ՄԱՐԳԱՐԷՈՒԹԻՒՆ ԵԶԵԿԻԵԼԻ 47 - Գրաբար Աստվածաշունչ (1895)1 Եւ եմոյծ զիս առաջի դրան տաճարին, եւ ահա ելանէր ջուր ի ներքոյ վարագուրաց տաճարին ընդ արեւելս, զի երեսք տաճարին հայէին ընդ արեւելս. եւ ջուրն հոսէր յաջմէ կողմանէ տաճարին հիւսիսոյ ի սեղանն կոյս՝՝։ 2 Եւ եհան զիս ընդ ճանապարհ դրանն հիւսիսոյ, եւ շրջեցոյց զիս ընդ ճանապարհ դրանն արտաքնոյ առ դրամբն արտաքնով՝ որ հայէր ընդ արեւելս. եւ ահա ջուրն հոսէր յաջմէ կողմանէ։ 3 Եւ իբրեւ զելս առն դէմ յանդիման, եւ չափ ի ձեռին իւրում. եւ չափեաց հազար՝ չափովն, եւ անց ընդ ջուրն՝ ջուր յորդութեան. 4 եւ չափեաց հազար՝ չափովն, եւ անց ընդ ջուրն, եւ հարկանէր ջուրն մինչեւ ցերանսն. եւ չափեաց հազար՝ չափովն, եւ անց ընդ ջուրն, եւ հարկանէր ջուրն մինչեւ ցգօտին. 5 եւ չափեաց հազար՝ չափովն զուխսն, եւ ոչ կարէր՝՝ անցանել, զի յորդեաց ջուրն իբրեւ զյորձանս հեղեղաց ընդ որ ոչ ոք անցանիցէ։ 6 Եւ ասէ ցիս. Տեսե՞ր որդի մարդոյ։ Եւ դարձոյց զիս եւ տարաւ յափն գետոյն։ 7 Եւ ի շրջելն անդ իմում, եւ ահա յափն գետոյն ծառատունկ բազում յոյժ յայսկոյս յայնկոյս։ 8 Եւ ասէ ցիս. Ջուրս այս որ ելանէ ի կողմ Գալիլեացւոց ընդ արեւելս, եւ իջանէ յԱրաբիա, եւ գայ մինչեւ ցծով ի ջուրց ելիցն, եւ բժշկեսցէ զջուրս՝՝։ 9 Եւ եղիցի ամենայն շունչ անասնոց ի բաց թքելոց, յամենայնի յորոց վերայ եկեսցէ գետն՝՝ կենդանի լիցի. եւ եղիցի անդ ձուկն բազում յոյժ, զի հասեալ անդր ջրոյս այսորիկ՝ բժշկեսցէ. եւ կենդանասցի յորոյ վերայ հասցէ գետն եւ կեցցէ՝՝։ 10 Եւ կացցեն ի նմա որսորդք յԵնգադեայ մինչեւ ցԵնգադիմ. ձգանք ուռկանաց առանձինն եղիցին, եւ ձկունք նորա իբրեւ զձկունս ծովուն մեծի, եւ բազմութիւն բազում յոյժ. 11 յելս նորա եւ ի դարձս նորին, եւ ի համբառնալ՝՝ նորին մի՛ սրբեսցին, այլ յաղ մատնեսցին։ 12 Եւ առ գետովն ելցէ զափամբն յայսկոյս յայնկոյս՝ ամենայն ծառ ուտելի, եւ մի՛ հնասցի շուրջ զնովաւ՝՝, եւ մի՛ պակասեսցի պտուղ նորա, եւ զդալարութիւն իւր յառաջագոյն արձակեսցէ՝՝. զի ջուրք նորա ի սրբութեանց ելանիցեն. եւ եղիցի պտուղ նոցա ի կերակուր, եւ ելք նոցա ի բշժկութիւն։ 13 Այսպէս ասէ Տէր Աստուած. Այս են սահմանք ժառանգութեան երկրին, զոր ժառանգեցուցանիցեն երկոտասան ազգացն որդւոցն Իսրայելի յաւելուած վիճակաց՝՝. 14 եւ ժառանգեսցեն զնա իւրաքանչիւր ոք՝ որպէս եւ եղբայրն իւր, յոր ամբարձի զձեռն իմ տալ հարցն նոցա. եւ անկցի երկիրն այն ձեզ ի վիճակ ժառանգութեան։ 15 Եւ այս են սահմանք երկրին. Որ ընդ կողմ հիւսիսոյ, ի ծովէն մեծէ, որ իջանէ եւ մեկնէ ի մուտս Եղղադայ 16 եւ Եմաթայ եւ Բերովթայ, Սաբարսիմայ՝՝ ի մէջ սահմանացն Դամասկոսի, եւ ի մէջ սահմանացն Եմաթայ, բնակութիւնք Աւնանայ որ են ի սահմանս Աւրանացւոցն։ 17 Այս են սահմանք ի ծովէն ի հանգրուանէ Աւնանայ՝ սահմանք Դամասկոսի. եւ ընդ կողմն հիւսիսոյ ըստ հիւսիսոյ, եւ սահմանքն Եմաթայ՝ սահման հիւսիսոյ, 18 դէմ յանդիման՝՝ արեւելից ի մէջ Աւրանացւոյն եւ ի մէջ Դամասկոսի, ի մէջ Գաղաադացւոյն եւ ի մէջ երկրին Իսրայելի, Յորդանան մեկնէ ընդ ծովակողմ արեւելից ընդ արմաւաստանն՝՝. այս ընդ արեւելս։ 19 Եւ ընդ հարաւ, առ հարաւով ի Թեմանայ եւ յարմաւաստանէ մինչեւ ի ջուրն Մարիբովթ Կադէս՝՝ որ ձգի ի ծովն մեծ. այս բաժին հարաւային, եւ առ հարաւով։ 20 Եւ սոյն բաժին ծովուն մեծի, որ որոշէ՝՝ մինչեւ հանդէպ մտիցն Եմաթայ, մինչեւ ի մուտս նորին. այս ինքն են ընդ ծովակողմն Եմաթայ՝՝։ 21 Եւ բաժանեսջիք զերկիրն զայն նոցա, եւ՝՝ ազգացն Իսրայելի. 22 արկջիք զնա ի վիճակս, ձեզ եւ եկացն, պանդխտացն որ ի միջի ձերում, որք ծնան որդիս ի միջի ձերում. եւ եղիցին ձեզ իբրեւ այդրէնածինք ի մէջ որդւոցն Իսրայելի, եղիցին ընդ ձեզ, կերիցեն ժառանգութեամբ՝՝ ի մէջ ազգացդ Իսրայելի։ 23 Եւ եղիցին յազգ պանդխտաց ի մէջ պանդխտաց՝ որ իցեն ի ձեզ՝՝, անդ տաջիք նոցա ժառանգութիւն, ասէ Տէր Աստուած։ |