အွန်လိုင်း သမ္မာကျမ်းစာ

2 Kòrĭn 12 - Geba Roman New Testament

Păulu Adètcahtî

¹ Akhlŏhtamame tò ò nòthò̆ ńò hnò̆nu, ja gā htăi b́è tèpwè we je ne ā? Ḿî jò kò d́ò d́ò̆ dètcahtî kî dèd́è̆lî̄ d́ŏ Dèado ò nu dòkhò̆.

² D́ŏ Krĭstu abu nu jî thîhè̆ bija ò dèbwè, htè aphlòtôlô hwă scilwīd́e nu b́è zāhtagè d́ŏ Mò̄kho ahtajî gudŭ nu. (Ḿî amè thĕbwe ane ā? Ḿî dè dètcahtî ā? nu jî dî thîhè̆ ńò. Athîhè̆ ḿî Kib́ĭcè dèbwè lò.)

^3-4 Jò d́òwe, jî thîhè̆ htè bija ajo dèbwè b́è zāhtagè d́ŏ Aparadĭzo nu kî zî thîhè̆b́ègè dè htè kò tò d́ò̆sa za bija lākhopho alēahwè ńò nu. (Ḿî amè thĕbwe ane ā? Ḿî dè dètcahtî ā? nu jî dî thîhè̆ ńò. Athîhè̆ ḿî Kib́ĭcè dèbwè lò.)

⁵ Ja gā htăikò̆ bija anu dèbwè nu, akè b́è ji nikhĭ nu, ja htăikòi jè dèthò̆jò̄bò̄la tòcò lò.

⁶ Ja gā htăi ma je ne d́ō, ju du gudu b́è ńò, kî ḿî jò d́ò dè ab́è lò. Barasă ja da htăi tèpwè je ne ńò. Manè̄ d́ō, cab́ô̆htè bija dèbwè̆ gō do gomodobò̄ jè d́olĭkî za tcahtîb́è jè dèphîdèmè kî thîhè̆b́è jè dèjî̄b́è tòcò nu ńò anikhĭ lò.

⁷ D́ŏ jè kèhtîb́è dèd́è̆lî̄ acòklî òè̆mo akhoacè̆, cab́ô̆htè jè gè̄ dè bè̄htahtô̆bò̄ je ne ńò anikhĭ nu, dèilanigè jè dèsu d́ŏ jî hîklè̆ nu deble, Sătana Abwèzo debogè jè, cab́ô̆htè jò sò̆tab́a jî̄b́è htajîthwi nu.

⁸ D́ŏ dèjo acè̆ ja damò B́ĭcè thŏpla d́ŏ agī phîkè̆nibò̄ jè nu.

⁹ Ḿî Cò d́ò jè, “Ju hlu Ja tă ḿî asô̆isèi ni nikhĭ; Jo kho Ja ă ḿî aò d́okhlŏ d́ŏ dèthò̆jò̄bò̄la abu nu!” Mègōnu, jè dèthò̆jò̄bò̄la gî̄ ḿîkò̆ jè dèhtăi ane cab́ô̆htè Krĭstu akhoaă kò ò jo kho.

¹⁰ Ja thaganāi tèpwè d́ŏ jè dèthò̆jò̄bò̄la abu, jè b́è dègòsè̆lèwè̄, khab́è dèssègnè̆bòdò, dèlômèssègnè̆ kî dèbadèsè̆ d́ŏ Krĭstu anikhĭ lò. Manè̄ d́ō d́ŏ dèthò̆jò̄bò̄la abu nu jo kho ja ă ò.

Păulu Adèb́èhjŏb́èma

¹¹ Jî jî̄b́ègè acab́ô̆ ablu dèbwè nu. Ḿî thĭ hna no hnab́è jè agè̄ mègōnu lò. Thĭ ḿî bija athodŏ jè tòcò nu. Jî dî ḿî nòthò̆ bija dimĭ ńò hnò̆nu, ja da ladò d́olĭ tèpwè Thodŏphodo tòcò ńò.

¹² Jè d́è̆lî̄hta htŏ thĭ hlò̆mò̄ htè jî ḿî Thodŏpho adî̄ahma dèbwè d́ŏ dècòklî kî dèbòdèba amŏamo d́ŏ dèthozôthazô abu htŏ.

¹³ D́olĭkî Dèòplo alewe tòcò nu thĭ nib́è dè ajòla òbò̄ domomo ā? Jî dî ḿî thĭ nikhĭ dèhtodèba ńò tè b́è ńò ā? Ajo akhoacè̆ b́ăplèbò̄ jè.

¹⁴ Jò ò aprahnè agē lepôd́ŏhtî thĭ thŏpla tapla be, kî jî dî ḿîb́è be thĭ nikhĭ dèhtodèba ńò, ja thaèni thĭ lò, tè b́è thĭ dèhtò̆dèla ńò. Pholi tòcò tu pulacò̆hta b́è mo pa anikhĭ ńò, ḿî mo pa tòcò pulacò̆hta b́è pholi anikhĭ dòkhò̆.

¹⁵ Ja thaè ila lŏtholŏtha je ne kî dè arră aòni jè nu. Jè kè b́èlò̄ d́okhlŏ thĭ d́ō, thĭ kè̄ b́è b́èlò̄ tîkîpho jè ā?

¹⁶ Jî dî ḿî nòthò̆ dèhtodèba thĭ nikhĭ ńò hnò̆nu; bija dèbwèbwè kò d́ò ma jè ḿî alîḿakakwè̆ kî ahlònigè thĭ d́ō,

¹⁷ d́ŏ jè dèthodŏle bija d́ŏ thĭ ò nu, ḿî jò hlòplèab́ègè thĭ ā?

¹⁸ Ja hnanohnabègè Tĭto kî thodŏleplogè jò khò̆ dèbwè d́ŏ thĭ ò nu. Tĭto gò̄ hlòplèa za thĭ ā? Thĭ dî thîhè̆ htè cè kî jè, wa thalajīplo kî wè hèkôgè klè tòb́ò̆ lò nu ńò ā?

¹⁹ Thĭ gō gomothòrò̆ wa kasèwāsèi we ne thĭ hlò̆mò̄ dôjôjô̆ lò lòmò̄. Tè b́è gōnu ńò. Acab́ô̆ Krĭstu adèthaèni ò adĕ nu, wî jî̄b́è d́ŏ Kib́ĭcè ahlò̆mò̄ lò. B́èlò̄ thĭ, Ŏ thè̆buthè̆we tòcò, wè mè dèlŏcăcè ḿî thĭ nikhĭ dòkhò̆.

²⁰ Je b́èhjŏb́èma ḿî b́ĕ jo dolehtî thĭ nu, ja ka pahtî thĭ acab́ô̆ tè b́è ja thaè pahtî ńò, kî thĭ ka pahtî jè acab́ô̆ tèb́è thĭ thaè pahtî ńò nu. Jè b́èhjŏ d́ŏ ja gā tcahtîb́è dèhtadohtara, dèthaklathasè̆, dèthèhtèd́òd́è̆, dèb́èlò̄lage ane, dèkhlòdèjo, dèd́òmēseṕwè, dèbè̄htahtô̆ ane kî dègòthò̆gòrò kò òhta thĭ klè̆ nu.

²¹ Jè b́èhjŏb́èma ḿî b́ĕ jo gō do tapla be nu, Kib́ĭcè gè̄ mè thăwā jè d́ŏ thĭ hlò̆mò̄, jo gō jo gā ha b́è d́ŏ bija amè hwă dèkhòwè d́ŏ dècîpôcîthŏ, dèlathulakèḿè kî dèhmupòhtòî aklè̆, agā da salage atha ńò tòcò akhoacè̆ nu lòmò̄ jo gomo do.

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ