1 Kòrĭn 4 - Geba Roman New Testament

Krĭstu Abwèthodŏpho tòcò

¹ Bija gō gomo wa acab́ô̆ Krĭstu azôabwè, bwèzô anib́è Kib́ĭcè adèòhu tòcò nu.

² Bwèzô gōnu tòcò mò òi thotha adî̄ahma d́ŏ cî b́icè akho lò.

³ Tè b́è htĕ bija adècirraphame abu lò ńò. Pwe je ne hnò̆nu ji di cirraphame cè ńò.

⁴ Ja thaobu tò d́ò̆sa tèpwè jè htè jè b́è b́ahlô̆ htŏ nu ńò ńò. Acirra jè ḿî B́ĭcè dèbwè lò.

⁵ Cirraphame darază ḿè dè ḿè. Òsô̆wô̄bò̄ htô̆ B́ĭcè dole nu. Zî gî̄ hlî̆lakò̆ dè d́ŏ aòhuòzò dèkhiklè̆ tòcò nu kî d́è̆lî̄htakò̆ bija adègomo ahuazò tòcò nu. Akhî kè b́èkò̆ htè bija dèbwè dèbwè ladū gī nib́èkò̆ Kib́ĭcè adèhtăhtai pwĕ ca ta nib́è nu.

⁶ Thè̆buwe tòcò, acab́ô̆ jò d́ò hwă htŏ nu, jî phî Apò̆llòs kî je ne acab́ô̆ amò tcad́ò̆kô, kî thĭ gî̄ mèhlô̆ nibò̄ dèd́ò htè, “Lôkôbò̄ dèhmèla ab́èabò,” nu. Thĭ da ta bè̄dobè̄mu bija dèbwè kî tcadalakă alewe dèbwè ńò.

⁷ Bò̄bwè mèni nè agò̄ còklîlasă d́olĭ bija lewe bwè? Aila nè dèlŏcăcè ḿî Kib́ĭcè tè b́è ńò ā? Thĭ dènib́è tòcò acè̆, thĭgè bè̄htahtô̆ zabò̄ thĭ ne mè acab́ô̆ dè ti ilani thĭ ńò nu ā?

⁸ Thĭ thaèni dè arră aòni htŏ thĭ nu ā? Thĭ ḿîgè bija ajèdā htŏ ā? Thĭ phî̆htagè saphrŏsaphra ā? Ja thaèni tèpwè htè thĭ ḿî sophrŏsaphra tòcò dòkhò̆, kî wi gî̄ ḿî sophrŏsaphra ploplo kî thĭ nu.

⁹ Acab́ô̆ ab́è cirrathĭgè d́ŏ bija lŏcăcè ahlò̆mò̄ tòcò leb́èkò̆ akŭdulă akhò̆ nu, ală ḿî Kib́ĭcè ilagè wa Zè Bwèthodŏpho tòcò dèlle akŭdulă, cab́ô̆htè bija kî Mò̄khobwèzo tòcò gā tcahtîb́èbò̄ wa nu.

¹⁰ Krĭstu anikhĭ wi ḿî ablu tòcò lò, ḿî thĭ nu d́ŏ thĭ ḿî bija azaabla d́ŏ Krĭstu ami abu tòcò dòkhò̆. Wô cô̆ wè thèlè̆ tò ò ńò, thĭ ḿî ahĭahtè̆ ò tòcò dòkhò̆. Thĭ mi hŏhtathèla, ḿî wî ḿî bija ahnahnă.

¹¹ Htô̆ dola khŏdini jo, wò sò̆taabatòò̆, tô kô̆b́èthòb́è ńò, wè b́èmūb́èhta kî wi hi wa phă tò ò ńò, wè mè dèmè khaĺè wa ab́èkò̆ d́î̆.

¹² Wè b́è hô b́è hò̆ akhî wô hôwîge bija alī, bija lôbō wa d́ō wa khòi tèpwè,

¹³ bija gòsè̆lèwè̄ wa d́ō, wa d́òscĭ wîwîmòmò tèpwè bija. Bija lè̄ wa acab́ô̆ Lākho adèthŏdèî, bwèd́îd́ăkhaklè htô̆ dola khŏdini jo lò.

¹⁴ B́èlò̄gudu pholi tòcò, jò d́ò dè tòcò jo ḿî tè b́è cab́ô̆htè jè gè̄ mè thăwā thĭ nu ńò, ḿî cab́ô̆htè thĭ gî̄ thîhè̆lagebò̄ thĭ ne nu dòkhò̆.

¹⁵ D́ŏ Krĭstu abu nu, awōikèi thĭ kò ò d́ŏ ahtò kî agèjè nu, ḿî thĭ pa ò dèbwè lò htè jè ab́oi thĭ d́ŏ Jezŭ Krĭstu abu d́ŏ dèd́ò̆htô ni thĭ Vanzĕlō adèthôdèthò̆ aklè̆ dèbwè nu.

¹⁶ Mègōnu akhoacè̆, ja damò thĭ agô̄ lô tcad́ò̆kô jè.

¹⁷ Kî jo thodŏlekò̆ Timò̆theo d́ŏ thĭ ò, jo pho athohmethaglo d́ŏ Krĭstu abu dèbwè nu, jè gè̄ mè gomohtanikò̆ thĭ jè dèòthôḿô̆ Jezŭ Krĭstu abu aklèthòò̆, acab́ô̆ jô thôithò̆i gŏlālā d́ŏ dèòplo tòcò abu nu.

¹⁸ Ală ḿî je de lepôd́ŏhtî thĭ ńò nu, tòcò cò phîdophîmugè ane.

¹⁹ B́eḿĕ B́ĭcè adèthaèni kò ò nu, tò òjî̄òkja ńò je gē lepôd́ŏhtî tèpwè thĭ, kîd́ò̆ ja gā da wāhlè thîhè̆kò̆ aphîdo ane tòcò htĕ cò d́ògè danè̄ nu ńò, ḿî zè mèkèhta danè̄ nu.

²⁰ Kib́ĭcè ahtĭage dî ḿî dèjî̄b́è lò ńò, ḿî dècô̆dèthèlè̆ lò nu.

²¹ Thĭ bēpha dò̆ d́ò̆è, jē leib́è hnèhlî d́ŏ ju cukhò bu nu ā? Ḿî̆dîḿî ńò dèb́èlò̄ atha kî dèthowîthamò abu nu ā?

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ