ԵՐԿՐՈՐԴՈՒՄՆ ՕՐԻՆԱՑ 34 - Գրաբար Աստվածաշունչ (1895)1 Եւ ել Մովսէս յԱրաբովթ Մովաբայ, ի լեառն Նաբաւ, ի կատարն Փոգովրայ, որ է յանդիման Երիքովի, եւ եցոյց նմա Տէր զամենայն երկիրն Գաղաադու մինչեւ ցԴան, 2 եւ զամենայն երկիրն Նեփթաղիմայ, եւ զամենայն երկիրն՝՝ Եփրեմի եւ Մանասէի, եւ զամենայն երկիրն Յուդայ մինչեւ ցծովն վերջին, 3 եւ զանապատն եւ շուրջ զԵրիքոյիւ, եւ զքաղաքսն՝՝ Արմաւենեաց մինչեւ ցՍեգովր։ 4 Եւ ասէ Տէր ցՄովսէս. Այս է երկիրն զոր երդուայ Աբրահամու եւ Իսահակայ եւ Յակոբայ եւ ասեմ. Զաւակի քում տաց զդա. ցուցի աչաց քոց, եւ անդր մի՛ մտանիցես։ 5 Եւ վախճանեցաւ Մովսէս ծառայ Տեառն յերկրին Մովաբու ըստ բանի Տեառն. 6 եւ թաղեցին զնա ի Գայի՝՝ մերձ ի տունն Փոգովրայ. եւ ոչ ոք գիտաց զգերեզման նորա մինչեւ ցայսօր։ 7 Եւ Մովսէս էր ամաց հարեւր եւ քսանից ի վախճանելն իւրում, եւ ոչ վատեցին աչք նորա եւ ոչ խորշոմեցան ծնօտք՝՝ նորա։ 8 Եւ լացին որդիքն Իսրայելի զՄովսէս յՌաբովթ Մովաբու առ Յորդանանու յանդիման Երիքովի՝՝ աւուրս երեսուն. եւ կատարեցան աւուրք սգոյ լալեացն Մովսիսի։ 9 Եւ Յեսու որդի Նաւեայ լցաւ հոգւով իմաստութեամբ, զի եդ Մովսէս զձեռն իւր ի վերայ նորա. եւ հնազանդեցան նմա որդիքն Իսրայելի, եւ արարին որպէս պատուիրեաց Տէր Մովսիսի։ 10 Եւ ոչ եւս եկաց մարգարէ յԻսրայելի իբրեւ զՄովսէս, այր՝ զոր ծանեաւ Տէր դէմ յանդիման, 11 ամենայն նշանօք եւ արուեստիւք զոր առաքեաց Տէր առնել յերկրին Եգիպտացւոց, ի փարաւոն եւ ի ծառայս նորա եւ յամենայն երկիր նորա, 12 զնշանս մեծամեծս, զձեռն հզօր եւ զբազուկ բարձր՝՝ զոր արար Մովսէս առաջի որդւոցն Իսրայելի։ |