ՄԱՐԳԱՐԷՈՒԹԻՒՆ ԵԶԵԿԻԵԼԻ 18 - Գրաբար Աստվածաշունչ (1895)1 Եւ եղեւ բան Տեառն առ իս եւ ասէ. 2 Որդի մարդոյ, զի՞նչ է ձեզ առակդ այդ՝ ի մէջ որդւոցդ՝՝ Իսրայելի զոր ասեն, թէ՝ Հարք ազոխ կերան, եւ որդւոց ատամունք առան։ 3 Կենդանի եմ ես, ասէ Ադոնայի Տէր, եթէ լինիցի առակդ այդ որ ասի ի մէջ Իսրայելի։ 4 Զի ամենայն անձինք՝ իմ են, որպէս անձն հօր՝ նոյնպէս եւ անձն որդւոյ. անձն որ մեղիցէ՝ նոյն եւ մեռցի։ 5 Այլ մարդն որ արդար իցէ, եւ առնիցէ զիրաւունս եւ զարդարութիւն, 6 ի վերայ լերանց զոհեալ ոչ ուտիցէ, եւ զաչս իւր ի կուռս տանն Իսրայելի ոչ արձակիցէ, եւ զկին ընկերի իւրոյ ոչ ապականիցէ, եւ ի կին իւր ապարահ ոչ մերձենայցէ, 7 եւ մարդոյ բուռն ոչ լինիցի, զգրաւ պարտապանի դարձուցանիցէ, յափշտակութիւն ոչ յափշտակիցէ, զհաց իւր տացէ քաղցելոց եւ զմերկն զգեցուցանիցէ, 8 զարծաթ իւր ի վարձու ոչ տացէ, եւ տոկոսեօք անդրէն ոչ պահանջիցէ, յանիրաւութենէ զձեռս իւր դարձուցանիցէ, դատաստան արդար առնիցէ ընդ այր եւ ընդ ընկեր իւր, 9 ըստ հրամանաց իմոց գնայցէ, զիրաւունս իմ պահիցէ եւ առնիցէ զնոսա՝՝, արդար է նա՝ կելով կեցցէ, ասէ Ադոնայի Տէր։ 10 Եւ եթէ ծնանիցի որդի խառնագնաց, արիւնահեղ, եւ առնիցէ զմեղս. 11 ի ճանապարհս հօրն իւրոյ արդարոյ՝ ոչ գնաց, եւ՝՝ ի վերայ լերանց եկեր զոհեալ, եւ զկին ընկերի իւրոյ պղծեաց, 12 եւ զաղքատն եւ զտնանկն յաղթահարեաց, եւ յափշտակութիւն յափշտակեաց, եւ զգրաւ ոչ դարձոյց, եւ ի պաշտօն դից զաչս իւր արձակեալ անօրէնութիւն գործեաց, 13 զարծաթ իւր ի վարձու ետ, եւ վաշխիւ եւ տոկոսեօք պահանջեաց. նա մի՛ կեցցէ որ զայն ամենայն անօրէնութիւնս արար, մահու մեռցի, եւ արիւն նորա ի վերայ նորին եղիցի։ 14 Եւ եթէ ծնանիցի որդի, եւ տեսանիցէ զամենայն մեղս հօր իւրոյ զոր գործեաց, եւ երկիցէ՝ եւ ոչ արասցէ զնոյնս. 15 ի վերայ լերանց զոհեալ ոչ եկեր, եւ զաչս իւր ի խորհուրդս տանն Իսրայելի ոչ արձակեաց, եւ զկին ընկերի իւրոյ ոչ ապականեաց, 16 եւ զմարդ ոք ոչ յաղթահարեաց, եւ զգրաւ ոչ գրաւեաց, եւ յափշտակութիւն ոչ յափշտակեաց, զհաց իւր ետ քաղցելոց եւ զմերկն զգեցոյց, 17 եւ յանիրաւութենէ դարձոյց զձեռս իւր, վաշխս եւ տոկոսիս ոչ առ, արդարութիւն գործեաց, եւ ըստ հրամանաց իմոց գնաց. նա մի՛ վախճանեսցի յանիրաւութիւնս հօր իւրոյ, այլ կելով կեցցէ։ 18 Բայց հայրն նորա թէ նեղելով նեղիցէ, եւ յափշտակելով յափշտակիցէ զեղբայր իւր, հակառակութեան գործս՝՝ գործեաց ի մէջ ժողովրդեան իմոյ, մեռցի յանիրաւութեան իւրում։ 19 Եւ ասէք թէ՝ Զի՞ է զի ոչ եհաս անիրաւութիւն հօրն՝ որդւոյն։ Զի որդին ողորմութիւն եւ արդարութիւն արար, զամենայն օրէնս իմ պահեաց եւ արար զնոսա, կելով կեցցէ։ 20 Անձն որ մեղիցէ, նոյն եւ մեռցի. եւ որդի զհօր մեղս մի՛ առցէ, եւ մի՛ հայր առցէ զանիրաւութիւնս որդւոյ իւրոյ. արդարութիւն արդարոյն ի վերայ նորին եղիցի, եւ անօրէնութիւն անօրինին ի վերայ նորին եղիցի։ 21 Եւ անօրէնն եթէ դարձցի յամենայն անօրէնութեանց իւրոց զոր արար, եւ պահիցէ զամենայն պատուիրանս իմ, եւ արասցէ արդարութիւն եւ ողորմութիւն, կելով կեցցէ, եւ մի՛ մեռանիցի։ 22 Ամենայն յանցանք նորա զոր գործեալ իցէ եւ ամենայն անիրաւութիւնք նորա զոր անիրաւեալ իցէ մի՛ յիշեսցին՝՝, այլ արդարութեամբ իւրով զոր արար՝ կեցցէ։ 23 Միթէ կամելով կամիցի՞մ զմահ մեղաւորին ասէ Տէր Տէր՝ որպէս զդառնալ նորա ի չար ճանապարհէ եւ կեալ։ 24 Եւ ի դառնալ արդարոյն յարդարութենէ իւրմէ, եւ առնել զանիրաւութիւն, ըստ ամենայն անօրէնութեանց՝ զոր առնիցէ անօրէնն. ամենայն արդարութիւնք նորա զոր արար՝ մի՛ յիշեսցին. ի յանցանսն իւր յոր անկաւ, եւ ի մեղս իւր զոր մեղաւ՝ ի նոսին մեռցի։ 25 Եւ ասէք թէ՝ Ոչ աջող է ճանապարհ Տեառն. արդ լուարուք, տունդ Իսրայելի, միթէ ի՞մ ճանապարհ չիցէ աջող. ո՞չ ապաքէն ձեր ճանապարհք չեն աջող։ 26 Ի դառնալ արդարոյն յարդարութենէ իւրմէ՝ եւ առնել զանիրաւութիւն, մեռցի յանօրէնութեանն զոր գործեաց՝՝։ 27 Եւ ի դառնալ անօրինին յանօրէնութենէ իւրմէ զոր արար, եւ առնիցէ իրաւունս եւ արդարութիւն, ինքն զանձն իւր ապրեցոյց. 28 զի ետես եւ դարձաւ յամենայն ամպարշտութեանց իւրոց զոր արար. կելով կեցցէ եւ մի՛ մեռցի։ 29 Եւ ասեն տունդ Իսրայելի. Ոչ ուղիղ է ճանապարհ Տեառն. միթէ ի՞մ ճանապարհ չիցէ ուղիղ, տունդ Իսրայելի. ո՞չ ապաքէն ձեր ճանապարհք չեն ուղիղ։ 30 Վասն այսորիկ զիւրաքանչիւր ոք ըստ իւրում ճանապարհի դատեցայց, տունդ Իսրայելի, ասէ Ադոնայի Տէր. դարձայք եւ դարձարուք յամենայն ամպարշտութեանց ձերոց, եւ ոչ լինիցի ձեզ ի տանջանս անիրաւութեան՝՝։ 31 Ընկեցէք յանձանց ձերոց զամենայն ամպարշտութիւնս ձեր զոր ամպարշտեցայք յիս, եւ արարէք ձեզ սիրտ նոր, եւ ոգի նոր. եւ արարէք զամենայն զպատուիրանս իմ.՝՝ եւ ընդէ՞ր մեռանիք, տունդ Իսրայելի, ասէ Տէր։՝՝ 32 Զի ոչ կամիմ զմահ մեղուցելոյն, ասէ Ադոնայի Տէր, այլ զի դարձցի ի ճանապարհաց իւրոց չարաց, եւ կեցուսցէ զանձն իւր.՝՝ արդ եկայք դարձարուք, եւ կեցէք։ |