အွန်လိုင်း သမ္မာကျမ်းစာ

1 Kòrĭn 6 - Geba Roman New Testament

Krĭstupho tòcò Le d́ŏ Adècirra alle

¹ D́ŏ thĭ klè̆ nu, bija dèbwèbwè gè̄ mè akhò̆ dèhmŭ d́ō, thôrô̆ ze gē le d́ŏ bija tcahtĭ tòcò ahlò̆mò̄ nu, ze gē lehta d́ŏ bija adîdî̄dahma ńò tòcò adècirra alle nu cadè̄?

² Acab́ô̆ thĭ thîhè̆ atherĕ nu, bija tcahtĭ tòcò ḿî agī cirra b́è Lākho tòcò nu, thĭ ta tani agī cirra dèhmŭ asciaze tòcò ńò cadè̄?

³ Wî ḿî agī cirra b́è Mò̄khobwèzo tòcò papa akhoacè̆, wi cirra kèhta gŏ amuni adèhmŭdèra tòcò nu nu,

⁴ barasă b́ĕ thĭ htèglè̄ni dèhmŭdèra anu tòcò nu, bija htè thĭ lè̄hta agī cirra dèhmŭ tòcò nu hnò̆nu di nib́ègè dèd́ŏdèj́a d́ŏ Dèòplo abu ńò.

⁵ Thĭ mò thăwā d́ŏ thĭ klè̆ nu, amèd́wăge kèhta thè̆buwe tòcò azo tò ògè dèbwè̆ ńò ā?

⁶ Gōnu akhoacè̆ thè̆buwe dèbwè le mèb́è dèhmŭ d́ŏ adèb́u tò ò ńò tòcò ahlò̆mò̄ nu ā?

⁷ Thĭ mèhmŭdura lōwa ḿî amèni thĭ dèsudèpa lŏklikli d́o htŏ. Thĭ ḿîb́è dèmèkèḿè thĭ d́ō atè è d́osèbò̄ dòkhò̆ ńò a? Dè ka ăwūăthèphlè thĭ ḿî atè è d́osèbò̄ nā?

⁸ Ḿî thĭ mè tè b́è hlè dò̆ lōwa, thĭ ăwūăthèphlè hlè d́ŏ lōwa kî mègè ab́udè tòcò gōnu lò lò.

⁹ Thĭ thîhè̆ tèpwè htè bija amèdè atè b́è ńò nu di nib́è Kib́ĭcè ahtĭage ńò nu, htè bija adèò khorokhara tòcò, athèb́è̆ dèjòdèja tòcò, alathulakèḿè tòcò, azòlò̄ôè̆ tòcò, ad́ŏthibwĭ tòcò,

¹⁰ a ahudè tòcò, adèthaèni do tòcò, aò̆hmuapò tòcò, adohôdohò̆ dè tòcò, kî aăwūăthèphlè dè tòcò, nu di nib́è Kib́ĭcè ahtĭage ńò.

¹¹ Hlĕ athè̆lè̄kho nu d́ŏ thĭ klè̆ tòcò cò ḿîgè gōnu, barasă khŏnujo thĭ dèkhòwè b́è ŭsab́ăthab́ă htŏ kî d́ŏ B́ĭcè Jezŭ Krĭstu kî B́ĭcè aSpirito Tcahtĭ abu thĭ b́è mèjīmèdwăgè kî Kib́ĭcè nu.

Dèd́ŏthibwĭ

¹² Bija tòcò kò d́ò, “D́ŏ ji nikhĭ nu dè mèd́îd́ă tò ò bakho dimĭ ńò,” ab́èhŏ, barasă tèb́è dè gŏmimi ḿî dè aè lŏ ni nikhĭ ńò. Jò òlakô tèpwè htè ji nikhĭ nu dè mèd́îd́ă tò ò tèpwè ńò nu, barasă ji ti i dè kū ŭi jè dimĭ ńò.

¹³ Tòcò kò d́ò, “Dèadèò̆ ḿî gū phŭ anikhĭ kî gū phŭ ḿî sèasèò̆ anikhĭ lò.” B́èhŏ, barasă Kib́ĭcè gî̄ phîkè̆kò̆ cè gīmo lōlō. Ge neb́î̆cè ajo zî dî ḿî dèd́ŏthibwĭ anikhĭ ńò, ḿî B́ĭcè anikhĭ dòkhò̆ kîd́ò̆ B́ĭcè ḿî ge neb́î̆cè anikhĭ.

¹⁴ Kib́ĭcè htè ab́awè̄htoge B́ĭcè d́ŏ dèthĭklè̆ dèbwè nu, d́ŏ Zè dècô̆thèlè̆ abu kā b́awè̄htogekò̆ wa wa.

¹⁵ Thĭ thîhè̆ tèpwè htè thĭ ḿî Krĭstu thèd́è̆bwè anebî̆cè dèdè̆ dèdè̆ ladū, mègōnu d́ō, jî gî̄ phî hwă Krĭstu anebî̆cè dèdè̆ dèdè̆ kî b́è̆plo zabò̄ cè kî momarè ā? Pĭpi ńò.

¹⁶ Acab́ô̆ thĭ thîhè̆ adĕ nu amikhŏ alekôgekô momarè dèbwè nu, zè mèphî̆htagè ze ne kî lōwa dèbwè lò. Manè̄, acab́ô̆ dèd́ò ò nu, “Bija gībwè phî̆htagè dèphedèhî dèdè̆ lò,” nu.

¹⁷ Ḿî bija ab́èlè̄plo B́ĭcè dèbwè nu zî ḿî dètha dèdè̆ be lò.

¹⁸ Sèkô̆nibò̄ dèd́ŏthibwĭ ale. Bija mè dèkhòwè ḿî d́ŏ neb́î̆cè akhlŏ nu, ḿî dèd́ŏthibwĭ adèkhòwè ḿî bija htad́ĕd́òge dò̆ anebî̆cè lò.

¹⁹ Thĭ thîhè̆ tèpwè htè thĭ neb́î̆cè ḿî Spirito Tcahtĭ aZarādo nu, Spirito Tcahtĭ ḿî thĭ nib́è d́ŏ Kib́ĭcè ò aò thĭ bu nu. Thĭ dî ḿî thĭ è̆ ńò.

²⁰ Thĭ b́è bwî dokhakho kî līdobwîthè̆gè dòkhò̆. Mègōnu d́ō, thĭ gè̄ mèib́è thĭ neb́î̆cè Kib́ĭcè adòathe anikhĭ lò.

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ