ဤစာအုပ်သည် ဘုရားသခင်မှ အားသွင်းပေးထားသော စာအုပ်မဟုတ်ပါ။ ၎င်းသည် ခရစ်ယာန်၏ ကာနွန် သို့မဟုတ် ယုဒလူမျိုး၏ တာနာ့ခ်၏ အစိတ်အပိုင်းမဟုတ်ပါ။ သမိုင်းနှင့် သုတေသန ရည်ရွယ်ချက်များအတွက်သာ ပြသထားပါသည်။ အပြည့်စုံသော ရှင်းလင်းချက်ကို ကြည့်ရန် ԵՍԹԵՐ 3 - Գրաբար Աստվածաշունչ (1895)1 Եւ եղեւ յետ բանիցս այսոցիկ յաւուրս Արտաշիսի, (որ եւ այս Արտաշէս՝՝ կալաւ ի Հնդկաց աշխարհէն մինչեւ յԵթովպիա հարեւր քսան եւ եւթն գաւառ,) 2 ի նմին աւուրս յորս նստաւ ի Սիսիս քաղաքի՝՝, 3 յամին երրորդի թագաւորութեանն իւրոյ, արար թագաւորն կոչունս սիրելեաց իւրոց եւ մեծամեծաց, եւ այլոց եւս ազգաց Պարսից եւ Մարաց, եւ ամենայն իշխանաց նախարարացն։ 4 Եւ իբրեւ եցոյց՝՝ նոցա զմեծութիւն թագաւորութեանն իւրոյ, եւ զփառս ուրախութեան վայելչութեանն զաւուրս հարեւր եւ ութսուն։ 5 Եւ յորժամ յանգ ելանէին աւուրք հարսանեացն, դարձեալ միւսանգամ հրաման ետ կոչել ի հարսանիսն զռամիկ քաղաքացիսն իւր ի գաւիթ տանն արքունի զաւուրս վեց։ 6 Եւ էր զարդարեալ բեհեզովք եւ կերպասովք՝ զորս էր կարգեալ եւ կազմեալ զլարովքն ծիրանեօք եւ բեհեզովք, եւ զորս էր կապեալ ի խոյակսն ոսկիս, եւ ի ծիրանիս՝ որ կային ի վերայ սեանցն պատուականաց եւ ի խարսխացն ոսկեղինաց. ուր կային գահոյք բազումք ոսկեղէնք եւ արծաթեղէնք ընդելուզեալք մարգարտօք եւ ակամբք պատուականօք՝ լցեալս պաստառօք եւ գոյնագոյն նկարուք եւ պատուական հանդերձիւք ի վերայ վարդայատակ գաւթին. 7 ուր կային թակոյկք եւ ըմպելիք թագաւորին ոսկեղէնք եւ արծաթեղէնք, որք էին յերից բիւրուց քանքարաց, եւ գինի յոյժ՝ արքայի ըմպելի։ 8 Այլ կոչունքս որպէս օրէն էր եղեւ. վասն զի այսպէս կամեցաւ թագաւորն առնել պաշտօնեայ ծառայիցն։՝՝ 9 Եւ Ասթինէ կին թագաւորին արար կոչունս կանանց յապարանս թագաւորին Արտաշիսի։ 10 Եւ յաւուրն եւթներորդի յանձն իւր զուարճացեալ լինէր թագաւորն. եւ ասէ ցԱման եւ ցԲազան եւ ցԹառա եւ ցԲուրազէ եւ ցԱթելթա եւ ցԲատենզա եւ ցԹառաբբա, ցեւթանեսին ներքինիս ցպաշտօնեայս իւր, 11 կոչել զկինն յարքունիս թագաւորեցուցանել զնա, եւ՝՝ ցուցանել ամենայն իշխանաց եւ ազգաց զգեղեցկութիւն նորա. զի էր գեղեցիկ յոյժ։ 12 Եւ ոչ լուաւ նմա Ասթինէ գալ առ նա ընդ ներքինիսն՝՝, եւ տրտմեցաւ թագաւորն եւ բարկացաւ յոյժ։ 13 Եւ ասէ ցսիրելիսն իւր զիրսն զոր արար Ասթինէն. Արդ արարէք, ասէ թագաւորն, այսուհետեւ օրէնս եւ իրաւունս։ 14 Եւ մատեան առաջի նորա Արքինսէոս եւ Առնաթեր եւ Մաղիսեար՝ իշխանք Պարսից եւ Մարաց, որ էին մերձաւորք եւ աթոռակիցք արքային։ 15 Եւ պատմեցին եթէ ո՞րպէս՝՝ օրէն է առնել Ասթինեայ կնոջ թագաւորին, զի ոչ արար զհրամանս արքային, զոր հրամայեաց նմա ի ձեռն ներքինեացն։ 16 Եւ ասէ Մուքեւս ցարքայ եւ ցիշխանսն. Ոչ եթէ արքայի միայն ընդդէմ դարձաւ Ասթինէ տիկնանց տիկին, այլ ամենայն իշխանաց եւ կուսակալաց արքայի։ 17 Սոյնպէս եւ ամենայն կանայք լինին անհնազանդ իշխանաց Պարսից եւ Մարաց՝՝, 18 յորժամ լսեն զարհամարհանս կնոջ թագաւորիս, համարձակին իշխել եւ անարգել զարս իւրեանց։ 19 Արդ, եթէ կամք իցեն եւ հաճոյ թուեսցի արքայի, մի՛ մտցէ նա առ արքայ. եւ զտիկնութիւն նորա տացէ կնոջ որ լաւ եւս իցէ քան զնա։ 20 Եւ լուիցեն զօրէնս զոր հրամայես ի թագաւորութեանդ քում, եւ պատուեսցեն կանայք զարս իւրեանց պատուով մեծաւ՝ յաղքատաց մինչեւ ի մեծամեծս։ 21 Եւ հաճոյ թուեցաւ բանն արքայի եւ ամենայն իշխանաց նորա. եւ արար թագաւորն որպէս խօսեցաւ Մուքեւս։ 22 Եւ առաքեաց ընդ ամենայն թագաւորութիւնն իւր ի գաւառսն ամենայն՝ ըստ հրամանին որ եդաւ ի վերայ ամենայն կանանց։՝՝ |