အွန်လိုင်း သမ္မာကျမ်းစာ

1 Thèssalò̆nika 2 - Geba Roman New Testament

Păulu Adèphîdèmè b́ĕ Thèssalò̆nika u

¹ Thè̆buthè̆we tòcò, thĭ thîè̆ tèpwè htè je lehtî thĭ asuapa tò ò tèpwè ńò nu.

² Dèsè̆kî we le Thèssalò̆nika u hnî̆ńò nu, wè b́è dèlômèssègnè̆, dègòsè̆lèwè̄ d́ŏ Philippiăno u nu cadè̄ thĭ thîhè̆ tèpwè. Bija htad́ĕd́ò wa azî̄azô̄ nòthò̆ hnò̆nu, wi Kib́ĭcè iwa dèkhŭdèhè̆ cab́ô̆htè wò kò d́ò̆sabò̄ thĭ Vanzĕlō htè aò d́ŏ Cò ò ala dèdè̆ nu.

³ Wò d́ò̆htôlani thĭ tòcò nu tè b́è d́ŏ dè akèḿè abu kî dèlè̄tha adî wî tè è ńò abu dimĭ ńò. Wa da thaè hlòhlî̆hlòplè bija dèbwè̆ ńò ńò.

⁴ Ḿî wi jî̄b́è dèjî̄b́è htè Kib́ĭcè thaèni wò d́ò tòcò nu, manè̄, Zè bè̄lagè wa asciatakî akè b́è̆lăni Zè Vanzĕlō wu cukhò bu nu. Wu du wuthè̆dèba d́ŏ wè gè̄ mèdè htè ab́è bija atha nu ńò, ḿî Kib́ĭcè htè akèhtî wa thaobu adèb́ètha dòkhò̆.

⁵ Thĭ thîhè̆ tèpwè htè we lehtî thĭ dî ḿî d́ŏ dèkòihtăi thĭ wò lòmòphekho anikhĭ ńò, kî wi di jî̄b́è kî mèmômā we ne d́ŏ dèthaènido acè̆ ńò nu Kib́ĭcè thîhè̆ tèpwè.

⁶ Wa da thaèni dèkòihtăi dŏ thĭ ò kî bija alewe tòcò ò dèbwè̆ ńò.

⁷ Acab́ô̆ wî ḿî Krĭstu abwè Thodŏpho tòcò nu, wò mò nib́è ò wa da za tèpwè. Barasă, wè dè mègè ńò. B́ĕ wò òkô thĭ kă akhè̆ nu, wò òcoòmòihŭ tèpwè thĭ acab́ô̆ mo tcai apho akhò̆ nu lò.

⁸ Wè b́èlò̄gè thĭ akhoacè̆ d́ō, wò ò prahnè we ne tè b́è htĕ Vanzĕlō lò ńò, ḿî wa thathôḿô̆ hnò̆nu wi ki ila thĭ nikhĭ nu.

⁹ Thè̆buwe tòcò, wè mè sòẃè̆b́è̆thagè pwedè̄ nu, thĭ gō gomohtani tèpwè. Cab́ô̆htè thĭ dèb́i gō do htobò̄ ńò anikhĭ nu, wè mèa wu lu wò sò munènè musè̆sè̆ kî d́ò̆htôlanigè thĭ Kib́ĭcè Adèthalōthalai Awîakè̆.

¹⁰ Thĭ kî Kib́ĭcè ḿî bija akhathè̆thî wi nikhĭ, htè dŏ wè mèni bija ab́u Krĭstu tòcò, ḿî dèmè awîab́è, adî̄ahma kî ahlò̆thîrî̆ kî dè agumukèḿè tòcò nu.

¹¹ Thĭ thîhè̆ tèpwè wè mèni thĭ dèbwè, dèbwè, acab́ô̆ mo pa mèi apho adĕ nu.

¹² Wi isôhta thĭ kho thĭ ă, wò d́òkhŭd́òmò thĭ, wa thakăhta thĭ dèjwèjwè, cab́ô̆htè thĭ kò ò thôḿô̆bò̄ dè b́è B́ĭcè atha, B́ĭcè htè ajo thĭ cab́ô̆ thĭ gī nib́èplo Zi htĭ Ze ge kî Zò dò Ce the nu.

¹³ Dè alewe domo ḿîwî thîhè̆htage ma Kib́ĭcè thèjô̆ nè nu. B́ĕ we lei thĭ B́ĭcè Adèthalōthalai Awîakè̆ nu, thĭ thîhè̆ kî thĭ phînigè, cab́ô̆htè aò d́ŏ Kib́ĭcè ò alagè nu, kî tè b́è acab́ô̆ aò bija ò ala ńò nu. Manè̄ d́ō, Kib́ĭcè mèdè d́ŏ thĭ ab́udè tòcò abu acè̆ nu.

¹⁴ Thè̆buthè̆we tòcò, dè htè thĭ kèhtîb́è tòcò nu, mè acab́ô̆ Kib́ĭcè adèòplo aò Jŭdage tòcò kèhtîb́è htŏgè nu. Thĭ khab́è dèmèssègnè̆bòdò thĭ d́ŏ thĭ khwĭpho jāthô domŏ lò acukhòbu acab́ô̆ Jŭdapho tòcò khab́ègè d́ŏ akhwĭpho jāthô acukhòbu akhò̆,

¹⁵ htè amèthĭgè B́ĭcè Jezŭ kî Prò̆fèt tòcò nu, kî alômèssègnè̆ wa tòcò nu. Cè tòcò mè dòmògè Kib́ĭcè atha ńò pwedè̄.

¹⁶ Cè tòcò mèd́îd́ă wè klè cab́ô̆htè wò kò d́ò̆htôlanibò̄ bwèthŭkupho tòcò dèhlô̆htage Awîakè̆ Ńò nu. Dè ajo ḿî zè mè pĕhtazòhtagè dèkhòwè lŏcăcè htè zè mènènògè nu. Kî khŏnujo Kib́ĭcè adèthadohta ledohtî htŏ cè tòcò htŏ.

Păulu Thaè lehtî Cè tòcò Athè̆ Tapla be

¹⁷ Thè̆buwe tòcò, ḿî wa nu, b́ĕ wò òjîkî thĭ d́ŏ we neb́î̆cè kî tè b́è wè dègomo abu ńò nu, wo gomoi thĭ azî̄azô̄ kî wè mègè cab́ô̆htè wa gā tcahtîhlèb́è kòd́ò̆ lōwa athè̆ tapla be nu.

¹⁸ Wa thaè lehtî tèpwè thĭ. Je neb́î̆cè thè̆ne ja thaè lehtîwe nòthò̆ thĭ asciphogudu tapla be hnò̆nu, Mod́èlî adèmèd́îd́ă ògè.

¹⁹ Thĭ gomo d́ŏ wè bè̄htahtô̆i we ne kî danè̄? Ḿî tèpwè thĭ lò. Thĭ ḿî wè dèmèbè agèlè htè wè bè̄htahtô̆i we ne thĭ khothĭ cè̆ adogudŭ ḿî b́ĕ B́ĭcè Jezŭ gē lelakò̆ d́ŏ Zò hlò̆mò̄ nu.

²⁰ Athĕbwe hŏ, thĭ ḿî wè dèbè̄htahtô̆i we ne kî wè dèthalōthalai lò!

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ