အွန်လိုင်း သမ္မာကျမ်းစာ

1 Kòrĭn 14 - Geba Roman New Testament

Spirito Tcahtĭ Adèila

¹ Thĭ mò thaèni dèb́èlò̄ d́olĭ kî dè alewe; barasă thĭ mò sascĭi we Spirito Tcahtĭ adèila alewe tòcò papa, d́okhlŏ ḿî Spirito Tcahtĭ adèila nu.

² Bija anib́è dèlēdèhwè adèila dèbwè nu jî̄b́èhtî Kib́ĭcè, tè b́è bija alewe ńò, manè̄ kò̄ d́òdo dō, d́ŏ Spirito Tcahtĭ abu zî jî̄b́è dè ahuab́i tòcò awîakè̆ bija dî thîhè̆ cè è̆ dèbwè̆ ńò.

³ Bija htè ad́ò̆sadòlò dè dèbwè nu zî jî̄b́èhtî bija lewe tòcò adèdohtamuhta anikhĭ, ci ikhoiă lōwa kî cò d́òkhŭd́òmò lōwa lò.

⁴ Bija anib́è dèlēdèhwè adèila dèbwè jî̄b́è zi nikhĭ lò, ḿî ad́òdòlò dè dèbwè nu cò d́ò dèòplo thèd́è̆plo adèèdèò̆ anikhĭ.

⁵ B́ĕ ja thaèni thĭ gī nib́è dèlēdèhwè adèila nu, ja thaèni d́okhlŏ thĭ gī nib́è dèd́òdòlò adèila, manè̄ d́ō, bija ad́òdòlò za dè dèbwè nu zu jūdomwedo d́olĭ kî bija ajî̄b́è za dèlēdèhwè amŏamo acè̆ nu ḿî d́ŏ zè mèni za Dèòplo dè è dè ò̆ akhoacè̆ lò.

⁶ Mègōnu d́ō, b́èlò̄ thè̆buwe tòcò, ji gī nib́è dèjî̄b́è adèila kî lehtî thĭ, ḿî jè dèjî̄b́è tòcò tè d́è̆lî̄ ma dè athè̆ dimĭ ńò kî d́òisai dè athè̆ dimĭ ńò d́ō, jî ḿîbò̄ danè̄?

⁷ Gomocaca ma dèudèbò̄ domomo acab́ô̆ htwè̆ dèmè̆ ḿî̆dîmî ńò, dene dèmè̆ mè̆ nu, tô nò kî tô nò gā da lasă ma lōwa ńò d́ō, bija ubò̄ da dèthăbô̄ nè nu tè b́è thĭ gî̄ thîhè̆ za tèpwè ńò.

⁸ Ḿî̆dîḿî ńò khaja alē thèhta ḿî da anikhĭ nè? ni bija gî̄ dî thîhè̆ za tèpwè ńò d́ō bò̄bwè kò ò dòlò za dèd́o anikhĭ bwè?

⁹ Cab́ô̆ gōnu akhò̆, ńò kò d́ò ma dèjî̄b́è aladūlasă, agî̄ dî hlî̆ tapla ma ńò d́ō, bò̄bwè gî̄ thîhè̆ za d́ò̆ nè è̆ ahtabohtab́ă bwè? Agā la tèpwè tĭ jî̄b́èhtî gīlligôlô̄ lò.

¹⁰ D́ŏ Lākho akho dèlēdèhwè ò amŏamo lò kî ahtabohtab́ă tò ò ńò tò ògè domŏ ńò.

¹¹ Ḿî jî gî̄ dî thîhè̆ ma dèlēdèhwè ahtabohtab́ă ńò d́ō, d́ŏ ajî̄b́è dè dèbwè ahlò̆mò̄ nu, jî ḿî bwènīd́ò kî d́ŏ ji nikhĭ zî ḿî bwènīd́ò lò lò.

¹² Thĭ nikhĭ ḿî gōnu lò lò, d́ŏ thĭ dèthaèni Spirito Tcahtĭ adèila akhoacè̆ htukhohtuăbò̄ cab́ô̆htè agò̄ khlŏhtamame d́olĭbò̄ bija amèhta Dèòplo tòcò anikhĭ nu.

¹³ Mègōnu d́ō, bija anib́è dèjî̄b́è adèila dèbwè kè thèb́è̆htab́è cab́ô̆htè cò d́ò̆sazabò̄ ahtabohtab́ă nu.

¹⁴ Manè̄ d́ō, jè gè̄ mèi ma dèila ajo d́ŏ dèthèb́è̆ abu nu d́ō, ja tha ḿî athèb́è̆hta, jè dègomo ḿî Aòhlòthô̆ akhoacè̆ nu.

¹⁵ Awîakè̆ ḿî cadè̄? Athĕbwe nu jè tè thèb́è̆htab́è d́ŏ ja thabu lò ńò, ḿî jè dègomo abu papa tè b́è ńò ā?

¹⁶ Bija adèkŏhtakjala tò ò ńò tòcò nu, tò d́ò za “Amèn” d́ŏ thĭ dèthîhè̆htage Kib́ĭcè aklè̆ nu ńò d́ŏ thĭ dèhôwî Kib́ĭcè d́ŏ dètha abu nu ńò, manè̄ thĭ da danè̄ nu zî dî thîhè̆ za ńò.

¹⁷ Thĭ thîhè̆htage Kib́ĭcè pwedè̄ hwahwă bija da thaganāikô za thĭ kă ńò.

¹⁸ Jî thîhè̆htage Kib́ĭcè d́ŏ jò d́ò za dèlēdèhwè domo domo d́olĭ kî thĭ lŏcăcè acè̆ nu.

¹⁹ Barasă d́ŏ dèladēplo abu nu thôrô̆ jò kò d́ò dèlēdèhwè domo domo abu ahmô̆ dòthò̆ hnò̆nu, jò kò d́ò dèjî̄b́è jè hmô̆ lò htè agò̄ khlŏhtamame bija anikhĭ nu dòkhò̆.

²⁰ Thè̆buwe tòcò bĭsèpholè̄hè̆bò̄ ḿè d́ŏ thĭ dègomogamā abu ḿè. Ab́èkja dèkî̆kkèmèhlò̆ nu thĭ ḿî za tèpwè abĭsèpho, ḿî d́ŏ thĭ dègomo aklè̆ nu thĭ gî̄ ḿîb́è adoabwe.

²¹ D́ŏ dèhmèla acèbu nu aò hwela gōjo; “B́eḿĕ jî gî̄ jî̄b́èhtî ma bwèkhwĭpho alewe tòcò d́ŏ dèlēdèhwè acòklîlasă abu nu, zò gò̄ sòkhĕńe tèpwè; ḿi Jî gî̄ jî̄b́èhtî ma Ji bija tòcò gōnu d́ō, tè b́è cè tòcò gò̄ sòkhĕńe mè Jè ńò.

²² Gōnu akhoacè̆, dèila ab́èkja dèjî̄b́è còklî nu, ḿî thè̆thî d́ŏ bija atu b́udè ńò tòcò anikhĭ lò. Tè b́è bija ab́udè tòcò anikhĭ ńò. Ḿî dèjî̄b́è ab́èkja dèd́ò̆sadòlò nu ḿî ab́udè tòcò anikhĭ lò. Tè b́è bija atu b́udè tòcò anikhĭ ńò.

²³ Mègōnu d́ō, Dèòplo thèd́è̆plo ḿî ladējīplo lōwa kî bija gŏ abwè gā cahta jî̄b́è dèlēdèhwè còklî htè bija adî thîhè̆ ńò tòcò, ḿî̆dîḿî ńò adèb́u tò ò ńò tòcò ḿî lenī thĭ klè̆ d́ō, za gā jā blu jā trò lŏ tèpwè thĭ tè b́è ńò ā?

²⁴ Barasă d́o, bija gŏ abwè ḿî jî̄b́èhtî lōwa ab́èkja dèd́òdòlò kî b́ĕ bija adî thîhè̆ ńò tòcò, ḿî̆dîḿî ńò adèb́u tò ò ńò tòcò ḿî lenī kî thîhè̆b́è d́ō, zî gî̄ thîhè̆lage ze ne htè zî ḿî dèkhòwèpho nu. Cè tòcò kè̄ b́è dècirra d́ŏ zî dî thîhè̆b́ègè dè ajo lŏcăcè ńò acè̆ nu,

²⁵ zè dègomo ahuazò gè̄ d́è̆lî̄htakò̆, kî cè tòcò kè d́èla ane thèb́è̆hta Kib́ĭcè kî ŏlăphlala d́òkò̆, “Kib́ĭcè ò hnèhnè b́ĕ thĭ klè̆ jo hŏ!”

Dèthub́uthèb́è̆ Adèglelaprala

²⁶ Thè̆buwe tòcò, dè d́ŏ ja thaè d́ò ḿî ajo lò. B́ĕ thĭ ladēplo thèb́è̆hta nu, dèbwè gā thăbô̄ kòihtăi, alewe dèbwè gè̄ thèhlô̆i dè, alewe dèbwè kò d́ò̆htôla d́è̆lî̄hta Kib́ĭcè, alewe dèbwè kò d́òdòlòdè, kî alewe dèbwè d́ò̆ kò d́òhlî̆hta dèd́òdòlò ahtabohtab́ă lò. Dèlŏcăcè gè̄ kèhta dèmèzo dŏ Dèòplo anikhĭ.

²⁷ Bija dèbwèbwè gā thaè jî̄b́è ma dèlēdèhwè còklî d́ō, cò kò d́òb́è dèbwè hwă dèbwè, aòè gudŭ gībwè kî thŏbwè lò, kî bija alewe dèbwèbwè kè̄ b́è d́òhlî̆htage ze dèjî̄b́è ahtabohtab́ă lò.

²⁸ Barasă ad́ò̆sa za dèjî̄b́è ahtabohtab́ă kò tò ò ma dèbwè̆ ńò d́ō, bija htè ajî̄b́è dèlēdèhwè còklî tòcò nu kè̄ b́è òzòlò d́ŏ dèòplo abu, jî̄b́èbò̄ pwe Kib́ĭcè kî cè gībwè amēzo lò nu.

²⁹ Prò̆fèt ajî̄b́è dèlēdèhwè còklî b́è ò pwe gībwè ḿî̆dîḿî ńò thŏbwè, ḿî bija alewe tòcò nu kè̄ b́è cirra gomoca ab́èkja cè tòcò adèjî̄b́è tòcò nu lò.

³⁰ Barasă d́ō, bija asańălăò alewe dèbwè ḿî nib́è dèd́è̆lî̄hta d́ŏ B́ĭcè aò d́ō, aŭsu dèbwè kè̄ b́è sò̆tab́a dèjî̄b́è lò.

³¹ Thĭ lŏcăcè d́òdòlòdè aza tèpwè, ḿî cab́ô̆htè bija gŏ abwè gī nib́èbò̄ dèthèhlô̆, kî dèikhoiă anikhĭ lò.

³² Dèila ab́èkja dèd́òdòlò nu prò̆fèt ajî̄b́è dèbwè ta sòi ane,

³³ manè̄ kò̄ d́òdo dō, Kib́ĭcè ta thaèni dèsèsòwò̄hta ńò, ḿî dècodèkhli kî dèjīdèd́wă lò. Acab́ô̆ Kib́ĭcè abija tcahtĭ aDèòplo lŏcăcè tòcò akhò̆ nu,

³⁴ amihmu tòcò b́è ò tab́ab́a d́ŏ Dèòplo abu lò. Dè ti icè tòcò gî̄ jî̄b́è ńò. Acab́ô̆ Jŭda adèthôdèthò̆ ò adĕ nu, cè tòcò b́è ò d́ŏ dèthôdèthò̆ alè̄ lò.

³⁵ Cè tòcò ḿî thaè wāhlè thîhè̆ da dimimi d́ō, zò mò htôtcad́è̆tca za wa tòcò d́ŏ hibuphăbu nu. Amihmu dèbwè jî̄b́è d́ŏ dèòplo abu nu ḿî dè amò thăwāthablè̄ lò.

³⁶ Ḿî Kib́ĭcè Alēahwè hèhta d́ŏ thĭ ò dòkhò̆ ā? Ḿî alehtî za htĕ thĭ ò lò ā?

³⁷ Bija dèbwèbwè ḿî gomola ane d́ŏ aḿî Kib́ĭcè aprò̆fèt ḿîwî aò kî thaè tcahtĭ adèila ḿîwî nu d́ō, cè kè̄ b́è thîhè̆ htè jè dèhwe d́ò̆sa thĭ tòcò ḿî Kib́ĭcè Adèhmèla nu.

³⁸ Barasă d́ō, bò̄bwè hwahwă gò̄ dò sòkhĕńe dè ajo ńò d́ō, sòkhĕńe pĭpibò̄ ḿè cè tòcò ḿè.

³⁹ Mègōnu d́ō, thè̆buwe tòcò, lè̄tholè̄thabò̄ dèd́òdòlò tòcò nu. Barasă mèd́îd́ăbò̄ mè dèjî̄b́è dèlēdèhwè còklî nu ḿè.

⁴⁰ Dè gŏmihtĭda ḿî ab́è ò alleaklè kî aweakŭ lò.

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ