အွန်လိုင်း သမ္မာကျမ်းစာ

2 Kòrĭn 2 - Geba Roman New Testament

¹ Gōnu akhoacè̆, cab́ô̆htè jè gè̄ dè mè dò mòtha b́èbò̄ thĭ ńò anikhĭ, jè lè̄lagè ja tha agē de lehtî be thĭ ńò.

² Jè gè̄ mè dò mòtha thĭ ńò d́ō, amèthaganāi jè bò̄bwè kò ò d́ò̆ bwè?

³ Je gē lehtî thĭ kî mè dò mò b́è bija htè amèthaganāi jè tòcò atha ńò nu ada thaèni jè ńò akhoacè̆, je hwenigè thĭ cè. Manè̄, ju b́u thĕbwe d́ŏ ja gā thaganāi d́ō, thĭ ḿî ḿî thĭ gā thaganāikô gŏ abwè lò lò.

⁴ Je hweni thĭ cè ò kî dègodègè̄, tholab́othaladā kî gādŭhtĭ la; barasă tè b́è dèmè dò mòtha thĭ anikhĭ ńò, ḿî jè b́èlò̄ thĭ lŏcăcè pwedè̄ nu thĭ gî̄ thîhè̆bò̄ anikhĭ lò.

Dèb́ăplè Bija Adèkèḿè

⁵ Khŏnujo, bija dèbwèbwè gè̄ mè dò mò alewe dèbwè atha d́ō, tè b́è zè mè dò mò ja tha lò ńò, ḿî thĭ lŏcăcè tîkîtòkò̆ lò lò. (Jò d́ò ma gōjo nè? Ḿî thĭ gī tî grî̄bò̄ cè ńò anikhĭ nu.)

⁶ Bija gōjo dèbwè anikhĭ bija òè̆bwè adèlè̄da cè nu ab́ènibòni htŏ.

⁷ Khŏnujo, cab́ô̆htè zo gō to othoothab́èbò̄ azî̄azô̄ ńò nu, takî thĭ b́ăplè zè dèkèḿè kî ikhoiăgebò̄ cè.

⁸ Ja damòb́è thĭ d́ŏ thĭ kī ithîhè̆bò̄ cè htè thĭ b́èlò̄ thĕbwe tèpwè cè nu.

⁹ Je hwenigè thĭ cè ḿî ja thaè thîhè̆ thĭ khakèhta dèhlòdèplè pwedè̄, kî thĭ prahnèsèhnè tèpwè thĭ ne agè̄ mèkô jè dèd́è̆lî̄ thĭ klè nu ā? ńò ā?

¹⁰ Thĭ ka b́ăplè ma bija dèbwèbwè adèkèḿè d́ō, jè ḿî ḿî ja gā b́ăplè tèpwè cè cè. Manè̄ ale ḿî ò d́ŏ ja ka b́ăplè hnèhnè dimimi d́ō, ja ka b́ăplè cè d́ŏ Krĭstu ahlò̆mò̄, d́ŏ thĭ cè̆ lò.

¹¹ Cab́ô̆htè Sătana di nib́èbò̄ akhwè akò ò d́ŏ wo kho ńò nu. Manè̄ wî thîhè̆ zè dèkŏhtakjala tòcò lò.

Păulu Adèb́èhjŏ b́ĕ Trŏas

¹² B́ĕ je ledo Trŏas cab́ô̆htè jò kò d́ò̆htôla Krĭstu Adèthalōthalai Awîakè̆ nu, jè kèhtîb́ègè B́ĭcè b́ăhtagè klè d́ŏ Zè dèmè b́ĕnu anikhĭ.

¹³ Barasă dō jè dè kèhtî wè thè̆buwe Tĭto b́ĕnu ńò akhoacè̆, ab́èhjŏb́èmasôgè jè. Ju hnŭsè hwă upho aò b́ĕnu tòcò d́ō, je legè d́ŏ Macedŏnia age nu.

Dènodèbè dŏ Krĭstu abu

¹⁴ Barasă, htăhtaibò̄ Kib́ĭcè ahluată. Manè̄, Krĭstu Adènodèbè dèkhapwè̆khala asŏakhè̆ nu B́ĭcè thè̆le thèjô̆ wa acab́ô̆ ab́èphòb́ècŏ tòcò, ploplo kî Krĭstu akhoacè̆ nu. Zò sòthŏi wa acab́ô̆ wa gè̄ kèhtabò̄ Krĭstu adèhnŭẃi d́ŏ alle dagwālè̄ nu.

¹⁵ Manè̄ kò̄ d́òdo dō, wî ḿî acab́ô̆ dèhnŭẃi htè Krĭstu hluhta d́ŏ Kib́ĭcè aò, htè ahnŭẃi ni dagwālè̄ bija anib́è htŏ dèhlô̆htage tòcò kî bija htè ahèkè̆hlè̆mè̄ tòcò nu.

¹⁶ Bija htè ahèkè̆hlè̆mè̄ tòcò nu anikhĭ ḿî acab́ô̆ dèhnŭthŏhnŭkhè htè amèthĭmèhlè̆mè̄ dè, kî bija anib́è htŏ dèhlô̆htage tòcò anikhĭ ḿî acab́ô̆ dèhnŭẃi htè ai dèthôḿô̆ nu. Mègōnu d́ō, bò̄bwè mè za d́ò̆ dè gōjo dèbwèbwè?

¹⁷ Wi dî ḿî acab́ô̆ bija alewe òèòò, htè ahè sè̆lă Kib́ĭcè Alēahwè acab́ô̆ dè alīabwî tò ò ńò akhò̆ nu ńò. Ḿî Kib́ĭcè thè̆le wa akhoacè̆, wi jî̄b́è d́ŏ Zò hlò̆mò̄, òkî thotha adèhlî̆dèpla, acab́ô̆ Krĭstu akhî̆abwè tòcò nu.

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ