ԳԻՐՔ ՍԱՂՄՈՍԱՑ 5 - Գրաբար Աստվածաշունչ (1895)ՍԱՂՄՈՍ Ե 1 Ի կատարած վասն վիճակելոցն՝՝. Սաղմոս Դաւթի։ 2 Բանից իմոց ունկն դիր, Տէր, եւ ի միտ առ զաղաղակ իմ։ 3 Նայեաց ի ձայն աղօթից իմոց, Թագաւոր իմ եւ Աստուած իմ։ 4 Ես զքեզ աղաչեմ, Տէր, ընդ առաւօտս լուիցես ձայնի իմում. ընդ առաւօտս պատրաստ եղէց յանդիման լինել առ քեզ։ 5 Ոչ թէ դու Աստուած կամիս զանօրէնութիւն, եւ ոչ բնակեն առ քեզ չարք։ 6 Մի՛ անօրէնք բնակեսցեն առաջի աչաց քոց. ատեցեր զայնոսիկ ոյք գործեն զանօրէնութիւն. 7 կորուսանես զամենեսեան ոյք խօսին սուտ, զայր արիւնահեղ եւ զնենգաւոր պիղծ առնես դու, Տէր։ 8 Այլ ես ըստ բազում ողորմութեան քում մտից ի տուն քո, եւ երկիր պագից ի տաճար սուրբ քո երկիւղիւ քո։ 9 Տէր, առաջնորդեա ինձ յարդարութեան քում, վասն թշնամեաց իմոց. ուղիղ արա առաջի իմ զճանապարհս քո։ 10 Զի ոչ գոյ ի բերանս նոցա ճշմարտութիւն, եւ սիրտք նոցա նանրեալք են. որպէս գերեզման բաց է կոկորդ նոցա, լեզուօք իւրեանց նենգաւորք եղեն։ 11 Դատեա զնոսա, Աստուած, զի անկցին ի խորհրդոց իւրեանց. ըստ բազում ամպարշտութեան նոցա մերժեա զնոսա, զի դառնացուցին զքեզ։ 12 Ուրախ լիցին ամենեքեան ոյք յուսացեալ են ի քեզ, յաւիտեան ցնծասցեն, եւ բնակեսցես դու ի նոսա. պարծեսցին ի քեզ սիրելիք անուան քո։՝՝ 13 Զի օրհնեսցես դու զարդարն. Տէր, որպէս զինու հաճութեամբ քով պսակեցեր զնոսա։ |