1 Kòrĭn 11 - Geba Roman New Testament

¹ Dòbò̄ jè acab́ô̆ jò d́ò Krĭstu nu.

Dèthăbrā d́ŏ Dèthub́uthèb́è̆ Alle

² D́ŏ thĭ gomohtani thèjô̆ jè kî òi anuad́ò̆ ji ilani thĭ tòcò nu d́ō, thĭ mè thuŭthèè htŏ tèpwè.

³ Nòthò̆ hnò̆nu ja thaèni thĭ thîhè̆ htè Krĭstu ḿî bija gŏ abwè ako kî Kib́ĭcè ḿî Krĭstu ako nu.

⁴ B́ĕ amikhŏ dèbwè thèb́è̆ ḿî̆dîḿî ńò d́òthîhè̆ dè akhî cò b́ò̆b́i ma co ko d́ō ad́è̆lî̄ co to d́ŏ ta j́a co ko ńò nu.

⁵ Ḿî amihmu dèbwè b́ĕ cè thèb́è̆ akhî ḿîwî, cò d́òthîhè̆ dè akhî ḿîwî nu, cò tò b́ò̆b́i ma co ko ńò d́ō ad́è̆lî̄hta d́ŏ zè mèladē za wa ahĭahtè̆ lò. Za da lasăkî amihmu ad́îklò ako dèbwè ńò.

⁶ B́ĕ cè thèb́è̆ akhî, cò tò ò b́ò̆b́i ma co ko ńò d́ō, zò mò d́îkè̆ zu khulŭ dòkhò̆. Amihmu dèbwè gā thăwāi ma akî d́îklò ako d́ō, zò mò b́ŭ khub́ò dòkhò̆.

⁷ Amikhŏ dò mò b́ò̆b́i ako ńò hŏ. Manè̄ kò̄ d́òdo d́ō, zî ḿî Kib́ĭcè ahô̆agèlè kî zî hlî̆b́age Kib́ĭcè adòathe akhoacè̆ nu. Ḿî amihmu nu zî ḿî ahlî̆b́age amikhŏ adòathe lò.

⁸ Manè̄ kò̄ d́òdo d́ō, amikhŏ tò òhtakî amihmu ńò, ḿî amihmu òhtakî amikhŏ dòkhò̆.

⁹ Kî amikhŏ tèb́è b́òlakî amihmu anikhĭ ńò, ḿî amihmu b́èb́òlakî amikhŏ anikhĭ dòkhò̆.

¹⁰ D́ŏ dèd́ŏdèj́a Mò̄kho Abwèzo tòcò anikhĭ amihmu tòcò mò b́ò̆b́i ako htè ad́è̆lî̄hta cò ò d́ŏ za wa adèŭi alè̄ nu.

¹¹ Mè nòthò̆ gōnu hnò̆nu, d́ŏ Kib́ĭcè ahlò̆mò̄ nu amihmu tò òbākî kèhta amikhŏ ńò, kî amikhŏ tò òbākî kèhta amihmu ńò ńò.

¹² Manè̄ d́ō, acab́ô̆ amihmu òhtakî za amikhŏ akhò̆ nu, amikhŏ b́è òlaikô amihmu kî bija d́ŏ amèkèhta dèlŏcăcè nu ḿî Kib́ĭcè lò.

¹³ Gomocabò̄ amihmu dèbwè thèb́è̆ Kib́ĭcè kî cò tò b́ò̆b́i co ko ńò nu ḿî asciata tèpwè ā? nu.

¹⁴ Kîd́ò̆ amikhŏ akhulŭ htô̆ dèbwè amòhtăi cè tò ò tèpwè dimĭ ńò,

¹⁵ ḿî amihmu anikhĭ dèwîdèmò domo lò. Dèila cè zu khulŭ htô̆ḿî cò kò̄ b́ò̆b́i i co ko anikhĭ lò.

¹⁶ Nòthò̆ hnò̆nu, bija dèbwèbwè gā thaè dara we ahlò̆mò̄ d́ō, ja thaè d́ò ḿî wa ḿîwî, Kib́ĭcè Adèòplo ḿîwî, anuad́ò̆ alewe tò ògè ńò.

B́ĭcè Lumuhè Adèa
( Mattĕo 26.26-29 ; Mărko 14.22-25 ; Lŭka 22.14-20 )

¹⁷ Khŏnojo jò kò̄ d́ògè ab́èkja dèthôdèthò̆; ja da htăi tèpwè thĭ ńò, manè̄ thĭ ladējīplo thub́uthèb́èhta nu ḿî amèkkè̆dè d́olĭ amèwîdè dòkhò̆ lò.

¹⁸ Aŭsu dimi ḿî b́ĕ thĭ ladējīplo lōwa d́ŏ dèòplo abu nu, thĭ bēphagè thĭ ne dopho, dopho, kî ju b́ugè klăḿè̆ lò.

¹⁹ Manè̄ d́ō, thĭ ògè dopho, dopho acè̆ nu, anu ḿî cab́ô̆htè thĭ gî̄ ḿîbò̄ bija amòb́uthai tòcò akhoacè̆ lò.

²⁰ Aglobu ḿî, b́ĕ thĭ ladējīplo lōwa nu, thĭ a dè ḿî atè b́è Kib́ĭcè Alumuhè Adèa ńò.

²¹ Manè̄ d́o, b́ĕ dèa akhîb́è nu, bija dèbwè dèbwè agôlô̄gele Lumuhè adèa d́ō dèbwè ò thaẃithaò̆, ḿî alewe dèbwè hmupò.

²² Ka a kò ò̆ anikhĭ thĭ hi thĭ phă ò tè b́è ńò ā? Thĭ mò d́ŏ mò j́a Kib́ĭcè adèòplo tòcò d́ŏ dè mè htèniwĭniwa assègnè̆pho tòcò nu ā? Jò kò̄ d́òb́è thĭ danè̄? Ja kā htăi b́è thĭ ā? Dè ajo acè̆ ja da htăi thĭ ńò.

²³ Manè̄ d́ō, jî phînigè dè ajo d́ŏ B́ĭcè ò kî ji ilanigè thĭ, htè b́ĕ Cè b́èhô̆lăgè anu dènè nu, B́ĭcè Jezŭ phî toko,

²⁴ Zî thîhè̆htage Kib́ĭcè, Cî b́îpha kî Cò d́ò, “Ajo ḿî je neb́î̆cè thĭ nikhĭ, mèbò̄ dè ajo d́ŏ dègomohtani jè nu.”

²⁵ Gōnu akhò̆, Lumuhè Adèa hwă, Zî phî phală kî d́ò, “Phală ajo ḿî Dèlagla athè̆ d́ŏ ji thwi abu nu. B́ĕ thĭ ò̆ cè gŏ apla nu, mèbò̄ d́ŏ dègomohtani jè nu.”

²⁶ Mègōnu gŏ apla thĭ a toko jo kî thĭ ò̆ phală ajo nu, ḿî thĭ d́è̆lî̄phlò̆hta B́ĭcè adèthĭ, htô̆ dola d́ŏ Zo dole tapla nu.

²⁷ Mègōnu bija aa B́ĭcè atoko kî aò̆ phală d́ŏ ada tani ńò abu dèbwè nu, zè mè da tani ze ne B́ĭcè Anebî̆cè kî athwi ńò.

²⁸ Mègōnu d́ō, dukhlŭkî ka a toko kî kò̄ ò̆ phală ajo hnî̆ńò nu, b́èkî bija dèbwè kî dèbwè ladū gomocalage ane.

²⁹ Manè̄ cu tu b́u ma Krĭstu Anebî̆cè ńò d́ō, ca a cò ò̆ ḿî tèpwè zi nikhĭ dècirra lò.

³⁰ Gōnu akhoacè̆, d́ŏ thĭ klè̆ nu òè̆bwè khojòăjò, scwisè̆ kî thĭgè.

³¹ Wo gō gomocalage ma we ne d́ō, wa gā da khab́è tèpwè dècirra gōnu ńò.

³² Ḿî B́ĭcè gī cirra ma wa gōnu d́ō, ḿî Ca pra zò zòge wa kî mèd́îd́ă wa cab́ô̆htè wè gè̄ tèb́è cirraplobò̄ Lākho ńò nu.

³³ Mègōnu d́ō, thè̆buwe tòcò, b́ĕ thĭ ladēplo lōwa thĭ ka a B́ĭcè Lumuhè Adèa nu, òsô̆wô̄hlèbò̄ lōwa.

³⁴ Athaẃi tòcò ka a d́ò̆è d́ŏ ahibu nu, mègōnu khaĺè thĭ dèladēplo dè mènikò̆ thĭ dècirra ńò. Ab́èkja dè awîakè̆ alewe nu, d́ŏ jo dohtî thĭ asŏakhè̆ jò kò̄ d́ò̆sakò̆ thĭ.

« အရင်

နောက်တစ်ခု »

Bible Society of Myanmar

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ