ kho thĭ cè̆ lò. Manè̄, Kib́ĭcè rôhta ŭsu thĭ agī nib́è dèhlô̆htage d́ŏ Kib́ĭcè aSpirito Tcahtĭ acô̆thèlè̆ abu, d́ŏ thĭ b́ugè dèdî̄dèhma akhoacè̆, thĭ gè̄ kèhtab́è bija tcahtĭ nu.

¹⁴ B́ĕ wò d́ò̆sa thĭ Vanzĕlō nu, Kib́ĭcè jogè thĭ cab́ô̆htè thĭ gī nib́èbò̄ B́ĭcè Jezŭ Krĭstu adòathe nu.

¹⁵ Gōnu akhoacè̆, thè̆buwe tòcò, sò̆hto hmehmebò̄, phîglobò̄ dèdî̄dèhma htè wè thèhlô̆ thĭ, d́ŏ dèd́ò̆htôla abu kî d́ŏ wè dèhweni thĭ cèborŏ abu tòcò nu.

¹⁶ B́ĭcè Jezŭ Krĭstu kî Pa B́ĭcè htè ab́èlò̄ kè adèhludètă acè̆, thĭ gī nib́è d́ò̆è tha adèkhŭdèhè̆ pĕhtazòhta kî dèmulè̄sascĭ ahmeaglo,

¹⁷ ikhoiă thĭ kî lè̄sôhta thĭ tho thĭ tha cab́ô̆htè thĭ gè̄ mèbò̄ dè aè kî thĭ kò d́òbò̄ dè ab́è lò nu.

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ