Zakari 9 - Kazambale lé Sebe Sauunu 1979

Bale Izraɛl punma bɛnnu lé we ble

¹ Dére lé Gakelebale a fe Adrak tɛrɛ ma, yee lé ke ’ko. A dére bɔ Damas, naa, Gakelebale yuɛ a mi faa ta bélé Izraɛl bɛn faa zé zo.

² É bɔ é ziin Amat, Damas glɛ la; é bɔ Tii valé Sidɔn, dɔlé ’té wo we dɔɔ é baba.

³ Tii élé guliyɔɔkɔn plɛplɛ dɔ; é gɔɔlifu téé bélé tɛrɛ zo, é kyan téé bélé zia voli zo.

⁴ Ka ye, Mizan é dan a si lɛ ézé nya, é dan alé plɛplɛ vuli lɛ wɛyi va, yé kyɛ é dan a ble lɛ.

⁵ Azkalɔn é dan a ye lɛ, yé kana é dan vɔ lɛ a gi. Gaza é dan a ye lɛ é ziin, yé a ma é dan nyɔɔn lɛ plɛplɛ; Ékrɔn é dan a ye lɛ é ziin, yé we lé a bli ke a lɛ, a sele é dan saan lɛ a gi. Gaza nwiinzan blɛn é dan san lɛ, munu ’ka dan nyana lɛ é dɛrɛ Azkalɔn lo.

⁶ Bɛn é dan nyana lɛ Azdɔd, yé maa dan Filisitinu lé boblɛn nyaa lɛ.

⁷ Maa dan yobanwi nyɛ valé a nɛ so lɛ a ’léé; yee é ziin, é dan vo lɛ kolé Bale zé nya. É dan kɛlɛ lɛ bélé Juda nwiinzan do zo, yé Ékrɔn é dan kɛlɛ lɛ bélé Jébusinu zo.

⁸ Maa dan dɔ lɛ anlé kɔn zi, a takuunle sunya palunu lee we gi, é valé munu lé woo goo, ’té woo dan bɛ, wo lee, yé yaamitazan ’ka dan gié lɛ wo sɔnɔ é dɛrɛ lo; naa, sin, an yuɛnu a é pale a ta, azama.

Minwiinzan blɛn lé é dan da lɛ, alé we

⁹ Siɔn munu, ka gi ’é nana. Jérusalɛm munu, ’ka siaa ginanale nya. Ka yua, ka nwiinzan blɛn a dana ka va; É a tegele yé guliwuo a é vole a lee, É a bo kiénézan nya, yé é a é vɔle sokofale punu, Sokofale tina lé né punu.

¹⁰ Maa dan Éfraim lé gulidangoronu sɛrɛ lɛ, Yé maa dan Jérusalɛm lé wisoonu gyɛ lɛ; Maa dan gulidansanu yi ga lɛ. É dan vole drɔɔ zana dɔɔ lɛ bɛnnu lɛ, É sia wɛyi do ma yé é bɔ wɛyi koɛ ma, É sia yuu ma fɔɔ yé é bɔ tɛrɛ glɛ sina, é dan pla lɛ wo nwiin.

Bale é dan élé munu dɔ lɛ ’wo dɔna

¹¹ Bii Izraɛl, gipawe lé é ke é dɔle gligli nyɛ nya, Alé we ma lé maa dan ilé luugimunu si lɛ guru lé ’yi ’ka a gi lo, a wɔlɛ ma.

¹² ’Kaa luugimunu lé ka bli ke we lɛ, ’ka go kɔn plɛplɛ gi ka pa gi. Maa fe ka lɛ kyɔ é ziin, Maa dan a lɛgi kɛlɛ lɛ ka lɛ gɔnɔ fié.

¹³ Juda lé ke anlé sa nya, maa gana, ’Té Éfraim ɛ ke anlé sawɔlɛ nya; Bii Siɔn, maa dan ilé munu nwa lɛ Bii Javan lé munu ma. Yé maa dan i kɛlɛ lɛ bélé nyanazan lé gwɔun zo.

¹⁴ Gakelebale é dan bɔra lɛ wo ta loru Yé alé sawɔlɛ é dan go lɛ bélé lɛɛ yuɛwuovɔle zo; Mizan Gakelebale, é dan béli fɛn lɛ, É dan bié lɛ barikoko plɛplɛ lé éé sié yirinwana bɛyilazia, a gi.

¹⁵ Lai sunyanu lé Gakelebale é dan wo tabin lɛ; Wo dan fɛna faa ble lɛ, wo dan paalu gi gɔlɛnénu kele lɛ; Wo dan nyɛ mini lɛ, yé wo vun é dan we lɛ bélé nwɛgyɛzannu zo; Wo dan fan lɛ a nya bélé wi nyɛ zéngikana zo, Bélé balebanna sunlanu zo.

¹⁶ ’Bɛ yi la Gakelebale wolé Bale é dan wo si lɛ we gi Bélé alé munu lé trubɛ zo; Naa, wa fuaneé lé tɔkoro ma gɔlɛwezannu lé wo dan bi lɛ alé tɛrɛ la, wo nya.

¹⁷ Yiba! we nyian é wo mi lɛ ’bɛ zoo? Fɛ nɔnɔmi a ’bɛ zoo? ’Sa é dan pɛniɛnu tin lɛ Yé dɔrɔ dɛrɛ é dan blɛnnu tin lɛ.