ԳԻՐՔ ՍԱՂՄՈՍԱՑ 105 - Գրաբար Աստվածաշունչ (1895)ՍԱՂՄՈՍ ՃԵ (ՃԶ) 1 Ալէլուիա։ Խոստովան եղերուք Տեառն զի քաղցր է, զի յաւիտեան է ողորմութիւն նորա։ 2 Ո՞ խօսեսցի զզօրութիւն Տեառն, լսելի արասցէ զամենայն օրհնութիւնս նորա։ 3 Երանի՛ ոյք պահեն զիրաւունս, եւ առնեն զարդարութիւն յամենայն ժամ։ 4 Յիշեա զմեզ, Տէր, ընդ հաճոյս ժողովրդեան քո, եւ այց արա մեզ ի փրկութեան քում։ 5 Տեսցուք մեք զքաղցրութիւն ընտրելոց քոց, ուրախ եղիցուք մեք յուրախութիւն ազգի քո, եւ գովեսցուք մեք ի ժառանգութեան քում։ 6 Մեղաք մեք ընդ հարսն մեր, անօրինեցաք եւ յանցեաք։ 7 Հարքն մեր յԵգիպտոս ոչ իմացան զսքանչելիս քո, եւ ոչ յիշեցին զբազում ողորմութիւնս քո. բարկացուցին զքեզ յանցանելն իւրեանց ընդ ծով Կարմիր. 8 փրկեաց զնոսա վասն անուան իւրոյ, զի ծանիցեն զզօրութիւնս նորա։ 9 Սաստեաց ի ծով Կարմիր՝ եւ ցամաքեցաւ. առաջնորդեաց նոցա ընդ անդունդս որպէս ընդ անապատս։ 10 Կեցոյց զնոսա ի ձեռաց ատելեաց նոցա, եւ փրկեաց զնոսա ի ձեռաց թշնամեաց նոցա։ 11 Ծածկեաց ծով զնեղիչս նոցա, եւ մի ի նոցանէ ոչ ապրեցաւ։ 12 Հաւատացին ի բան նորա, եւ օրհնեցին զօրհնութիւն նորա։ 13 Վաղվաղեցին եւ մոռացան զգործս նորա, եւ ոչ անսացին խորհրդոց նորա։ 14 Ցանկացան զցանկութիւն յանապատի, եւ փորձեցին զԱստուած յանջրդի։ 15 Ետ նոցա զխնդրուածս նոցա, եւ առաքեաց լիութիւն յանձինս նոցա։ 16 Բարկացուցին զՄովսէս ի բանակի, եւ զԱհարոն՝՝ սուրբ Տեառն։ 17 Բացաւ երկիր եւ եկուլ զԴադան, եւ ծածկեաց զբանակսն զԱբիրովնի։ 18 Հուր վառեցաւ ի ժողովս նոցա, եւ բոց մաշեաց զմեղաւորս։ 19 Արարին զորթն ի Քորեբ, եւ երկիր պագին պատկերի. 20 եւ փոխեցին Զփառս իւրեանց ի նմանութիւն որթու խոտակերի։ 21 Մոռացան զԱստուած կենարար իւրեանց, որ արար զմեծամեծս իւր յԵգիպտոս, 22 զսքանչելիս իւր յերկիր Քամայ, եւ զահ իւր ի վերայ Կարմիր ծովուն։ 23 Ասաց սատակել զնոսա, եթէ ոչ Մովսէս ընտրեալ կայր առաջի նորա. դարձաւ առ Տէր եւ անցոյց զբարկութիւն նորա զի մի՛ սատակեսցին նոքա։ 24 Անարգեցին զերկիրն ցանկալի, եւ ոչ հաւատացին բանի նորա։ 25 Տրտնջեցին ի բանակս իւրեանց, եւ ոչ լուան ձայնի Տեառն։ 26 Համբարձ զձեռն իւր ի վերայ նոցա, հարկանել զնոսա յանապատի։ 27 Ցրուեսցի զաւակ նոցա ընդ հեթանոսս, ցրուեսցի զաւակ նոցա ընդ գաւառս։ 28 Պղծեցան նոքա ի Բեղբեգովր, կերան զզոհեալ եւ զմեռելոտի՝՝։ 29 Բարկացուցին զնա ի գործս իւրեանց, եւ յաճախեաց ի վերայ նոցա բեկումն։ 30 Ապա եկաց ի մէջ Փենեէս, քաւեաց եւ արգելաւ մահ. 31 համարեցաւ նմա յարդարութիւն ազգէ յազգ մինչեւ յաւիտեան։ 32 Բարկացուցին զնա ի ջուրսն Հակառակութեան, չարչարեցաւ Մովսէս՝՝ վասն նոցա. 33 զի դառնացուցին զոգի նորա, մրմնջեաց շրթամբք իւրովք։ 34 Եւ ոչ սատակեցին զազգսն զոր ասաց նոցա Տէր։ 35 Խառնակեցան ընդ հեթանոսս եւ ուսան զգործս նոցա. 36 ծառայեցին կռոց նոցա, եւ եղեւ նոցա ի գայթակղութիւն։ 37 Զոհեցին զուստերս եւ զդստերս իւրեանց դիւաց, եւ հեղին արիւն ամբիծ, 38 զարիւն ուստերաց եւ դստերաց իւրեանց, զոր զոհեցին կռոցն Քանանու. շաղախեցաւ երկիր յարենէ նոցա։ 39 Եւ պղծեցաւ ի գործոց նոցա, զի՝՝ պոռնկեցան ի գնացս իւրեանց։ 40 Բարկացաւ սրտմտութեամբ Տէր ի վերայ ժողովրդեան իւրոյ, եւ գարշեցոյց զժառանգութիւն իւր յոյժ. 41 մատնեաց զնոսա ի ձեռս հեթանոսաց, տիրեցին նոցա ատելիք իւրեանց։ 42 Եւ թշնամիք իւրեանց նեղեցին զնոսա, եւ խոնարհ եղեն ի ներքոյ ձեռաց նոցա։ 43 Բազում անգամ փրկեաց զնոսա, եւ նոքա դառնացուցին զնա ի խորհուրդս իւրեանց, եւ կորացան յանօրէնութեան իւրեանց։ 44 Հայեցաւ Տէր ի նեղութիւնս նոցա, ի լսել ձայնի աղօթից նոցա։ 45 Յիշեաց զուխտ իւր եւ զղջացաւ ըստ բազում ողորմութեան իւրում. 46 ետ զնոսա ի գթութիւնս առաջի ամենայն գերչաց նոցա։ 47 Փրկեա զմեզ, Տէր Աստուած մեր, եւ ժողովեա զմեզ ի հեթանոսաց. խոստովան եղիցուք անուան քում սրբոյ, եւ պարծեսցուք յօրհնութիւնս քո։ 48 Օրհնեալ Տէր Աստուած Իսրայելի յաւիտեանս յաւիտենից. եւ ասասցէ ամենայն ժողովուրդն. Եղիցի, եղիցի։ |