ԳԻՐՔ ՍԱՂՄՈՍԱՑ 7 - Գրաբար Աստվածաշունչ (1895)ՍԱՂՄՈՍ Է 1 Սաղմոս Դաւթի, զոր ասաց Տեառն վասն բանին Քուսեայ որդւոյ Յեմինայ։ 2 Տէր Աստուած իմ, ի քեզ յուսացայ, եւ փրկեա զիս յամենայն հալածչաց իմոց եւ ապրեցո զիս. 3 գուցէ երբեք յափշտակիցէ որպէս առեւծ զանձն իմ, ոչ ոք իցէ որ փրկիցէ, եւ ոչ այն՝՝ որ ապրեցուցանիցէ։ 4 Տէր Աստուած իմ, թէ արարի զայս, թէ իցեն անօրէնութիւնք ի ձեռս իմ, 5 թէ հատուցի երբեք այնոցիկ ոյք հատուցին ինձ չար, անկայց եւ ես ի թշնամեաց իմոց ընդունայն,՝՝ 6 հալածեսցէ ապա թշնամին զանձն իմ, հասցէ եւ կոխեսցէ յերկիր զկեանս իմ, եւ զփառս իմ ի հող բնակեցուսցէ։ 7 Արի, Տէր, բարկութեամբ քով, եւ բարձր լեր ի սպառել թշնամեաց իմոց. զարթիր, Տէր Աստուած իմ՝՝, ի հրամանս քո զոր պատուիրեցեր։ 8 Եւ ժողովք ժողովրդոց շուրջ եղիցին զքեւ. վասն այսորիկ ի բարձունս դարձ, Տէր. 9 եւ Տէր դատի զժողովուրդս իւր՝՝. դատ արա ինձ, Տէր, ըստ արդարութեան իմում, ըստ անբծութեան իմում որ յիս։ 10 Կատարեսցին չարիք ի վերայ մեղաւորաց՝՝, եւ յաջողեսցես դու արդարոյն. որ քննէ զսիրտս եւ զերիկամունս, Աստուած արդար։ 11 Յիրաւի է օգնութիւն ինձ յԱստուծոյ, որ ապրեցուցանէ զայնոսիկ՝ որ ուղիղ են սրտիւք։ 12 Աստուած դատաւոր արդար հզօր եւ երկայնամիտ, որ ոչ ածէ զբարկութիւն իւր՝՝ զօրհանապազ. 13 ապա թէ ոչ դառնայ առ նա, զսուր իւր սրեալ է եւ զաղեղն իւր լարեալ. 14 եւ ի նմա՝՝ է պատրաստեալ զանօթս մահու, եւ զնետս իւր այրեցելովք է գործեալ։ 15 Ահաւասիկ երկնեաց զանօրէնութիւն, յղացաւ զցաւս եւ ծնաւ զանիրաւութիւն։ 16 Գուբն զոր փորեաց եւ պեղեաց, ի նոյն անկցի ի խորխորատ զոր եւ գործեաց։ 17 Դարձցին ցաւք ի գլուխ նորա, եւ ի վերայ գագաթան նորա անօրէնութիւնք իւր իջցեն, 18 խոստովան եղէց Տեառն ըստ արդարութեան նորա, եւ սաղմոս ասացից անուան Տեառն բարձրելոյ։ |