Zakari 6 - Kazambale lé Sebe Sauunu 1979

É gulidangoro ziɛn ye yuɛzi gi

¹ An yuɛ vɔ loru é ziin yé maa nagini, ’té gulidangoro ziɛn a bɔrana gɔ blɛn fié méléna; gɔ ’konu a zénégɔnu nya.

² Wisoo kanakananu ɛ ke gulidangoro vininzan ma, yé a tinu ɛ ke goro fiézan ma,

³ yé a funu ɛ ke goro yaazan ma, yé a zorozowisoonu ɛ ke a ziɛnzan ma.

⁴ Maa lé lanje lé ko ke wefena a nya, a lɛ léma: Anzan, mɛ fɛ léé?

⁵ Lanje a zi pa an lɛ léma: Lagi fu ziɛnnu lé woo bɔraan fɛana lé wo ke é dɔle Tɛrɛfaazan ’lɛ ana bɛ, wo lé.

⁶ Wisoo tinu lé wo polu ke é dɔle goro do ma bɛ, wo yara dɔ yirinwana bɛbolazia tɛrɛ vazia, ’té a funu éé goo wo zuo; a zorozowisoonu ’wo yara dɔ yirinwana bɛyilazia tɛrɛ vazia.

⁷ A kanakananu bɔra yé wo zi laa, léé, ’wo go gié lɛ tɛrɛ faa la. Lanje lé wo lɛ léé: ’Ka go ’ka gié tɛrɛ faa la. Yé wo go yé wo gié tɛrɛ faa la.

⁸ Lanje an laa yé é lé an lɛ léé: Bé nagini, wo lé wo yara dɔ yirinwana bɛbolazia tɛrɛ la, wo anlé bliflile pla yirinwana bɛbolazia tɛrɛ la.

Bale léé, ’wo tɔkoro wo Jozué ’wuo ma

⁹ Gakelebale we fe an lɛ yé é léma:

¹⁰ Blɛfɛ lé luugimunu a pa zia Eldai koo, Tobija koo, Jédaéja koo, wo lee bɛ, ’i wo si yé ’i goan yee yi duo nya Sofoni be Jozias lé kɔn gi, wo si Babilɔn yé wo zun fɛana, ana.

¹¹ ’I gɔɔlifu valé kyan si yé ’i tɔkoro kɛlɛ a nya, yé bé wo Balebanmunu ’lɛzan Josadak be Jozué ’wuo ma.

¹² Bé fe a lɛ léma: Lai sunyanu lé Gakelebale léma: Bé ye, mi do lé a tɔ ke mipunla, é dan nɛɛ lɛ élé fɛna, yé é dan Gakelebale lé kɔn dɔ lɛ.

¹³ É dan Gakelebale lé kɔn dɔ lɛ; tɔ é dan kɛlɛ lɛ a bɛ la; é dan nyana lɛ élé webleblin la yé é dan pla lɛ munu nwiin. É dan kɛlɛ lɛ Balebanzan nya élé webleblin la yé alé balebannyanama valé alé plale mi nwiin nyanama é dan tawo lɛ ékeva drɔɔ.

¹⁴ Tɔkoro ’konu é dan kɛlɛ lɛ Élɛm koo, Tobija valé Jédaéja koo, Sofoni be En koo, wozé nya; é dan kɛlɛ lɛ we sele dɔ migifɛ nya Gakelebale lé kɔn gi.

¹⁵ Munu lé wo ke baa, wo dan da lɛ yé wo dan nyanama pa lɛ Gakelebale lé kɔn gi; yé ka dan a gi dɔɔ lɛ léé, lai sunyanu lé Gakelebale an pa zia ka va. Dé ka tɔné dɔ Gakelebale, kalé Bale dére lɛ, we ’ko é dan kɛlɛ lɛ.