Zakari 8 - Kazambale lé Sebe Sauunu 1979

Bale léé, ’é dan Izraɛl dɔ lɛ é dɔna

¹ Lai sunyanu lé Gakelebale é dére gi bɔra ’ko zo:

² Lai sunyanu lé Gakelebale léma: Siɔn ta maabobli nwa an gi, yé an wɛwɛ dɔ alé we ma.

³ Gakelebale léma: Maa nɔlaan an pa gi Siɔn, yé é sɔ an lɛ léé, maa nyana Jérusalɛm. Wo dan Jérusalɛm laa lɛ, yarapawela fla, yé wo dan lai sunyanu lé Gakelebale lé gɔ laa lɛ, gɔ sauun.

⁴ Lai sunyanu lé Gakelebale léma: Gɔnéblanénu valé leblanénu é dan nyana lɛ é ziin Jérusalɛm lé zinu ta nuu, ’té wolé tawomayilinu a wo lee, wolé kwa gyɛle we ma.

⁵ Flaworo dii é dan fan lɛ pɛniɛnu valé blɛnnu nya, ’té woo zana gya.

⁶ Lai sunyanu lé Gakelebale léma: ’Bɛ yi la, dé munu ’ko pɔnénu gi vuru we ’ko ma, ’bɛ ’ka maa gi vuruan lo.

⁷ Lai sunyanu lé Gakelebale léma: Ka ye, maa dan anlé munu si lɛ yirinwanazia valé yirivɔnazia tɛrɛnu ta.

⁸ Maa dan da lɛ wo nya, yé wo dan nyana lɛ Jérusalɛm; wo dan kɛlɛ lɛ anlé munu nya, yé maa dan kɛlɛ lɛ wolé Bale nya, webozen valé wedrɔle kɛlɛle nya.

⁹ Lai sunyanu lé Gakelebale léma: Balelayemunu lé wo bɔra lai sunyanu lé Gakelebale lé kɔn gane vɔbléyi va, yé wo léé, ’wo dan yee kɔn ’ko dɔ lɛ, ka lé ka wo dére ’ma kyɔ, ’ka bɛ dɔ plɛplɛ.

¹⁰ Kɔn gane vɔbléyi ’lɛ, ’té blami ’ka élé nyanama ma ban yé lo, yé nyanama pa winu zé ban ’ka lo; wo nyanézannu lé we ma, munu ’ka sié fla drɔɔ, ’té woo dan fla drɔɔ lo, yé an daan munu faa ma léé, ’wa kɛlɛ ’wo ke lɛ.

¹¹ Lai sunyanu lé Gakelebale léma: Naa, sin, maa ’ka bɛn ’ko pɔnénu lɛ bélé é vinin zé zo lo.

¹² Naa, ’savɔle va é dan gyɛ lɛ; dɔrɔyilinu poro é dan baa lɛ, tɛrɛ é dan fɛ dɔ lɛ, la é dan fli vɔ lɛ; maa dan munu ’ko pɔnénu gi nana lɛ fɛ ’konu ma.

¹³ ’Kaa Juda valé Izraɛl munu, fɛan zo lé ka kɛlɛ balepamazannu nya bɛnnu méléna, a zo lé maa dan ka si lɛ we gi, yé maa dan ka drɔɔ vo lɛ. Té ka kana lo, ka bɛ ’é dɔ plɛplɛ ma.

¹⁴ Lai sunyanu lé Gakelebale léma: Fɛan zo lé é dɔ an gi léé, maa wenaané kɛlɛ ka lɛ, ka tranu lé an bliflile lé we ma, yé an bli ’ka nɔla lɛ a kɛlɛle ma lo;

¹⁵ a zo duo lé sin, an bli nɔla, yé é a an gi léé, an wezin kɛlɛ ’kaa Jérusalɛm valé Juda munu lɛ sin. Té ka kana lo.

¹⁶ We lé é a lé ka kɛlɛ, yee lé ke ’ko: ’ka webozen fe ka ke lɛ; ’ka we ble ’é blena kalé flagɔrɔ ’léénu na, ka vole drɔɔ we gi;

¹⁷ té ka vazan do kpen é gi bɔrɔ wenaané nya é bɔluzan ma lo, yé té bale kunle vié nya é sɔ ka lɛ lo. Wenu lé wo ’ka sɔ lɛ an lɛ lo, wo lé ke bɛ. A zo lé Gakelebale a fe.

¹⁸ Lai sunyanu lé Gakelebale we fe an lɛ yé é léma:

¹⁹ Moné ziɛnzan lé lɔrɔsɔnle koo, moné soruzan lé lɔrɔsɔnle koo, moné sɔrafiézan lé lɔrɔsɔnle koo, moné vuzan lé lɔrɔsɔnle koo, wo dan nɔla lɛ Juda munu lɛ ginanayinu valé gi drɔɔ fɛtikɛlɛyinu nya. Naa, webozen valé vole drɔɔ ’é sɔ ka lɛ ma.

²⁰ Lai sunyanu lé Gakelebale léma: Migɔnɔnu valé fla kiɛre tamunu wo dan da lɛ é ziin.

²¹ Fla do tamunu é dan go lɛ fla do tamunu va a fele nya léé: Kaa go zanté vɔ Gakelebale lɛ, kaa lai sunyanu lé Gakelebale nagini. Ko dan go lɛ é ziin.

²² Yé migɔnɔ kiɛre valé bɛngɔnɔ kiɛre wo dan da lɛ Jérusalɛm, lai sunyanu lé Gakelebale naginile valé zanté vɔle a ma we gi.

²³ Lai sunyanu lé Gakelebale léma: ’Bɛ yinu nya, tɛrɛ faa la dére do do vɔ bɛnnu va mi vu é dan kun lɛ Juifi mi do lé sɔ lɔlu ma yé wo dan a fe lɛ a lɛ léé: Ko dan go lɛ i zuo, naa, ko ’ma léé, Bale a ka va.